ئەڤ دەمەکە، وەکە هەرسال ل دەستپێکا بهارێ مەدیایا پەکەکێ و رێخستنێن سەر ب وێ ڤە دەست ب سەرڤیسکرنا دەرەو و نووچەیێن سەختە و دوور ژ ئەخلاق کرنە، مەدیایا پەکەکێ ب ئاوایەکی پڕ بێ ئەخلاق و دوور ژ چاندا کوردی دخوازە ب ڤەهاندنا دەرەوان زەمینەیەکێ ژ بۆی ئێریشا خوە یا د بهارێ دە بۆ سەر هێزێن پێشمەرگەیێن کوردستانێ و ستاتویا باشوور چێبکە. ژ بۆ ڤێ یەکێ ژی نە پەکەکە و نەژی مەدیایا وێ خوە ژ ت دەرەوان نادن پاش.
هەری داوی جەمیل بایک د دو داخویانیێن کو ژ بۆی پیرۆزباهیێن نەورۆزێ ل ئالمانیایێ و ل قەندیلێ دابوون دە، ب ڤەهاندنا هن دەرەوان دەستپێکر و راگهاند “ترکیە ب ئالیکاریا پەدەکێ دخوازە ئێریشێ گەریلایان بکە”، ئەڤ دەرەوا بایک هەرسال دوبارە دبە، لێ ئیسال ژ سالێن بەرێ پێتر تێ باسکرن، ئەڤ ژی مەترسیا ڤێ دەرەوێ و خواستەکا پەکەکێ یا ژ بۆی ئێریشا ل سەر دەستکەفتیێن باشوور پێتر روونی دکە. پشترە پەکەکێ ل سەر ناڤێ «کەجەکێ» هەمان دەرەو دوبارە کر و د داخویانیەکێ دە تەکەزی ل سەر ئاخافتنا «جەمیل بایک»ێ هەڤسەرۆکێ خوە کر، پشترە ئاژانسا فەرمی یا پەکەکێ کو ژ دەرڤەی دەرەوێن پەکەکێ ت تشتەک دن پارڤە ناکە د نووچەیەکە سەختە دە ب ئاوایەک نوو ئەڤ دەرەو دوبارە کریە، شیرۆڤەکارێن سیاسی ژی دبێژن پەکەکێ تەڤ مەدیایا خوە سەفەربەر کریە کو زەمینەیەک باش ژ بۆی ئێریشا وان یا ل سەر باشوورێ کوردستانێ ئاڤا بکن.
ب ڤان دەرەوان پەکەکە دخوازە چ بکە؟
بەرا ئەنجامدایینا هەر کارەکی پەکەکە ب رێیا چاپەمەنی و قەلەمشوورێن خوە یێن د مەدیایا جڤاکی دە ب نڤیساندنا هن دەرەوان زەمینەیەکی ژ بۆی ئامادە دکە، پشتی کو پەکەکە ڤێ یەکێ دکە لێ دنێرە کا وێ بەرتەکا گەل چ بە، گەر هات و گەل باهوەر ب دەرەوا پەکەکێ کر وێ بێی یەک و دو پەکەکە وی کاری ئەنجام بدە گەر بزانبە وێ ب ئەنجامدایینا وی کاری تەڤ کوردستان د خوینێ دە نقوم ببە ژی، تشتا کو پلانا قرێژا پەکەکێ یا ئیسال ژ سالێن دن جودا دکە ئەڤە کو ئیسال پەکەکە ب ئاوایەک ڤەکری باس ل ئێریشێ دکە و سەناریۆیا کو ژ بۆ ئێریشێ دروست کری ژی دخوازە بکە پاخلا پەدەکێ.
ئانەفێ چ گۆت؟
ئانەفێ د نووچەیەکی دە راگهاند، : “ئەڤ دەمەکە، ھەم مەدیا باشوورێ کوردستانێ ھەم ژی چاڤکانیێن ھەرێمی رادگھینن کو ئارتێشا ترک ب بەشداریا پەدەکێ وێ د دەمەکە نێز دە ل دژی قادێن گەریلا دەست ب ئێرشەکە نوویا ژ بۆ داگیرکرنێ بکە.” ژ بۆی تەکەزکرنا ڤێ دەرەوا خوە ژی «ئانەفێ» داخویانیا «کەجەکێ» و چاڤکانیێن نەناسکری و مەدیایا باشوور وەک چاڤکانی دان نیشاندان، لێ ب ت ئاوا باس ل چاڤکانیێن خوە و وان مەدیایێن باشوورێ کوردستانێ نەکر یێن کو ئاگاهیەکە ب ڤی ئاوا پارڤە کربە، چما!؟ ژ بەر کو ژ دەرڤەی مەدیایا سەر ب پەکەکێ ت یەک ژ مەدیایێن دیار یێن باشوورێ کوردستانێ ئاگاهیەک ب ڤی ئاوا پارڤە نەکریە، هەر کەس دکارە ل چاپەمەنیا باشوور بنێرە و ڤێ دەرەوا پەکەکێ ئیفشا بکە.
تشتا هەری بالکێش ئەڤە کو تەڤ مەدیایا پەکەکێ «ANF»ا کو راستەراست ب قەندیلێ ڤە گرێدایی یە وەکە چاڤکانی دایە ناساندن و وان ژی دەرەوێن خوە ب پشتبەستن ب ڤێ دەرەوا ANFێ ڤەهاندنە.
ئانەفێ د نووچەیا خوە یا سەختە دە گۆتیە، “د ئەنجاما تەقینەکێ دە وێ 3 ئەفسەرێن بەرپرسیار بێنە کوشتن. ژ ڤان 3 کەسان یەک ژێ ئەفسەرێ پاراستنێیە کو ل ماسەیا PKKێ دخەبتە، ئەفسەرێ دویەمین ژی ژ ھێزێن زێرەڤان بەرپرسیارە.” گەلۆ کەسێ سێیەم کییە کو چاڤکانیێن ANF باس نەکری چما باس ل پلەیا دو کەسان تێ کرن لێ پلەیا کەسێ سێیەمین نایێ زانین؟! گەلۆ کەسێ کو ل گۆر نووچەیێ ئانەفێ د ناڤا پەدەکێ دە ئاگاهی ب وان دانە چەوا دکارە پلەیا دو کەس ژ سێ کەسێن کو بریارە د تەقینێ دە بێن کوشتن دزانە لێ ناڤێ وان و پلەیا کەسێ سێیەمین نزانە؟! ژ بلی مەژیکێ پووچ یێ فەساد و بێ بەختێن ANF مەژیکێ کێ دکارە ڤێ دەرەوا ب شاخ قەبوول بکە؟! گەلۆ کی دکارە ئاگاهیێن ئەڤقاس هەستیار ژ ANF رە ببێژە لێ نەکارە ناڤێ وان رایەداران ئەشکەرە بکە؟! ب کورتی چاڤکانیێن کو ANF قالا وان دکە ژ بلی کەجەکێ و جەمیل بایک ت کەسێن دن نینە.
راستی چییە؟
وەکە شرۆڤەکارێن سیاسی دبێژن، پەکەکە دخوازە ب ڤان دەرەوان کارێن خوە یێن پرۆڤاکسیۆن و ئێریشا خوە یا نەرەوا یا کو بریارە بهارێ ل سەر باشوورێ کوردستانێ بێ ئەنجامدایین رەوا بکە. شرۆڤەکارێن سیاسی ددن خویا کرن کو یا راستئەڤ پلانا پەکەکێ ب خوەیە و دخوازە د بهارێ دە ئێریشی پێشمەرگەیێن کوردستانێ بکە و هن ژ رایەدارێن باشوور ژی تەرۆر بکە، ژ بەر ڤێ یەکێ ب پارڤەکرنا نووچەیێن دەرەو یێن ب ڤی ئاوا دخوازە روویێن خوە یێن رەش سپی بکە و دەما ئەڤ کاری ژی ئەنجام دا پەدەکێ پێ تاوانبار بکە. ووسا تێ تەخمین کرن کو پەکەکە هن رایەدارێن دن یێن باشوورێ کوردستانێ مینا “غازی سالح ئالیخان” رێڤەبەرێ ئاساییشا دەریێ سینۆری یێ “سەرزێرێ” تەرۆر بکە، پشترە ببێژە پەدەکێ ئەو کوشتنە و دخوازە پەکەکێ پێ سووچبار بکە لۆما ب ڤی ئاوا تەڤ مەدیایا خوە سەفەربەر کریە دەرەوێن بەردەوام دوبارە بکن داکو بکارن زەمینەیەک باش ژ بۆی ئێریشا پەکەکێ ساز بکن و ل دەما تەرۆرکرنا رایەدارێن باشوور خوە وەک بێ تەوان نیشان بدن.
د بەشەکە دن یا دەرەوا خوە دە ئانەفێ راگهاندیە، “پەدەکێ ئەڤ پلان دانیە:
1- کوشتنا ھن پێشمەرگەیێن پەدەکێ
2- تەقاندنا بۆریا پەترۆلێ یا ژ باشوورێ کوردستانێ دچە ترکیەیێ
3- ل وێ ھەرێمێ تەقاندنا وەسایتەکێ کو سڤیل تێ دە نە.
لێ هەر کەس دکارە ب بیرئانینا بوویەرێن سالا پار ڤێ دەرەوا پەکەکێ ئیفشا بکە، د سالا بۆری دە پەکەکێ هەم پێشمەرگەیێن کوردستانێ شەهید کرن، هەم لوولیا پەترۆلێ یا ژ باشوور دچە ترکیێ د ناڤا ترکیێ دە تەقاند و بەرپرساتیا وێ ژی گرتە سەر خوە، هەم ژی وەسایتێن پێشمەرگە ل مەتینا و هەرێمێن دن تەقاندن. ب کورتی پەکەکە ب ڤێ دەرەوا کو د ئانەفێ دە پارڤە کری دخوازە کارێن خوە یێن تەرۆریستی کو پلان کریە د بهارێ دە ل باشوورێ کوردستانێ ل دژی پێشمەرگەیێن کوردستانێ و گەلێ کورد دەست پێ بکە بپەچنە داکو ل دەما ئەنجامدایینا وان کارێن قرێژ ژ ئالیێ گەل ڤە نەیێ رەخنەکرن، لێ بلا پەکەکە باش بزانبە کون ژ پاتە مەزنترە و گەل هشیارە، ئێدی ت کەسەکی مەژیکی وی کار بکە ب دەرەوێن پەکەکێ نایێ خاپاندن.
