وه‌زاره‌تا ده‌رڤه یا ئه‌مه‌ریكایێ د راپۆرته‌كا خوه دا زێده‌باری كو رێخستنا په‌كه‌كێ ب گرووپه‌كێ ته‌رۆریستی ب ناڤ كرییه، ده‌واما هێرشێن تركیێ ژی ل سه‌ر ڤێ رێخستنێ به‌حس كرییه.
وه‌زاره‌تا ده‌رڤه یا ئه‌مه‌ریكایێ د راپۆرتا خوه یا هه‌ری داوی دا، پارتییا كاركه‌ركێن كوردستانێ په‌كه‌كێ، ب گرووپه‌كێ ته‌رۆریستی ناڤ كرییه و دبێژیت: هه‌ژمارا ئه‌ندامێن ڤێ گرووپێ د نێڤبه‌را 4 هه‌تا 5 هه‌زار كه‌سان دا تێن ته‌خمین كرن.
راپۆرتا ئه‌مه‌ریكایێ باس ل په‌كه‌كێ دكه‌ت و دبێژیت: ئه‌ڤ گرووپ ل سه‌ر هێرشێن خوه یێن ته‌رۆریستی ل ناڤا تركیێ به‌رده‌وامه و هه‌روه‌ها هێرشێ دكه‌ته سه‌ر به‌رژه‌وه‌ندیێن ڤی ولاتی ل ده‌رڤه‌ی سنۆر، میناك ب دیل گرتنا كه‌سێن سڤیل.
وه‌زاره‌تا ده‌رڤه یا ئه‌مه‌ریكایێ د راپۆرتێ دا هه‌روه‌ها ده‌ست نیشان كرییه كو تركیه ژی ل سه‌ر هێرشێن خوه یێن ل دژی په‌كه‌كێ به‌رده‌وامه.
د راپۆرتا ئه‌مه‌ریكایێ دا هاتییه كو هێزێن نیزامی یێن تركیێ زێده‌باری ناڤخوه‌یا وه‌لات، ل هه‌ر یێك ژ باشوور و رۆژئاڤا كوردستانێ، ئۆپه‌راسیۆنێن له‌شكه‌ری ئه‌نجام دده‌ت و روو ب رووی په‌كه‌كێ دبیت.
ب سه‌ده‌ما هێرشێن تركیێ، هه‌ری كێم 35 كه‌سێن سڤیل و 265 ئه‌ندامێن په‌كه‌كێ ل باكورێ كوردستانێ ژیانا خوه ژ ده‌ست دانه، ل همبه‌ری ڤێ 41 چه‌كدارێن ترك هاتنه كوشتن
ل گۆری ئاگاهیێن «كۆمه‌لا قه‌یرانێن ناڤده‌وله‌تی» كو رێخستنه‌كا نه‌حكوومی یه، هه‌تا داوییا سالا 2020ێ، ژ ئه‌نجاما هێرشێن كو ل تركیێ هاتینه ئه‌نجام دان، هه‌ری كێم 35 كه‌سێن سڤیل و 265 ئه‌ندامێن په‌كه‌كێ ل باكورێ كوردستانێ، ژیانا خوه ژ ده‌ست دانه، ل همبه‌ری ڤێ 41 چه‌كدارێن ترك هاتنه كوشتن.
حكوومه‌تا تركیێ ل سالا 2021ێ ژی ب به‌هانه‌یا پشتگری یان هاریكاریكرنا په‌كه‌كێ، ل سه‌ر ده‌سته‌سه‌ر كرن و بنچاڤ كرنا و زیندان كرنا كوردێن باكورێ كوردستانێ به‌رده‌وامه بوویه و د ناڤا وان دا، رۆژنامه‌ڤان، چالاكڤانێن مافێن مرۆڤان، پارێزه‌ر و سیاسه‌تڤان ژی هه‌نه.
