سەرۆک وەزیرێ هەرێما کوردستانێ دەما دو رۆژانە ب سەرەدانەک فەرمی ل بریتانیایێ یە، لێ بەلێ پەکەکە ب کرێگرتیێن خوە ڤە ل دژی ڤێ یەکێ سەکنی و هەقارەت ل سەرۆک وەزیرێ هەرێما کوردستانێ کر.
ئەڤ دەما شەش رۆژان بوو پەکەکێ کادرۆیێن خوە ل بەریتانیایێ ئەرکدار کربوون کو ژ بۆی ئەنجامدایینا خوەپێشاندانەکی ل دژی سەرۆک وەزیرێ هەرێما کوردستانێ بانگ ل گەلێ کورد ئێ ل بەریتانیایێ بکن، لێ تەڤی ڤێ یەکێ نەکاری زێدەتری 70-80 کەسان کو پرانیا وان کدرۆیین وێ ب خوە بوون ل هەڤ کۆم بکە.
مەسروور بارزانی سەرۆک وەزیرێ حکوومەتا هەرێما کوردستانێ ژ بۆی بدەست خستنا پشتەڤانیا زێدەتر یا بەریتانیێ ژ بۆی چارەسەر کرنا پرسگرێکێن سیاسی و ئابووری یێن هەرێمێ سەرەدانا بەریتانیا کربوو، لێ ب بانگا پەکەکێ ئالیگرێن “ئەنیا مقاوەمێ” ل دژی ڤێ سەرەدانا مەسروور بارزانی سەکنین و هەقارەت ل سەرۆک وەزیرێ هەرێما کوردستانێ کرن.
ل گۆر ئاگاهیێن پێگەها دارکا مازی، هەژمارا هەری زێدە یا کەسێن ئیرۆ ل دژی سەرەدانا سەرۆکێ حکوومەتا هەرێما کوردستانێ دەرکەتین ئالیگرێن پەکەکێ بوون، هەژمارەک ژی ژ وان کوردان بوون کو ل بەریتانیایێ نەکارینە هەیا نها پاسەپۆرتێ وەرگرن و هەیا هن کەس د ناڤا وان دە بوون کو ل کوردستانێ ب تاوانا دەستدرێژییا سێکسی یا ل سەر زارۆکان دۆز ل دژی وان هاتیە ڤەکرن.
پەکەکە ل ئالیەکێ لەشکەرێ ترکیێ تینە سەر ئاخا هەرێما کوردستانێ و بوویە پرەک ژ بۆی دەرباسبوویینا لەشکەرێ ترک بۆ تەڤ باشوورێ کوردستانێ، ل ئالیێ دن ژی د مەدیایا خوە دە ب دەرەو و نووچەیێن سەختە ل دژی هەرێما کوردستانێ دسەکنە و ل ئەورۆپایێ ژی هەقارەتێ ل سەرۆک وەزیرێ هەرێما کوردستانێ دکە.
ئەڤ جارا یەکەمین نینە کو پەکەکە ل ئەورۆپا ل دژی بەرژەوەندیێن گەلێ کوردستانێ تەڤ دگەرە، پێش نها ژی ل دەما ئێریشا داعشێ هن کادرۆیێن پەکەکێ یێن ژن ب کنجێن کوردی چوون پارلامانتۆیا ئەورۆپایێ و ژ وان خوەستن چەک ب پێشمەرگەیێن کوردستانێ نەدن.
پەکەکە گەر راست دبێژە بلا جارەکی ل باژارەکی باکورێ کوردستانێ ل دژی ئاردۆگان یان دەولەت باخچەلی بسەکنە و هێکان بگرە وان، یانژی دەما رایەدارێن ترکیێ یان ئیرانێ دچن ئەورۆپایێ کارەکی ب ڤی ئاوا بکە، لێ هەر کەس دزانە خولام ت جاران نکارە ل همبەر سەرۆکێ خوە بسەکنە.
