په‌رله‌مانتارێ ھەدەپێ تەییب تەمەل، ل تویتەرێ خوه بێرێزیێ ب «بارزانی» دكه‌ت، وه‌لاتپه‌روه‌رێن كورد ژی كاڤه‌دانێن مه‌زن نیشان دان، ژ به‌ر ڤێ ئه‌و پشتره هات و ئیدیعا كر كو ئه‌كاونتێ وی هاتییه هاككرن!.
په‌رله‌مانتارێ ھەدەپێ یێ وانێ «تەییب تەمەل» به‌ری دو رۆژان ل ئه‌كاونتێ خوە یێ تویتەری به‌رسڤا تویتا وه‌لاتییه‌كی دابوو و وەھا گۆتبوویێ:
«دێ ھەرە خایینێ خوە فرۆش و کووچکێ بارزانیێ خولامێ ئەردۆگان، ئەو د هزرێن ئۆجالان دا ئازادیێ دبینن».
ل سەر ڤێ شرۆڤەیا تەییب تەمەل، ژ ئالیێ بکارھێنەرێن مەدیایا جڤاکی ڤە کارڤەدانێن مەزن ھاتن نیشاندان، ل سەر ڤێ یەکێ تەییب تەمەل دیار کر کو ئه‌كاونتێ وی یێ تویتەری، بەری دەمژمێرەکێ هاتبوو هاککرن و ل سەر ئه‌كاونتێ خوە یێ تویتەرێ گۆت: «فاشیستان دەمەکێ کورت ئه‌كاونتێ من هاککربوو، داخویانیێن ل دژی کوردان ھاتن به‌لاڤ كرن، لێ مە ئه‌كاونت جارەکا دی وەرگرتەڤە»، لێ به‌لێ بکارھێنەرێن مەدیایا جڤاکی باوه‌ر ژ ڤان ئاخفتنێن تەییب تەمەل نەکرن و ئەو ب «سەختەکار» دەستنیشان کرن.
ئه‌كاونتێن پاراستی یێن «نیشانه‌یا شین» هەیی گەلەک ب زەحمەت دهێنە هاککرن
په‌رله‌مانتارێ وانێ تەییب تەمەل، ئه‌كاونته‌كێ پاراستی و ب نیشانه‌یا شین «ڤێریفای» كری ب کار دینیت، ئه‌كاونتێن وەسا گەلەک زەحمەتە بهێنه هاک كرن، ئەڤجا چاوا تەییب تەمەل ئیدیعا دکەت كو ئه‌كاونتێ وی ژ ئالیێ کۆمەکا فاشیستان ڤه ب ھێسانی هاتییە هاککرن، هه‌گەر ئه‌كاونت ژ تێلەفۆن یا كۆمپیۆته‌ره‌ك دی بهێتە ڤەکرن، یه‌كسه‌ر ئه‌و ئه‌كاونت دکەڤیتە د بن پاراستنا کۆمپانییا تویته‌ری ب خوه ڤه، وەکێ دی، د جھ دا ئاگەهداری ژ بۆ خۆدانێ ئه‌كاونتی دهێتە هنارتن، یێ كو سۆسیال مه‌دیایێ ب كار دئینیت، ڤێ چه‌ندێ باش دزانیت!.
ھاتە دیار کرن کو ژ ئەنجاما کارڤەدانێن ل سەر وێ تویتا کو تەییب تەمەل نڤیساندییە و ژ بۆ کو بوویەرێ پەردەپووش بکەت، وی دەست ب دەرەوان کر و گۆت: «ئه‌كاونتێ من ھاتییە دزین»!! كورد و وه‌لاتپه‌روه‌رێن کو کارڤەدان نیشانی تەییب تەمەل دایی گۆتن: تەییب دو-سێ ئه‌كاونتێن درەو – ڤه‌شارتی ھەنە، ئەوی نەدزانی کو وی ل سەر ئه‌كاونتێ خوە یێ فەرمی بێرێزی ب نرخێن کوردان کرییە، پشتی زانی کو ئەڤ بێرێزی ل سەر ئه‌وكاونتێ وی یێ فەرمی هاتینه به‌لاڤ كرن ژ نوو گۆت «ئه‌كاونتێ من ھاتییە هاک کرن.«
ھەر کەس دزانیت کو تەییب تەمەل ئه‌كاونتێن زێدە و سه‌خته ب کار دئینیت و وی دڤییا د وی ئه‌كاونتی دا کو کەس نانیاسیت بێ رێزیێ بکەت و یا د دلێ خوە دا دیار بکەت، لێ ب شاشی ڤه وی ئه‌و بێرێزی د ئه‌كاونتێ خوە یێ فەرمی دا نڤیسی و به‌لاڤ کر، تەییب تەمەل ب ئه‌كاونتێن خوە یێن سه‌ختە تشتێ د ناخێ خوە دا ڤەشارتی دنڤیسیت، لێ به‌لێ خەلەتییەکێ راستییا تەییب ئیفشا کر و کەسایەتیا وی یا درەوکەر رائێخست بەر چاڤان.
کوردان پرسی یه: گەلۆ تەمەل دکاریت بانگا یەکیتییا نەتەوه‌یی ژ کوردان بکەت؟
تشتێ کو تەییب تەمەل، د ئه‌كاونتێ خوە یێ فەرمی دا ب شاشی ڤه نڤیساندی، هزرێن تەمەل و خەتا سیاسی یا کو ئەو پێ ڤە گرێدایی یە ئاشکەرا دکەت، ژ بەر ڤێ سەدەمێ بانگێن وان یێن ژ بۆ «یەکیتییا نەتەوه‌یی و نرخێن کوردستانی» ھەموو درەون و ژ راستییا وان یا سیاسی دوورن .
ھەروەھا ب ڤێ نڤیسا تەییب تەمەل راستییەکا دی ئاشکەرا بوو، ئەو ژی ئەو بوو کو په‌رله‌مانتار و کادرۆیێن پەکەکێ ب ئه‌كاونتێن نەفەرمی گەف و سڤکاتیێ ب نرخ و کەسایەتیێن کوردستانی دکەن.
ته‌ییپ تەمەل کی یە؟
تەمەل کو ب ئەسلێ خوە ژ جۆلەمێرگێ یە، د داوییا سالێن 1990ێ دا تەڤلی پەکەکێ بوویە، پشتی کو ژ زانینگەھێ ھاتییه ده‌رێخستن، پەکەکێ ئەو وەزیفەدار کر کو بەشداریێ د چالاکیێن ل ترکیێ دا ببیت.
تەییب تەمەل، ژ سالا 2000 و هێرڤە د ناڤا خەباتێن جوانێن پەکەکێ، سازییا زمانێ کوردی و چاپەمەنیێ دا كار كرییه و د ناڤا سەرکردایەتییا ترکیێ یا پەکەکێ دا ئه‌رك وه‌رگرتینه، نھا وەک نوونەرێ پەکەکێ یه د ناڤا ھەدەپێ دا، پەیوەندیێن د ناڤبەرا په‌رله‌مانتارێن ھەدەپێ و پەکەکێ دا ب رێیا تەییب تەمەل دهێنە رێكئێخستن.
مالپەرێ «دارکا مازی» ب رێیا خەباتکارێن ھەدەپێ ھندەک زانیاری ل دەبارێ تەییب تەمەل وەرگرتینە، ل گۆر وان زانیارییان ھاتە دیار کرن ژ بەر کو تەییب تەمەل زێدە یێ توندە و هەردەم گڤاشتنان ل سەر په‌رله‌مانتاران دکەت، لایەنگرێن ھەدەپێ زێدە حەز ل وی ناکەن، هەروەها هاتە دیار کرن کو تەمەل، ب تایبەتی پشتی کو برایێ وی ژ پەکەکێ ڤەقەتیایی و بەری سالەکێ خوه تەسلیمی ترکیێ كری، ژ بۆ کو خوە بۆ پەکەکێ ئیسبات بکەت، ب ڤی رەنگی سەرەدەریێ دکەت.
سڤکاتیێن تەییب تەمەل ل تەڤگەرا بارزانی یا کو ئەڤە زێدەتری 100 سالانە بوویە سەمبۆلا تێکۆشینا کوردان، گەلەک بالکێشە، تەییب تەمەل ژ بۆ ترکێن فاشیست بانگا براتی و بھەڤراژیانێ دکەت، لێ بێرێزی و ئاخفتنێن کرێت دەربارێ نرخێن نەتەوەیا کورد دکەت، راستییا تەییب تەمەل د کۆمێنتا وی یا د تویتەرێ دا دیارە.
