جینایەتەک ل سەر جینایەتان!
نڤیسكار، رۆشەنبیر و ولاتپارێزێ كورد «حامد گوهەری» ل حەسابا خوە یا فەیسبووکێ نڤیسەک ده‌ربارێ ته‌وانا پەکەکێ یا ل دژی پێشمەرگەیێن رێخستنا «ئاگرێ سۆر» پارڤە کرییە و ناڤێن وان پێشمەرگەیان ئەشکەرە کرییه کو پەکەکێ ل سالا 2002ێ ب فەرمانا جەمیل بایک تەسلیمی رەژێما ئیرانێ کری.
نڤیسا “حامد گوهەری” ب ڤی ئاوایە:
سالا 1984ان، شەهید محەمەد پێنجوینی و شەهید دکتۆر رزگار، ب هنه‌ك کەسێن دن رە، رێخستنەکە کوردی ئاڤا دکن کو ب «ئاگرێ سۆر» ناڤ دكن.
ئارمانجا «ئاگرێ سۆر» سەرخوەبوونا هەر 4 پەرچەیێن کوردستانێ بوو، ڤێ رێخستنێ ل سەر سینۆرێن د نێڤبەرا رۆژهلات و باشوورێ کوردستانێ دە بارەگەهێن چەکداری هەبوون، هەڤالەکی من ئێ فەیسبۆكێ کو ناڤێ وی ل جەم من پاراستییە، د هنه‌ك نامەیان دە باس ل ڤێ رێخستنێ کریە و دبێژە:
رێخستنا «ئاگرێ سۆر»، سالا 1984ێ، ژ هێلا محەمەد پێنجوینی و شەهید دکتۆر رزگار هات ئاڤاكرن، ب قاسی کو ل بیرا من تێ، محەمەد پێنجوینی ژ من رە باس کر هن جاران ب یەنەکێ رە راستی شەر و پەڤچوونان هاتبوو، ل مەها 6 یا سالا 2002ێ، پەکەکێ 15 پێشمەرگەیێن رێخستنا ئاگرێ سۆر چەک کرن، و تەڤ ل هەرێما شنۆیێ تەسلیمی سپایێ پاسدارێن ئیرانێ کرن.
ناڤێ وان 15 پێشمەرگەیان ئەڤ بوون:
محەمەد پێنجوینی – سەکرەتەرێ رێخستنێ.
ئەرسەلان چەمچەمالی – جێهگرێ سەکرەتەرێ رێخستنێ.
عایشە گووڵ
عایشە
هەژار قادری
ئەیووب هونەروەر
بەهمەن پێیکال
ئەیووب حەقیقی
محەمەد مالکی
پشتیوان
عەلی
هاشم ناییب
سامان قادرپوور
سەلاحەدین روزدار
کەسەک دن ژی هەبوو کو جهێ ئەسەفێ یە من ناڤێ وی ژ بیر کرییە.
ئەز ژی یەک بووم ژ وان پێشمەرگەیێن کو ل وێ دەمێ ژیێ من 17 سال بوون.
ئەز ب ئەرسەلان و عایشەیێ و ئەیووب حەقیقی رە ل بلنداهیێن حاجی عۆمەران کو بارەگەهێ رێخستنێ ل ور بوو هاتین دەستەسەرکرن و یێن دن ژی ل جیهەکێ د نێڤبەرا باشوورێ کوردستانێ و شنۆ یا رۆژهلاتێ کوردستانێ “دۆلا مەیدان” ژ ئالیێ پەکەکێ ڤە هاتن گرتن و پشتی 16 رۆژان ئەم رادەستی سپای پاسدارێن ئیرانێ کرن، محەمەد پێنجوینی و ئەرسەلان پشتی دو سالان هاتن دارڤەکرن و ئەم ژی ب 6 هەیا 15 سالان هاتن زیندانکرن.
پرانییا کەسێن هاتنە ده‌سته‌سه‌ر كرن تەمەنێ وان بچوک بوو، جهێ ئەسەفێ یە ژ بەر تەمەنێ مە کو د نێڤبەرا 17-23 سالیێ دە بوو، هن ژ مە راستی مادەیێن هشبەر هاتن، پشتی تەسلیمکرنا مە و دارڤەکرنا سەکرەتەر و جێهگرێ سەکرەتەری، ئێدی «ئاگرێ سۆر» ژی ب خوە هلوەشیا، بلا ئەڤ ژ بیرا مە نەچە کو سپایێ پاسداران هن جارا د دەما ئەم 16 رۆژان ل جەم پەکەکێ د زیندانێ دە بووین د ناڤا بارەگەهێن ڤێ رێخستنێ دە لێپرسین ب مە رە دکر.
ئارمانجا سەرەکە یا «ئاگرێ سۆر» سەرخوەبوون ژ بۆی 4 پەرچەیێن کوردستانێ بوو، ئه‌ندامێن ڤێ رێخستنێ یێن هاتنە گرتن ژ باشوور و رۆژهلاتێ کوردستانێ ژ باژارێن شنۆ، خانێ، مەهاباد، سنە و بانە بوون دو کەچ ژی ژ گوندێ کانی سپی یێ ناڤچەیا دەشتەبێلی یا سەر ب شنۆیێ بوون.
ب قاسی کو هایا من ژێ هەیە هەیا نها ژی هن کەسێن کو ژ ئالیێ پەکەکێ ڤە تەسلیمی ئیرانێ هاتنە کرن و ب زۆرێ مادەیێن هشبەر ب وان دان کشاندن هێژان مادەیێن هشبەرێ ب کار تینن، یێك ژ وان نها ئه‌ندامێ حیزبا دەمۆکراتە و ل باشوور دمینە.
ئەز ب خوە ژی ل ….. دمینم و کارکەرم.
هێژایی گۆتنێ یە پەکەکێ، پێش نها ل 1/6/1998ێ ژی په‌كه‌كێ 9 پێشمەرگەیێن «یەکیتیا شۆرەشگەرێن گەلێ کوردستانێ» شەهید کرن و جەنازەیێن وان ته‌سلیمی ئیرانێ کربوو و رەژێما ئیرانێ ژی ژ بۆی ترساندنا گەلێ رۆژهلات جه‌سه‌دێن ڤان شەهیدان د ناڤا باژارێ پیرانشارێ ده د گێراندن.
