پارتییا ئازادییا کوردستانێ (پاک) پارتیا سۆسیالیستا کوردستانێ (پەسەکە) و تەڤگەرا دەمۆکراتیکا کوردستانێ (تەدەکە-تەڤگەر) ب بۆنەیا ھاتنا جەژنا نەورۆزێ پەیامەکا پیرۆزباھیێ بەلاڤ کرن.
پەیاما پاک، پەسەکێ و تەڤگەرێ یا بۆنا نەورۆزا 21ێ ئادارا 2022یێ وەھایە: وەرن ئەم ب ھەڤ را ئاگرێ نەورۆزێ ژ بۆ یەکتی، ھەڤکاری و یەکرێزیێ گەشبکن!
مەھا ئادارێ ب رۆژێن شاھی و کێفخوەشی و ھەروەھا ب رۆژێن دلتەزین و کۆمکوژییان ڤە، د دیرۆکا کوردستانێ دا خوەدییێ جھەکێ گەلەک گرینگ و تایبەتییە. کورد و کوردستانی نەورۆزێ ژ ئالییەکێ وەکە جەژنا سەرسالێ و ھاتنا بوھارێ، ژ ئالییەکی دن ژی وەکە رۆژا سەرھلدان، بەرخوەدان و تەکۆشینا ژ بۆ ئازادی و سەرخوەبوونا کوردستانێ پیرۆز دکن.
بێگومان پیرۆزکرنا نەورۆزێ یا ب ڤی ئاوایی، داگیرکەرێن کوردستانێ دترسینیت. ئەو ژ ئالییەکی پیرۆزکرنا نەورۆزێ قەدەغە دکەن؛ ژ ئالییەکێ دن ژی ھەول ددەن کو نەورۆزێ ژ ئارمانج و ناڤەرۆکا وێ یا سەرەکی ب دوور بێخینن. لۆما ژی ئەو رۆژا نەورۆزێ ب ناڤەرۆکێن چێکرییێن بێواتە پیرۆز دکن. ئەو باوەر دکەن کو دێ ب ڤی ئاوایی بکاربن نەورۆزێ ژ ناڤەرۆکا وێیا دیرۆکی ب دوور بخینین؛ تین و تەسیرا وێ یا ل سەر ھەستێن نەتەوەیی ژار و ھەژار بکن. لەوما ژی ئەم گەلەک گرنگ دبینن کو ملەتێ کورد و کوردستانی جەژنا نەورۆزێ ب روحەکا نەتەوەیی و ناڤەرۆکا خوەیا دیرۆکی پیرۆز بکەن.
دڤێت ئەم نەورۆزێ، ب ئارمانجا ل دژی داگیرکەری و زۆرداریێ و وەکە سەمبۆلا بەرخوەدانا نەتەوەیی و ئازادییێ پیرۆز بکەین. دڤێت ئەم ئاگرێ نەورۆزێ وەکە قادەک گرینگیا خەبات و تێکۆشینا ل دژی داگیرکەری، ئینکار و ئاسیمیلاسیۆنا ل سەر ملەتێ کورد و کوردستانییان پێتر گەش و گور بکن.
ئیرۆ ل باشوور و رۆژئاڤایێ کوردستانێ، ملەتێ کورد و پێکھاتەیێن کوردستانێ جەژنا نەورۆزێ ب ئاواکی ئازاد پیرۆز دکەن. لێ ل باکورێ کوردستانێ، ملەتێ کورد ھێ ژی نکاریت ب ئاوایەکێ ئازاد ڤێ جەژنا خوەیا نەتەوەیی ل گۆری ناڤەرۆکا وێ یا دیرۆکی پیرۆز بکەت. کاربدەستێن دەولەتێ ب قەدەغەکرن و ئاستەنگان ھەول ددەن کو رێ ل بەر پیرۆزکرنا نەورۆزێ بگرن، یان ژی ڤێ رۆژا پیرۆز شۆلی بکەن. لێ ئەو چ دکەن بلا بکەن، داگیرکەرێن کوردستانێ نکارن د ڤێ سیاسەتا خوە دا سەر بەکەڤن؛ ئاگرێ نەورۆزێ دێ ل ھەر چار ئالییێن کوردستانێ ھەر گەش و بلند ببیت.
د ڤێ پێڤاژۆیا کو زمانێ کوردی ب جئنۆسایدا ئاسیمیلاسیۆنێ روو ب روویە، دڤێت ئەم ب تایبەتی ھەول بدەین کو نەورۆزێ ب کوردی پیرۆز بکەین. دڤێت ئەم ھەول بدەین کو ڤێ جەژنا نەتەوەیی ژ بۆ گەشکرنا خەبات و تێکۆشینا زمانێ کوردی ژی بکەینە قاد و دەرفەتەک گرینگ. ھەروەھا دڤێت ئەم ڤێ رۆژێ بکەینە پلاتفۆرمەک ھەڤبەش و گرسەیی یا ژ بۆ بدەستخستنا مافێن نەتەوەیی، جڤاکی و چاندی.
کوردستانیێن ھێژا! داگیرکەرێن کوردستانێ ئێدی وەکە بەرێ نکارن سەروەرییا خوە ل کوردستانێ بمەشینن. ھەلوەستا ھێزێن ناڤنەتەوەیی، گوھەرینێن ل دنیایێ و رۆژھەلاتاناڤین، دەرفەتێن دیرۆکی رادەستی ملەتێ کورد دکەن و زەمینا تەکۆشینا ژ بۆ سەرخوەبوون و ئازادییا کوردستانێ بەرفرەھتر و ب ھێزتردکن. ئەڤ کێس و دەرفەت د رۆژەڤا کوردستانێ دا بوویە دیاردەیا سەرەکە؛ لێ د ھەمان دەمێ دا، گرینگیا یەکتی، ھەڤکاری و یەکرێزیا نەتەوەیی یا ملەتێ کورد و کوردستانییێن ڤی بەشێ کوردستانێ ژی بێتر دەردخینە پێش. دڤێ ئەم باش بزانین کو ملەتێ کورد تەنێ ب یەکیتی، ھەڤکاری و یەکرێزیا نەتەوەیی دێ کاریت دەستکەفتیێن خوە پارێزیت و ژ بۆ ئازادی و سەرخوەبوونا کوردستانێ پێنگاڤێن بریاردێر باڤێژیت.
باکورێ کوردستانێ د پێڤاژۆیەکا گەلەک تایبەتی و مەترسیدار دا دەرباس دبیت. ئەڤ رەوشا وەزیفەیێن تایبەتی دەردخیت پێشیا مە. دڤێت پارتی، رێخستن و تەڤگەرێن نەتەوەیی و کوردستانی رۆژەک بەری رۆژەکێ ل سەر ئارمانج و داخوازێن بلەز و ھەڤبەش بێنە با ھەڤدوو و د ڤی واری دا گاڤێن پێویست باڤێژن. ئەڤە وەزیفەیەک نەتەوەیی و دیرۆکییە. دڤێت ئەم ھەولدانێن یەکتی، ھەڤکاری و یەکرێزیا نەتەوەیی گەش بکەین؛ پاراستن و ڤەژاندنا ھشمەندی و دەستکەفتیێن نەتەوەیی بێتر دەرخینن پێش. بژی سەمبۆلا بەرخوەدان و تەکۆشینا ئازادی و سەرخوەبوونێ نەورۆز!
بژی یەکرێزیا نەتەوەیا کورد و کوردستانییان!
21ێ ئادارا 2022
– پارتییا ئازادییا کوردستانێ (پاک)
– پارتیا سۆسیالیستا کوردستانێ (پەسەکە)
– تەڤگەرا دەمۆکراتیکا کوردستانێ (تەدەکە-تەڤگەر)
