نەتەوەیێن یەکبوویی راگه‌هاند کو زێدەتری 4.1 ملیۆن ئوکراینی نەچار مانە وەلاتێ خوە بهێلن، پشتی کو رووسیایێ ل 24 سباتێ دەست ب هێرشا سه‌ر ئۆكراینا كری.
کۆمیسەرییا بلند یا پەنابەران یا نەتەوەیێن یەکبوویی هه‌ژماره‌كا نوو دە کو ئیرۆ شەمبیێ هاتییه به‌لاڤ كرن، پشتراست کر کو هەژمارا پەنابەرێن ئوکراینا ژ دەستپێکا ئۆپەراسیۆنا لەشکەری یا رووسیا، گه‌هشتییە چار ملیۆن و 137 هەزار و 842 کەسان.
هه‌روه‌ها دیار کر کو %90ێ ژ ڤان پەنابەران ژن و زارۆکن.
ژ ئالیێ خوە ڤە، رێخستنا ناڤدەولەتی یا کۆچبەریێ تەکەز کر، نێزیکی 205 هەزار و 500 کەسێن بیانی یێن کو ل ئوکراینا کار دکه‌ن یان ژی دخوینن، ئۆكراینا بجهـ هێلاینه.
ب ڤێ یەکێ هەژمارا گشتی یا کەسێن کو ژ بەر شەر و پەڤچوونان نەچار مان مالێن خوە ل ئوکراینا بهێلن گه‌هشت زێدەتری 10 ملیۆنان، ئانكو چاریەکا وەلاتیێن وی وەلاتی.
ل گۆری داتایێن نەتەوەیێن یەکبوویی، 60% ژ هەژمارا گشتی یا پەنابەران كو دبنه 2.4 ملیۆن كه‌س چووینە پۆلۆنیا، هه‌روه‌ها 630 هه‌زار چووینه رۆمانیا، مۆلدۆڤا 391 هه‌زار، مه‌جه‌رستانێ 380 هه‌زار و هه‌روه‌ها 350 هه‌زار ژی چووینه رووسیا.
