چاپەمەنیا پەکەکێ ھەر رۆژ ب بەلاڤکرنا نووچەیێن درەو، پشتەڤانێن خوە دخاپینیت و یاریان ب مەژیێ وان دکە. چاپەمەنیا پەکەکێ ب بەردەوامی نووچەیێن کو چ پەیوەندی ب راستیێڤە نینە بەلاڤ دکە، لێ بەلێ ژ بۆ کو د پێشەرۆژێ دا نووچەیێن درەو ل سەر وان نەبنە مال، پشتی چەند رۆژان ڤان نووچەیێن درەو ژ مالپەرێن خوە و ل سەر مەدیایا جڤاکی رادکەن و ناهێلن.
رۆژنامەیا پەکەکێ یا ل ترکیێ وەشانێ دکە ب ناڤێ «یەنی یاشام»، یەک ژ وان رۆژنامەیێن پەکەکێ یە کو کین و نەفرەتێ ل ھەمبەر پێشمەرگە و ھەرێما کوردستانێ بەلاڤ دکە. رۆژنامەیا «یەنی یاشام» ھەری داوی نووچەیەکێ پڕ بێەخلاقانە بەلاڤ کربوو. د نووچەیێ دا ھاتبوو گۆتن کو “پەدەکێ 5 ھەزار چەتەیێن داعشێ ب جل و بەرگێن پێشمەرگەیان ئانینە سەر سینۆر.” د نووچەیا کو نووچەگھانێ پەکەکێ یێ ب ناڤێ «تاکۆر زەردەشت» ئامادە کری دا، ھات ئیدیعاکرن کو چەتەیێن داعشێ ب جل و بەرگێن پێشمەرگەیان ھاتنە خەتا «مەتینا و شێلادزێ» یا کو ئۆپەراسیۆن لێ رووددە. ژ بلی نووچەیێن درەو، داخواز ل پێشمەرگەیان دهێتە کرن و دبێژە؛ “پێشمەرگەیێن بروومەت” بلا ل ئەرکا خوە خوەدی دەرکەڤن.
رۆژنامەیا «یەنی یاشام» بەرییا 5 رۆژان ئانکو ل 9ێ گولانێ نووچەیەک وەشاندبوو، پشتی دەرباسبوونا دەمەکێ ئەو نووچە ژ مالپەرا خوە رەشکر.
درەوەکا مەزن بێژە و باوەریێ پێ بینە
پسپۆرێن مەدیایێ دبێژن کو مەدیایا پەکەکێ ژ بۆ رایا گشتی ل دژی حکوومەتا هەرێما کوردستانێ هان بدەت “درەوێن مەزن” دکن و ژ بۆ کو ب بەرپرسیارێن وان نووچەیێن درەو نەهێن زانین، پشتی دەمەکێ وان نووچەیان ژ مالپەرێن خوە رادکن.
چاپەمەنیا پەکەکێ ب تایبەتی ژ بەر نووچەیێن ساختە یێن ڤان سالێن داوی چێکرین، باوەریا خوە ژ دەست دایە. ھندەک نووچەگھانێن “گەریلایێن” پەکەکێ بێی کو چ بەرپرسیاریێ بگرن سەر خوە، ب ناڤێن جودا ئاگاھیێن درەو بەلاڤ دکن. مەدیایا پەکەکێ ب نووچەگھانێن ساختە، نووچەیێن درەو بەلاڤ دکە.
فەرماندەیێ پێشمەرگە چ گۆت؟
بەریا کو رۆژنامەیا «یەنی یاشاما» پەکەکێ نووچەیا خوە یا ساختە ژێ ببە، «دارکا مازی» ژ بۆ کو راستیا نووچەیێ لێکۆلین بکە سەرەدانا ھێزێن پێشمەرگەیێن ل وێ دەڤەرێ دا. فەرماندەیێن پێشمەرگەیان ل دەڤەرا ئاماژەپێکری راگهاندن، ” نە ب تەنێ نووچەیەک ساختەیە، بەلکو درەوەک مەزنە ژی، درەوەکا بێەخلاقانە و بێووژدانانەیە. ئەڤ نووچەیێن ساختە روویێ پەکەکێ یێ راست نیشان ددە، نەیێ مە.”
فەرماندەیێ پێشمەرگە د ئاخافتنا خوە دا گۆت، “مە ل دژی داعشێ زێدەتری ھەزار شەھید و برینداران دانە. ئەم ھێژ ژی ل جەنازەیێن خوە دگەرین. چ پێشمەرگە و سیاسەتمەدارێن مە قەبوول ناکن داعش بهێتە ڤان دەڤەران. داعش دژمنێ مەیە. لێ یێن کو ئەڤ نووچە چێکری ھەری کێم ب قاسی داعشێ دژمنێ کورد و کوردستانێنە و ب قاسی داعشێ ژی خرابن.”
ما فەرماندارەکێ ب روومەت د ناڤا گەریلایان دا نینە کو بێژە پەکەکێ ئێدی بەسە؟
فەرماندەیێ پێشمەرگە ھەر وھا گۆت، یێن کو نووچە چێکری نە تەنێ سڤکاتی ب مە کریە، سڤکاتی ل خوەندەڤانێن خوە ژی کریە، وان شۆپینەرێن خوە دانانە جیهێ ئەحمەقا. کەسێ کو باوەر ژ نووچەیەکا وھا دکە ژخوە ئاستێ وی یێ مەژی کێمە. دهێتە گۆتن کو 5 ھەزار کەس ئانینە. 5 ھەزار کەس ب رامانا روونشتڤانێن باژارەکێ دهێت. گەلۆ قەی هەگەر تشتەکێ وھا بقەومیت ما گەلێ کوردستانێ نابینیت، سەیرە خەلکێ ل دەڤەرێ دژیت چ تشت نەدیتبن و کەس نەزانیت لێ رۆژنامەیەکا کو ل ترکیێ ب زمانێ ترکی دەردکەڤیت ببینیت و بزانیت، بێلۆمە، ئاخر گەر ئەڤە درەو نەبە، پا چ درەوە”.
د داویێ دا ژی فەرماندارێ پێشمەرگە گۆت، ما د ناڤا گەریلا دا فەرماندارەکێ ب روومەت نینە کو ل ھەمبەر ڤان درەوێن ھۆڤانە یێن پەکەکێ ھەلوەستێ نیشان بدە؟
مەدیایا پەکەکێ دخوازە شەری بێخە ناڤا کوردێن باکور و باشوور دا، لێ گەلێ کورد راستییا پەکەکێ باش دزانە و باوەر ب ڤان نووچەیێن ساختە و درەوان ناکە. ئەڤ ھەلوەستا چاپەمەنییا پەکەکێ د مەدیا جڤاکیدا راستی بەرتەکێن مەزن دهێت.
