بالیۆزێ ئوکراینایێ ل بریتانیایێ گۆت، دبیت کو وەلاتێ وی دهست ژ هەولدانا خوە یا ژ بۆ تەڤلیبوونا رێخستنا پەیمانا ئاتلانتیکا باکور (ناتۆ) بەردەت، دا کو شەر دگهل رووسیایێ چێنبهیت.
بالیۆز ڤادم پریستاکۆ گۆت: «ئوکراینا ئامادەیە ل سەر ئارمانجا خوە یا ئهندامبوونا د ناتۆیێ دا و یا كو رووسیا ل دژی وێ یه، “نهرمیێ” نیشان بدەت».
پریستاکۆ د بەرسڤا پرسەکێ دا کو ئهرێ وەلاتێ وی هەلوێستا خوە ل دەربارێ ئەندامبوونا د ناتۆیێ دا گوهەرتییە یان نا، پریستاکۆ گۆت: «دبیت کو ئەم بکهین… ب تایبەتی پشتی کو ئەم ب ڤی ئاوایی راستی گهف و زهخت کرنێ هاتین».
ئوکراینا، کو نە ئەنداما ناتۆیێ یە، ژ سالا 2008ێ ڤە سۆز پێ هاتییە دان کو ئەوێ دەرفەت ژ بۆی ئهندامبوونێ ههیه، کو ئەڤ یەک دێ ڤێ ههڤپهیمانییا كو ئهمهریكا پێشەنگییا وێ دكهت، ئینیته سەر سنۆرێن رووسیایێ.
ئامەریکا و وەلاتێن رۆژئاڤا رووسیا ب ئامادەکرنا هێرشهكا لەشکەری ل سەر ئوکراینایێ تۆمەتبار دکهن، مۆسکۆ ژی چەند جاران ئەڤ یەک رەد کرییە.
مۆسکۆ داخوازا گارانتیێ دکەت کو ناتۆ بەر ب رۆژهلات ڤە بەر ب سنۆرێن وێ ڤه نههێت و بنگەهێن لەشکەری یێن ناتۆیێ ل کۆمارێن یەکیتییا سۆڤیەتا بەرێ نههێن ئاڤا كرن.
