رووسیا ھشیاریا زێدەبوونا کریارێن تەرۆریستی ل سووریێ ددەت

نوونەرێ سەرۆکێ رووسیایێ ڤلادمیر پوتین ل سووریێ ئالەکساندر لاڤرەنتیەڤ، ھشیاریا زێدەبوونا کریارێن تەرۆریستی ل سووریە ددەت.

بەریا دەستپێکرنا کۆنگرەیا 17ێ یا ئاستانایێ ئالەکساندر لاڤرەنتیەڤ، راگھاندیە، وەلاتێ وی ل بەندێیە گوفتوگۆ دەربارێ رووبەرووبوونا کۆمێن تەرۆریستی و یەکخستنا ھەولا ھەموو ئالیان ل دژی تەرۆرێ بهێتە کرن.

ھەروھا ئالەکساندر لاڤرەنتیەڤ، ھشیاریا زێدەبوونا کریارێن تەرۆریستی ل سەرانسەری سووریێ ددەت و دبێژیت زێدەبوونا کریارێن تەرۆریستی جھێ نیگەرانیێ یە.

 ئیرۆ رۆژا سێشەمێ 21-12-2021ێ خولا 17ێ یا کۆنگرەیا ئاستانایێ ب ئارمانجا چارەسەریا پرسا شەرێ ناڤخوەیێ سووریێ ب چاڤدێریا ئیران، رووسیا و ترکیێ دەست پێ کر.

 د وێ دانووستەندنێ دا نوونەرێ تایبەتێ نەتەوەیێن یەکگرتی ژ بۆ سووریێ گەر پەدەرسەن و نوونەرێن وەلاتێن ئیراق، ئوردن و لوبنانێ ژی چاڤدێری و بەشداریا کۆنگرەیێ دکەن.

 شەرێ ناڤخوەیێ سووریێ د ئادارا 2011ێ دا د ناڤبەرا کۆمێن چەکدارێ ئۆپۆزیسیۆنا سووریێ و رەژیما سووریێ دا دەست پێ کر و ھێژ ژی بەردەوامە. ژ بەر شەرێ ناڤخوەیی یێ سووریێ زێدەتر ژ 7 ملیۆن خەلکێ سووریێ بوونە پەنابەر و زێدەتر ژ 500 ھەزار ئینسان ژی ھاتنە کوشتن.