د ناڤا کوردان دا چ هێز، پارتی و کەسەکێ ب قاسی پەکەکێ دەربە ل کورد و کوردستانێ نەدانە، پەکەکێ و رێبەرێ وێ دربەیەک ئەوقاس گران ل کوردان خستیە کو چ هێزەکا دن نەکاریە ڤێ یەکێ بکە، لێ ژ بەر کو پەکەکە مینا پارتیا «نازی» یا ئالمانیایێ یە و وەکە وێ خوەدی مەدیا و چاپەمەنیەک بهێزە هەیا نها کاریە پرانیا خیانەت و دژایەتیێن خوە و رێبەرێ خوە ل دژی کوردستانێ ڤەشێریت و ووسا بدەتە خوەیا کرن کو ئەو ژ بۆی کوردستانێ د شۆرەشەکێ دا نە.
پەکەکێ ب رێیا چاپەمەنیا خوە کاریە چاڤێن ئالیگرێن خوە ل همبەر راستیان تاری بکەت، رۆژانە ب پارڤەکرنا نووچەیێن دەرەو گەلێ کورد ب گشتی و ئالیگرێن خوە ب تایبەتی چەواشە دکەت، پەکەکە د ڤێ مژارێ دا ب ئاوایەکێ شاهرەزایە کو کاریە تەڤ هەلوەست و داخویانی و گۆتنێن رێبەرێ خوە یێن ل دژی کوردستانێ و د بەرژەوەندا دەولەتا داگیرکەر یا ترکیێ دا ژی ژ بیرا وان ببەت و ووسا ب وان بدەتە باوەر کرن کو «ئۆجالان» ب ئاخافتنێن خوە سیاسەتێ دکەت و کوردان دپارێزیت.
پەکەکێ ئالیگرێن خوە ب ئاوایەکێ چەواشە کرینە کو ئەو ژ بۆی دیمەنێن ڤیدیۆیی یێن دانپیدان و داخویانیێن ئۆجالان ژی دبێژن، “ئەڤە نە راستە، ئەڤ دیمەنە مۆنتاژن، سەرۆک ب ڤی ئاوا نائاخڤیت، ئەڤە پرۆپاگاندایا دەولەتێ یە و هتد….” لێ کەسێ کو پیچەکێ مەژیک هەبیت دێ کاریت راستیێ ژ دەرەوێ جودا بکەت و زانیت ئۆجالان د وان ڤیدیۆ و دانپیدانان دا گەلەک ژ دل نێزیکی دەولەتێ دبیت، ئەڤە ژی ب تەنێ دا کو خوە بپارێزیت.
پشتی ڤەگەرا «ئۆجالان» بۆ ترکیێ د 1999ێ دا، د یەکەم دیمەنێن ڤیدیۆیی دا «ئۆجالان» هات دیتن دەما د بالەفرێ دا دبێژیتە ئەندامەکێ میتێ، “دایکا من ژی ترکە، ئەز ژ بۆی خزمەتا ترکیێ ئامادەمە، دەرفەتێ ب من بدەن”، پشترا ل دادگەهێ ب قاسی “شەمدین ساکک” ژی ل بەر خوە نەدا و دانپیدانێن ئەو قاس خەتەر کرن کو خەتەری ئێخستە سەر جانێ ب هەزاران گەریلا و کادرۆیێن پەکەکێ، ناڤێ تەڤ کەسێن ئالیکاریا پەکەکێ کرین وەکە «ھالیس تۆپراک، عەلی رزا سەپەتۆگلوو، بەھجەت جانتورک، جیھانگیر ئاغا، حەیدەر ئابابا، ھالوق گەرگەر، پارێزەر شەرفەدین کایا، پارێزەر سەرهات بوجاک، ئیبراهیم تاتلیسس، فەرھات توونچ، ئەحمەد کایا، شڤان پەروەر و هود…» دان دەولەتێ، ناڤێ تەڤ کادرۆیێن پەکەکێ یێن پایەبلند مینا «عۆسمان ئۆجەلان، سینان، مەزلووم عەبدی، کانی یلماز، جومعا، فەرھاد، ئەبوبەکر، عەباس، ماھیر، زەکی، عیسا، فوئاد، ناسر، جەمال، فەلات و مستەفا قاراسوو، باھۆز، ئەبووبەکر، و هود… » و جهێ وان دان دەولەتێ، ئۆجالان هیچ زانیاریەک نەما د ناڤا پەکەکێ دا کو ب دەولەتێ نەدایی، لێ دیسا ژی پەکەکێ ب رێیا مەدیایا خوە کاری ئالیگرێن خوە چەواشە بکەت و ڤان راستیان ل بەر چاڤێن وان شوولی بکەت و وەکە دەرەو نیشان بدەت.
ئەم د ڤێ نڤیسێ دە باس ل تەڤ ئیتیرافێن ئۆجالان ناکن، ژ بەر کو نە ب تەنێ مەقالەیەک بەلکو ب هەزاران مەقالە و پرتووک تێرا ناکن کو مرۆڤ ئیتیرافێن ئۆجالان و خیانەتا وی ل همبەر کوردان تێدە جی بکە، د ڤێ نڤیسا خوە دە ئەمێ باس ل یەک ئیتیرافا ئۆجالان بکن دەما باس ل دەمۆکراسیەتا دەولەتا ترکیێ، دەردێ کوردان، پرسگرێکا کوردان، و چەوانیا چارەسەریا وێ دکە، ئەم ت تشتەکی ل سەر نابێژن ب تەنێ ئەمێ گۆتنێن وی وەک وی گۆتێ ژ وە رە بەرچاڤ بکن، ئۆجالان دەربارا ڤان مژاران ب ڤی ئاوا دپەیڤە؛
“من د ژیانا خوەیا درێژ د ناڤا رێخستنێ دا دیت کو ئازادییا کوردان د ناڤا ترکییایێ دا چێدبیت. ل گۆری من دەردێ کوردان نە ئەوە دەولەتەکا جودا ئاڤا بکەن. فەدەراسیۆن و ئۆتۆنۆمی ژی نە چارەسەرینە. چارەسەرییەکا ژ فەدەراسیۆن و ئۆتۆنۆمیێ پێشکەفتیتر سیستەما دەمۆکراتک بخوەیە. ل ترکیایێ ئەڤ سیستەمە بنەجهە، مافێن کوردان یێن سییاسی ھەنە، پشتی سالێن 1990ێ مافێن کلتووری ژی ھاتن پێشخستن. ئەڤ مافە ھێژ ژی بەردەوامن. رۆژنامەیا کوردی دەردکەڤیت، ئەنستیتویا کوردی ھاتە دامەزراندن، حیزبەکا کوردان یا کو دەنگێن خوە ددەنێ ژی ھەیە. ئەڤە ھەموو دییار دکەن کو د ناڤا ترکیایێ دا مافێن کوردان یێن دەربرین کرنێ ژ خوە پێشکەتینە. ب ڤان میناکان ئەز دخوازم ڤێ ئیسپات بکەم. ل ترکیێ کێشەیا کوردان د ناڤا سیستەما دەمۆکراتیک دا دێ چارەسەر بیت. کورد ب ئازادانە دەربرینێ ژ خوە بکەن ژی دهێتە وێ واتەیێ کو پێشڤەچوون ھەیە. گاڤا ل ھەموو ترکیایێ دەمۆکراسی پێشکەت دێ کورد ژی مافا ژێ وەرگرن. د بنگەھ دا کورد بەرییا کۆمارا ترکیێ بهێتە دامەزراندن و پشتی دامەزراندنا کۆمارێ ژی ھەڤپشکن د دامەزراندنێ دا.
من فێمکر کو بەرنامەیێن من یێن دەسپێکێ خەیالی بوون. چ نرخێن بەرنامەیا سییاسی و پۆلیتکایا پەکەکێ نینە. من ناڤێ کوردستانێ وەکە پەیڤ بکار ئانی. من ناڤێ (کوردستانێ) وەک جوگرافیا دەست گرت. نەئاڤابوونا دەولەتا کوردی ب زانستی ژی راستییەکە و پێویستی ب دەولەتا کوردی ژی نینە. د ناڤا دەولەتا ترکییێ دا د ناڤا دەمۆکراسیێ دا مرۆڤ دکاریت ھەر تشتەکێ پێکبینیت. ئەز گەهشتم ڤی ئەنجامی.”
بەلێ، ئەڤە ئاخافتنێن وی کەسینە کو پەکەکە ب رێبەرێ گەلێ کورد و ددەتە ناساندن، ئەو کەسێ کو پەکەک هەبوون و نەبوونا کوردان ددەتە پال وی و ب قەهرەمانێ کوردان و میناکەک ژ بۆی تەڤ جیهانێ ددەتە نیشاندان.
