پشتی سەردانا سەرۆکێ ھەرێما کوردستانێ نێچیرڤان بارزانی یا ھەفتەیا بۆری بۆ ئەنقەرەیا پایتەختا ترکیێ و ھەڤدیتنا وی لگەل سەرۆکۆمارێ ترکیێ ئەردۆگان، مەدیایا پەکەکێ و قەلەمشوورێن پەکەکێ د سۆسیال مەدیایێ دا دەست ب پرۆپاگاندایێن رەش کرن و مژار بەرووڤاژی کر. پەکەکێ و قەلەمشوورێن وێ نڤیساند کو دەما چوونا بارزانی، د جڤینێ دا ئالایێ کوردستانێ نەھاتە دالقاندن و د گەلەک مژاران دا ب زانابوون ھەڤدیتن شێواند. ھەول دا کو پەیوەندیەکێ د ناڤبەرا ئێریشێن ترکیایێ یێن ل دژی شەنگال، دێرک و مەخموورێ و سەردانا نێچیرڤان بارزانی دا چێبکەن. چما پەکەکە ژ ڤان سەردانان عاجزە؟
پشتی ھەر سەردانەکا رایەدارێن باشوورێ کوردستانێ ژ بۆ ترکیایێ، ژ ئالیێ پەکەکێ قییامەت دهێتە راکرن. ئەو ڤان سەردانان وەکە پەیوەندی و ھەڤکاریا لگەل دژمنی دنرخینن. ل گۆری شیرۆڤەیا پەکەکێ پەیوەندیێن رایەدارێن باشوورێ کوردستانێ لگەل ترکیایێ دا خییانەتە. ھەمان پەکەکە ھەر رۆژ بانگ ل دەولەتا ترک دکەت کو دیالۆگ و تێکەلیێ لگەل ھەمان دەولەتێ دروست بکەت. د پارلەمەنتۆیا ھەمان دەولەتێ دا پارلەمەنتەرێن وان ھەنە. میناک، د کۆمیسیۆنا پاراستنا مللی یا ترکییێ دا ژی دو ئەندام ھەنە. گەلۆ ژ بەر ئێرشا بالافرێن ترک ل سەر کامپا مەخموورێ و جیھێن دی ڤان ئەندامان ھەدەپێ دەست ژ کار کێشانان خوە ژ کۆمیسیۆنا پاراستنا مللی یا ترکیێ راگهاند؟ نەخێر. پارلامەنتەران دەست ژ کار کێشا؟ نەخێر.
دەما کو پەکەکە هندە لگەل دەولەتێ دا تێکلدار و ناڤھەڤدایە، گەلۆ چما ژ بەر پەیوەندییا رایەدارێن ھەرێما کوردستانێ لگەل ترکیێ هندە عاجزە؟ ژ بەر کو پەکەکە ناخوازیت چ کورد لگەل کەسێ دا تێکلدار بیت. دەما کو باشوورێ کوردستانێ لگەل ئیرانێ دا تێکلیا چێدکەت، خەلەت دبینیت، پرۆپاگاندا دکەت و دبێژیت ئیران کوردان دکوژیت، دارڤە دکەت، چما لگەل ئیرانێ دا تێکلیا ئاڤا دکەت. دەما کو لگەل سووریێ دا تێکلدار دبیت، خەلەت دبینیت. دەما کو بەحسا تێکلیێن لگەل ئەمەریکایێ دا دهێتە کرن، دبێژیت ھەرێما کوردستانێ لگەل ئەمپەریالیستان دا تێکلدارە و رەخنە دکەت. دەما ھەر بەرپرسەک سەردانا ھەرێما کوردستانێ دکەت، رەخنەیان لێ دگریت. دەما سەردانا پاپا و ماکرۆن بۆ کوردستانێ بوو مژارا سەرەکی یا جیھانێ لێ پەکەکێ ئەڤ سەرەدانا دیرۆکی وەکە نووچەیەک بچووک ژی بەلاڤ نەکر و نەخواست ڤێ سەرەدانێ ببینیت.
ژ بەر کو پەکەکە ژ بلی خوە سەرکەفتنا چ کەسەکێ/سازیەکێ قەبوول ناکەت، ھەبوونا وان ژی قەبوول ناکەت. پەکەکە ژ بلی خوە ھەبوونا چ پارتییان نکاریت داقوورتینیت. پەکەکە کۆلۆنیالیستان تەپەسەر قەبوول دکەت، لێ کوردان ناپەژرینیت. چالاکبوونا کوردان ژ بۆ خوە وەکە کێماسی دبینیت.
ئارمانجا سەردانا نێچیرڤان بارزانی
نێچیرڤان بارزانی د 2یێ شوباتێ دا لگەل ئەردۆگان دا ھەڤدیتن ئەنجام دا. نیزیکی 12 دەمژمێران بەریا جڤینێ بالافرێن شەری یێن ترکییێ ئێرش کرە سەر مەخموور، شەنگال و رۆژئاڤا. پەکەکێ ل سەر ڤان ئێرشان ئیدیعا کر کو ھەرێما کوردستانێ شریکە. لێ فەرماندەیێ پێشمەرگە سیروان بارزانی د داخویانیەکا فەرمی دا راگھاند، کو ئەو ئاگاھدار نەبوونە، لێ بێی ئاگاھداریا رێڤەبەریا ئیراقێ د شیان دا نینە ئەڤ ئێریشە بێنە کرن.
ژ بەر کو پەکەکە خوە ب ناڤەندا ھەموو جیھانێ دبینیت، دبێژن ھەڤدیتنا نێچیرڤان بارزانی و ئەردۆگان ژی ل سەر مە بوویە. لێبەلێ، جڤین جڤینەک بوو کو بەریا ھەفتەیەکێ ھاتییە پلانکرن. د جڤینێ دا دو ئارمانجێن سەرەکی هەبوون. یا یەکەم داخوازا ترکیێ یا کرینا گازا سرووشی ژ باشوورێ کوردستانێ یە ویا دوویەم ژی گۆتووبێژ ل سەر پێڤاژۆیا ئاڤاکرنا حکوومەتا ئیراقێ یە.
ھەروەھا ھەموو داتا نیشان ددەن کو؛ “تێکلیێن پەکەکێ و رێبەرێ وێ عەڤدلا ئۆجالان لگەل دەولەتا ترک دا ژ تێکلیێن لگەل ھەرێما کوردستانێ دا پرتر و خورترن.” پەکەکێ چ جاران سیستەما دەولەتا ترک رەد نەکرییە. پەکەکە دخوازیت ببیتە پارچەیەک ژ دەولەتا ترک و ل گۆری وێ تەڤگەرێن خوەیێن سیاسی برێخستن دکەت. ژ بەر ڤێ سەدەمێ مافێ پەکەکێ نینە کو چ کەسان ب پشتەڤانیا ترکیایێ تاوانبار بکەت. گۆتنەکا مەزنا دبێژیت “ھەکەر خانییێ تە ژ شووشەی بیت، کەڤران نە هاڤێژە پەنجەرا چ کەسان” رەوشا پەکەکێ ژی ئەڤەیە.
پەکەکە نە دانانا ئالایێ کوردستانێ ب چ روو رەخنە دکەت
مەدیایا پەکەکێ سەردانا نێچیرڤان بارزانی یا ئەنقەرەیێ رەخنە دکەت دبێژیت د جڤینێ دا چما تەنێ ئالایێ ترکیێ ھەیە؟ لێبەلێ، دانانا ئالا، فۆرما سەردانێ و ھتد. رۆتینیات و ب کەیفا دەولەتێ نینە. ل گۆری پرۆتۆکۆلا دەولەتا ترک، تەنێ سەرۆککۆمار لگەل سەرۆککۆمارەکێ دا ھەڤدیتنێ بکەت، ئالایێ وەلاتێ کو سەردانا وان کری ژی دێ هێتە دالقاندن. میناک دەما ئەردۆگان لگەل مێرکەلێ دا ھەڤدیتن دکر ئالایێ ئەلمانیایێ نەھات دالقاندن.
ھەروھا پەکەکە د دژمناتیا ئالا کوردستانێ دا ژ ترکیێ توندترە. پەکەکە ئالایێ کوردستانێ قەبوول ناکەت و ب چ سازی و دەزگەھێن خوەیێن فەرمی ڤە نەدالقاندییە. دەولەتا ترک ل گۆری پرۆتۆکۆل و ئەرکان دەم ب دەم ئالایێ کوردستانێ قەبوول دکەت و ددالقینیت. لێ پەکەکە ڤێ یەکێ ژی ناکەت. ھەری داوی د 17ێ کانوونێ دا ئێرشی پیرۆزباھییێن ئالایێ کوردستانێ کر و ئالایێ کوردستانێ شەوتاند. ل رۆژھلاتا ناڤین سێ ھێز ھەنە کو ئالایێ کوردستانێ دشەوتینن. ترکیا، حەشدا شەعبی و پەکەکە. بێرێزییا ترک و عەرەب و فارسا بۆ ئالایێ کوردستانێ دهێتە فامکرن، ئەو دوژمنێن کورد و کوردستانێ نە، لێ کا پەکەکە یا کو خوە وەکە پارتییەکا کوردستانی بناڤ دکەت چما بێرێزیێ بەرامبەر ئالایێ کوردستانێ دکەت قەت ناهێتە فامکرن. پەکەکە پتر ژ دەولەتێن داگیرکەر دژمنا ئالایێ کوردستانێ یە. ژ بۆ ڤێ ژی رەخنەکرنا پەکەکێ یا ل سەر ئالایێ کوردستانێ یا بێ رامانە و پێکەنۆکەک زێدەتر نینە.
