په‌كه‌كێ، هه‌ده‌پێ و ئاپۆی ب قاسی ده‌وله‌تا ترك زمانێ كوردی لاواز كرییه‌

ziman bi kurdî xweşe-pkk-hdp-apo-ocalan-kck

زمان ناسنامەیا نەتەوی یە، ئەگەر زمان نەبیت چ واتەیا نەتەوێ ژی نینە، ئاخافتن ب زمانێ داگیرکەرا و مەزن دیتنا زمانێ وان ب واتەیا ئینکارکرنا نەتەوە و زمانێ مرۆڤی ب خوە دهێت، گەر مرۆڤ زمانێ دایکێ نە پارێزیت هیچ واتەیەک بۆ وێ یەکێ نابیت کو ببێژیت ئەز نەتەوە پەروەرم .

ئەڤ مژارا کو ئەم دخوازین بەحس بکەین ل سەر تەکۆشینا کو پەکەکە یان ژی ھەدەپە ل باکوورێ کوردستانێ برێڤە دبەتە، ئاشکەرا و دیارە کو ڤێ تەکۆشینا وان چ پەیوەندی ب نەتەوبوونێ ڤە نینە، بەس یێن بوویە پرەک دناڤبەرا ترکا و کوردان دا ژ بۆ ئاسمیلەکرنا زمانێ کوردی و دانە قەبوولکرنا زمانێ ترکی ب کوردان.

دەما کو پەکەکە ھاتیە دامەزراندن فکرا ئاپۆ ئەو بوو کو دگۆت ئەم دێ ئەو سیستەما فیۆدالی یا کو ل باکوورێ کوردستانێ ھەیی ھەلوەشینین و ب فکرا لینینیزم و مارکسیزمێ تێگەھا سۆسیالیزمێ ئاڤا کەین، لێ بەلێ وەکە ئاپۆ ب خوە دبێژیت، ئەو بوو شۆپدارێ رێیا چەپێن ترکا کو رێبەریا وان ماھیر چایان و دەنیز گەزمیش دکر، ب ئاوایەکێ کو ل سەر ڤێ یەکێ ئاپۆ و جەمیل بایک ب دەڤێ خوە دبێژن ئەم بەردەوامیا چەپێن ترکاینە یا کو رێڤەبەریا وێ ماھیر و دەنیز دکر.

ئاپۆ ب ناڤێ نەتەوەبوونێ کوردێن باکور ب خوەڤە گرێدان و خاپاندن

ئاپۆ دزانی حەلقەیا لاوازا زنجیرەیێ کوردستانە، و گەلێ کورد ژی تێنیێ ئازادیێ یە، پێدڤییە زنجیر د حەلقا لاوازدا بشکێت، ئاپۆ ئەڤ حەلقەیا زنجیرێ یا لاواز باش ب کار ئانی و ب  ناڤێ نەتەوە بوونێ کوردێن باکور ب خوەڤە گرێدان و خاپاندن.

گەلەک حزب و حەرکەتێن کوردا ژی ئەڤە باش تەسبیت کربوو و دخواستن ڤێ پۆتانسیەلا مەزن یا کوردان بێخنە حەرکەتێ و لگەل دەمی دا تەکۆشینەکا نەتەوی دەست پێ بکەن. لێ دەولەتێ ئەڤ تشتە دزانی و هەست پێ دکر کو مەترسیەکا مەزن ل بەندا دەولەتێیە، و دەولەتێ ئەو قەدەر جەرباندن کربوون ل سەر تنەکرنا کوردا، کو دەمەکێ د گۆت مە کورد ل چیایێ ئاگری بن ئەرد کرن و ل سەر ژی سەبە کر. لێ ترکا نەدزانی کو زمان و چاندا کوردا هندە یێن ب ھێزن کو دێ وێ سەببێ شکێنیت و جارەکا دی دێ سەرێ خوە ھلدەت. ترکا ب چ ئاوا نە کاری بوو گەلێ کورد ژ نەتەوە و زمانێ وێ دوور بکەت و وان ئاسمیلە بکەت. مەترسیا حزب و حەرەکەتێن کوردی دیسا ترسەکا مەزن کربوو د دلێ ترکێن فاشیست دا.

لێ یێک رێ ھەبوو کو دەولەت بکاریت بگریتە بەر خوە، ئەوژی ئەڤە بوو کو د ناڤا کوردان بخوە دا رێبەرەکێ نەخشاندی و ب دەستێ خوە پەروەردە کری ئامادە بکەن و پێشکێشی گەلێ کورد بکەن. ئەڤ کەسە ژی پەروەردە کریێ دەولەتا ترک و میتێ ئانکو عەڤدلا ئۆجەلان بوو.

ئاپۆ ب دەڤێ خوە دانپێدانێ دکەت و دبێژیت چ ئەشقا کوردینیێ د من دا نینە

د گەلەک شرۆڤە و نڤیسینێن خوە دا، ئاپۆ ب دەڤێ خوە دانپێدانێ دکەت و دبێژیت چ ئەشقا کوردینیێ د من دا نینە. د وی سەر دەمیدا کو ئاپۆ ل کینیایێ ھاتیە گرتن ژی، ھێژ د بالەفرێ دا بوو دەما گۆتی دایکا من ترکە و ئەز د بن خزمەتا دەولەتێ دامە، دیسا دیمەن و ڤیدیۆیێن ئاپۆ دەما ل ئیمرالییێ ژ بۆ سەرۆک ئارکانێ لەشکەری تاخڤیت و دبێژیت، ئەگەر دەولەت دەرفەتێ ب من بدەت ئەز دێ وەکەم کو جھەکێ وەک ھەکاری ژی ب ترکیەکا ستەنبۆلی باخڤیت و رێ و رێبازێن ئاسیملەکرنا کوردا نیشانی دژمنی ددان ژی ھەنە.

ئەڤ ئاخافتن و دانپێدانێن ئاپۆ دیار دکەن کو ئارمانجا وی ھەر د سەری دا ل گەل میتێ و دەولەتێ بوون، بوو. بزاڤا کو ئاپۆ ب دەستێ میتێ چێکری و زمانێ وێ ل سەر ئەساسێ ترکی ھات پێشخستن و زمانێ پەکەکێ یێ فەرمی کرە ترکی، د ناڤا کادرۆیێن پەکەکێ دا ھەگەر کادرەکێ ل سەر زمانێ کوردی شرۆڤەیەکێ بکەت دهێتە تەشهیرکرن و حەنەک پێ تێنە کرن.

دەما کادرۆیەک ب کوردی دئاخڤیت، ئەو کادرۆ د ناڤا پەکەکێ دا ب نەزان و نە رەوشەنبیر و ملییەتچی دهێتە رەخنەکرن و دهێتە بچووک کرن

نھا زمانێ ھەدەپێ کو باسکێ سیاسی یێ ئاپۆ و پەکەکێ یە ژی ترکیە، ژ بۆی ئسپاتا ڤی تشتی ژی دناڤ پەکەکێ دا ئەم دکارین قالا ڤێ یەکێ بکەین کو دەما کادرۆیەک ب کوردی دئاخڤیت، ئەو کادرۆ د ناڤا پەکەکێ دا ب نەزان و نە رەوشەنبیر و ملییەتچی دهێتە رەخنەکرن و دهێتە بچووک کرن. ئەڤ تێگەھە دناڤ ھەدەپێ دا ژی ھەیە. گشت جڤینێن وان ب زمانێ ترکینە و ھەر کەس ھەول ددەت کو خوە وەک رەوشەنبیر بدەتە نیشاندان ب ترکی دئاخڤیت.

ئەو «ھەڤالێن» کو ژ پارچەیێن دی یێن کوردستانێ تەڤلی پەکەکێ دبن د دەمەکێ کورت دا فێری ترکی دهێنە کرن، ئانکو ئاپۆ و پەکەکە یێن بوویە مەکانیزمەکێ ئەساسی ژ بۆ ئاسیملەکرنا کوردێن نەتەوپەروەر.

گشت بزاڤێن کوردی گاڤا ھەرێمەک د بن کۆنترۆلا خوەدا دگرت خەباتا خوە یا سەرەکی دکرە پەروەردەکرنا زمانێ کوردی، ئەڤ نموونە ل رۆژھلاتێ کوردستانێ و ل باشوورێ کوردستانێ ھاتیە ژیان کرن، ل رۆژئاڤایێ کوردستانێ ژی پێش هاتنا پەکەکێ ئەڤ نموونە ل بەرچاڤ خوەیا بوویە، د بەرێ دا گەلەک کەس و حزب ھەبوون وەک جەلادەت بەدرخان، نوورەدین زازا، در.نووری دەرسمی، جگەرخوین، سەیدایێ تیرێژ، عۆسمان سەبری، محەمەد شێخۆ، سەعید گاباری و گەلەک کەسێن دی. ل رۆژئاڤا نڤیساندن و پەروەردە کرنا دیرۆک، ئەدەبیات، چاند و ھوونەر و دیسا گرنگیا زمانێ کوردی ھەبوو و خزمەتێن گەلەک مەزن ھاتبوونە کرن، لێ گاڤا ئاپۆ و پەکەکەیا وی ل لبنان و سووریێ بجیهـ بووی ئەڤ رەوشە بەرە بەرە لاواز بوو، پەکەکێ ل رۆژئاڤا ب ئالیکاریا رەژما بەعس و سەرۆکێ وێ حافز ئەل ئەسەد بزاڤا د بن ناڤێ ھەرچار پارچەیێن کوردستانێ جوانێن رۆژئاڤا خاپاندن و ئەو حزب و لایەنێن دی، وەک جاسووس و خزمەتکارێن دژمنی بناڤ کرن و گەلەک کەس و سیاسەتمەدار یان کوشتن یان لێدان و نەهێلا ل دەڤەرێ بمینن، ل ور گرنگیا زمان و پەروەردا نەتەوی نەهێلا، گشت زڤراندنە سەر فکرا سۆسیالیزما ئاپۆ کو ب دەستێ فاشیزما کەمالیستا ھاتیە چێکرن، ژ خوە رەوشا رۆژئاڤا نها ژی خوەیایە چاوا ژ باوەشێ نیشتیمانی قوتکرن و دەڤەر کرە دەڤەرەک عەرەبی و ناڤێ وێ یێ شرین ژی کرە «باکوور رۆژھلاتێ سووریێ»، نها ژی ل رۆژئاڤا زمانێ عەرەبی سەرەکییە و گاڤا د کۆمبوونەک ژی ھەبیت د وێ کۆمبوونێ دا %1 ژی عەرەب هەبن، پێدڤییە د وێ کۆمبوونێ دا ب زمانێ ئەرەبی بهێتە ئاخافتن

پەکەکێ د دەستپێکا دامەزراندنا حکوومەت و پارلەمەنتۆیا کوردستانێ دا ھەلوەستا خوە یا نەرێنی (نێگەتیڤ) نیشاندا

بابەتێ مە دێ هێتە سەر کوردستانا باشوور، ئەو باشوورێ کوردستانێ کو ب خوینا ب سەدان ھزار کوردا ھاتیە ئاڤدان، ب ئەنفال و کیمیا بارانێ روو ب روو مایی، ب کەد و تەکۆشینەکا گەلەک مەزن ل ھەمبەر عۆسمانی، ئینگلیز و عەرەبا ل بەرخوەدایی، ب دەھان سەرکردەیێن وەک شێخ عەبدوسەلام بارزانی، شێخ مەحموودێ حەفید، مەلا مستەفایێ بارزانی د ڤێ رێکێ دا جانێ خوە فەدا کری و بەدەل ژ بۆ ژیانا خوە رزگاربکەن نەدان دوژمنی و ھەیا کو ب پشتەڤانیا گەڵێ کورد ل باشوور ئەڤ دەستکەفتیە ب دەست خستی.

نھا باشوور تاکە پارچەیا کوردستانێ یە کو حکوومەتەکا فەرمی، ئالا و پارلەمانەک فەرمی هەیی و زمانێ شرینیێ کوردی ب فەرمی دهێتە ئاخافتن، د دەبستان، زانکۆ، سازی و دەزگەهێن حکوومەتێ دا ب زمانێ کوردی دهێتە پەروەردەکرن و ئاخفتن.

لێ پەکەکێ د دەستپێکا دامەزراندنا حکوومەت و پارلەمەنتۆیا کوردستانێ دا ھەلوەستا خوە یا نەرێنی (نێگەتیڤ) نیشاندا، پێشمەرگە و پارتیێن باشوور وەک دوژمن ب چەکدارێن خوە و گەلێ باکوور دانە نیشاندان، ژ بۆ کو ئەڤ دەسکەفتیێن کوردا ژ دەست بچن ب پشتەڤانیا دوژمنی گەلەک جارا ئێرشی باشوور کر و خواست دەستوەردانێ د ناڤا باشوور دا بکەن. گەهاندە ئاستەکێ ووسا ژی کو کەسێن وەک دیار غەریبێ کو ل قەندیلێ ھاتیە کوشتن ژی، ل کەرکووکێ دەورەیێن پەروەردێ ژ بۆ کادرێن پەکەکێ د ناڤا پەچەدەکێ و گەل و لایانگرێن خوە ڤەدکرن، د ڤان پەروەردا دا دگۆت دبیت کو ئەم ناڤێ کوردستانێ ل ڤێ پارچەیێ ژی نەکەین، ژ بۆ کو بۆ برایێن مەیێن عەرەب و ترکومان حەساسی چێنەبیت و ناڤەکێ دی یێ گونجایی لێ بهێتە کرن. مخابن فکرا پەکەکێ ژ بۆ تەکۆشینا گەلێ کوردستانێ ئەڤەیە.

ترکی کو د بنگەھا خوە دا ب زمانەکێ ھەری لاواز د دنیایێ دا دهێتە ناسکرن ژ بۆ کوردێن مە  یێن باکور بوویە زمانەکێ بالکێش

کوردستانا باشوور بوویە سەیوانەک کو ھەمی کورد ب کارن زمان، چاند و دیرۆکا خوە تێدا بپارێزن تێدا بژین و خوە تێدا بپارێزن، بتایبەتی ژی پەکەکێ و ھەدەپێ. ئەڤ شەرێ کو ل گەل دەولەتا ترکا ب ناڤێ شەرێ خەندەکا پێش کەفتی کو ب پیلانا میتێ و ئاپۆ و قەندیلێ ھاتبوو چێکرن، کەسێن ژ ڤی شەری ساخ فەلتی لایەنگرێن پەکەکێ و ھەدەپێ ژ بۆ پاراستنا خوە، خوە ئاڤێتن باشوورێ کوردستانێ دیسا ب سەدان کەسێن ژ دەستپێکێ وەرە ل گەل دەولەتا ترک پرسگرێک ھەبوون د بن سەیوانا حکوومەتا ھەرێمێ دا خوە دپارێزن، لێ تشتێ سەیر چیە ل ڤێ دەرێ؟ مەزنێن کوردا گۆتنەک ھەیە کو دبێژیت، نانخوەرێ سفرە دڕین، واتە ئەو سفرا کو نان و خوارن ژ بۆ پێشکێش کری ئەو وێ سفرێ د دڕینن، مەسالا ڤان کەسێن گرێدایی فکرا ئاپۆ ژی هەر ئەڤەیە، د ناڤ باشوور دا خوە دپارێزن لێ د دەربارێ حکوومەتا ھەرێمێ دا دیعایەت و پرۆپاگاندایێن خراب دکەن و تەڤلیھەڤیا چێدکەن.

ئەم دیسا بزڤرینە سەر بابەتێ خوە یێ سەرەکی کو زمانە. زمانێ ترکی کو د بنگەھا خوە دا ب زمانەکێ ھەری لاواز د دنیایێ دا دهێتە ناسکرن، ئەڤ زمان ژ بۆ کوردێن مە  یێن باکور بوویە زمانەکێ بالکێش و ژ بۆ خوە کریە زمانەکێ فەرمی و پێشکەتی.

تشتێ کو ترکیا نەشیای ل دژی زمانێ کوردی بکەت ب پەکەکێ دا کرن

ھەرچەند ترکا خواستبیت زمانێ خوە ب دارێ زۆرێ ب کوردا بدەنە قەبوولکرن ژی، ژ بەر کو دایکێن مەیێن کوردا ل مالێ کوردی نیشانی زارۆکێن خوە ددا نەدهێلا ل ناڤ مالێ دا ب زمانێ ترکی یانژی زمانەکێ بیانی بهێتە ئاخفتن، ژ بۆ وێ ژی کوردی لاواز نەدبوو. لێ د رۆژا مەیا ئیرۆیین دا ب تایبەتی ژی یێن گرێدایی پەکەکێ و ھەدەپێ خوە گەھاندن ناڤ مالا کوردان، د بن ناڤێ ئازادیا ژنێ دا ژن ھاتە تەنزیم کرن، و شرۆڤە و کتێبێن ئاپۆ و پەکەکێ گەھاندن ھەموو مالان و ل سەر ژنێ فەرز کر کو یێن نەزانن بخوینن و بنڤیسن ژی ترکی پێ دا فێرکرن و ناڤێ وێ ژی کرە رەوشەنبیری و شۆرەشگەری، ب ئاوایەکێ کو ئەڤ فێربوونا خواندن و نڤیسینێ ژی، ب زمانێ ترکی بوو، دەولەتێ ب سالا نەکاری بوو نە ب «یاتلی ئۆکول»، نە ژی ب ڤەکرنا کورسێن ترکی یێن ب شەڤا ژ بۆ کوردان، وان ئاسمیلە بکەن و زمانێ وان لاواز بکەن، لێ بەلێ ئاپۆ و پەکەکێ ئەڤ کارە بۆ ترکا ئەنجامدا.

ئەڤ زمانێ دژمنی ووسا ل بەر کوردان شرین کریە کو ب چ ئاوا دەست ژێ بەرنادەت و خیانەتێ ل زمانێ خوە د کەن، ب ڤێ تنێ ژی رازی نابن، بەلکو ڤی زمانێ دژمنی د گەھیننە پارچەیێن دی یێن کوردستانێ ژی.

کوردێن ل باکورێ کوردستانێ چوویە باشوور ب زمانێ ترکی دئاخڤن و ناڤێ کۆمپانیێن خوە ژی ب ترکی ناڤکرنە

نھا ئەم ل کوردستانا باشوور بنێرین، ھەژمارەکا مەزن یا کوردێن باکور ل ھەرێما کوردستانا باشوور ھەنە، بەشەکێ مەزن ژی ئەون یێن ژ بەر پەکەکێ و ھەدەپێ رەڤیای ڤێ پارچەیێ، بەشەک ژی ژ بۆ کار و خەباتێ ھاتنە باشوور، ھندەک کەس ژ وان کارکەرن، مقاولن، ئەندازیارن، گەلەک ژ وانا کۆمپانی و دوکان و خوارنگەھ ژ بۆی خوە ڤەکرینە، ھندەک ژ ڤان کەسان ناڤێ کۆمپانیێن خوە ژی ب ترکی ب ناڤ دکەن ب ترکی دئاخڤن و ئەو قەدەر ترکی بالکێش کریە، خیانەتا کو ل زارۆکێن خوە کری تێرا نەکریە، ئەو کارکەرێن خەلکێ باشوور یان ژی رۆژھلات یان ژی رۆژئاڤا کو ل کارگەھێن وان کاردکەنن ژی فێری زمانێ دوژمنێ خوە کرینە.

ل مالێن خوە دا هندە ب پێشدا چوونە کو سەرەرایێ وێ یەکێ کو ل باشوورێ کوردستانێ ھەر کەس ب زمانێ کوردی دئاخڤیت د مالێن ڤان کەسێن باکور ب تایبەتی ژی لایەنگرێن ھەدەپێ و پەکەکێ ل گەل زارۆکێن خوە ب ترکیەکا ستەنبۆلی دئاخڤن و ئەو زارۆک ل ناڤا دلێ کوردستانێ دا کوردی نزانن و بەرسڤا تە ب ترکی ددەن، ھەر دیسا ئەو کەس دەما باسی کوردینیێ دکەن بێ کو بزانن ئەو یێن بوویە لنگەکی ئاسیملاسیۆنێ یێ ئەساسی، بێ شەرمانە دبێژن ئەگەر پەکەکە و ئاپۆ نەبانە چ زمان ب ناڤێ زمانێ کورد نەدمان. ئەگەر پەکەکە و ھەدەپە راست دبێژن بلا پیچەکێ زمانێ کوردی ب رۆژەڤ کربا، ھندی ژ بۆ ئاپۆیێ بازرگان مەش کری یەک جارێ ژی ژ بۆ زمانێ کوردی خەلک نەئانی کۆلانا، رۆژەکێ ژی کامپانیایەک ژ بۆ زمانێ کوردی ل دار نەخست، دەبستان پرۆتەستۆ نەکر، ب ڤێ نێزیک بوونا خوە لنگێ ئاسیملاسیۆنێ گەھاندنە کوردستانا باشوور ژی.

کەنالێن کو دبێژن ئەم خزمەتا زمانێ کوردی دکەین راست نابێژن

ماشاللا حکوومەتا مەیا ھەرێمێ ژی دەمۆکراسیەکا ووسا کو ل چ وەلاتێن دنیایێ نایێتە دیتن د بابەتێ زمانی دا ل کوردستانێ دمەشینیت و چ ئاستەنگەکێ ژ بۆ دروست ناکەن، نموونە: تو بچی کیژ وەلاتێن ئەورۆپا ھەیا کو تو فێری زمانێ وان نەبی مافێ نشتەجیبوونێ و ئیقامێ ژی نادنە چ کەسەکێ، لێ ل کوردستانێ چ گرنگی ب ڤی بابەتی ناهێتە دایین و د ھزرا ڤێ مەترسیێ دا نینن، ھەیا گەھشتیە ئاستەکی ووسا کو گەلەک  کانالێن تەلەڤزیۆنێ ل ھەرێمێ وەشانێ دکەن، راستە ئەڤ کەنالە ب زمانێ کوردینە، لێ ھەموو کانالا تەماشە بکەن دراما و فلمێن ترکی پەخش دکەن کو ژ توندرەوی و نژاد پەرەستی و چیرۆکێن دەرەو تێنە دروستکرن، ب رەنگەکێ کو د وەلاتێن ھەرە دەمۆکراسی و پێشکەتی دا ژی ڤێ ئیجازێ ب کەنالا نادەن کو دیرۆکا دوژمنێ خوە ب زارۆکێن خوە بدەنە گوھدارکرن، و فێری کلتوور و ژیانا بەرەدایی یا دژمنێ خوە بکەن. ئەڤ تشتێ کو کانالێن تەلەڤزیۆنی دکەن، کانالێن ترکا ژی، ھەر ڤێ تشتی دکەن، بەس فەرقا وێ ئەوە کو ب زمانێ کوردی دیرۆک و زمانێ دژمنێ خوە ب زارۆک و مالباتێن کورد ددەنە نیشاندان.

لێ ئەڤ کەنالێن کو دبێژن ئەم خزمەتا زمانێ کوردی دکەین راست نابێژن، گەر دخوازن خزمەتکرنا زمانێ کوردی بکەن نابیت سەرنجا ملەتێ کورد بکێشینە سەر ژیانا دژمنێ خوە و دیرۆک و ژیانا دژمنێ خوە ل پێش چاڤێن گەلێ خوە شرین بکەن، ھەیا کو جوانێن مەژی تەقلیدا دژمنێ خوە نەکەن و تەقلیدا ئسلووبێ دژمنێ خوە نەکەن.

کورد خوەدی دیرۆک و سەرھاتی و داستانێن گەلەک دەولەمەندە، جھێ کو ئەڤ کەنالە بچن فلم و درامایێن دژمنی و خەلکێ بینن و ب خەلکێ خوە بدەنە نیشاندان بلا پیچەکێ زەحمەتێ و فەداکاریێ بکەن و ل سەر سینەما و درامایێن خوە کار بکەن، بەلکی خزمەتەکێ ژ بۆ وەلاتێ خوە بکەن.

پوستێن ھەمان بەش