رێخستنا په‌كه‌كێ زه‌حف دبێژه: «چ دبه بلا ببه»، میناك: چ دبه بلا ببه، ئه‌مێ فاشیزمێ تێك ببن، ئه‌مێ دژمن تونه بكن، ئه‌مێ رۆژهلاتا ناڤین بگوهه‌رینن، ئه‌مێ به‌رخوه‌دانێ گه‌ش بكن!! هه‌ری داوی ل سه‌ر ناڤێ دو زارۆكان گۆتییه: «چ دبه بلا ببه، ئه‌مێ داگیركه‌ر تێك ببن»!!
ژ دامه‌زراندنێ و هه‌یا رۆژا مه یا ئیرۆ، ئه‌ڤ گۆتن بنگه‌ها خه‌باتا په‌كه‌كێ یه، هه‌ر ده‌ما ڤێ دبێژه كورد زرارێ دبینن، دژمن ژی سۆدێ، په‌كه‌كه دشوبهه چێله‌كا زه‌ر، گوشتێ وێ ژ بۆی داگیركه‌ران و ریخا وێ ژ بۆی كوردان.
د 40 سالێن رابووری ده، رێخستنێ ب گۆتنا «چ دبه بلا ببه»، ده‌هان هه‌زار زارۆكێن كورد قه‌تل كرن، یێك بهۆستا خاكا باكور رزگار نه‌كر، ل ور نه‌سه‌كنی و لنگێ تركان كێشی باشوور و رۆژئاڤا كر، ل رۆژهلات ژی ل گه‌ل ئیرانێ په‌یمان چێكر، ب كورتاسی هه‌ر وه‌ختا په‌كه‌كێ گۆتبه «چ دبه بلا ببه»، كوردان زرار خوارییه و به‌شه‌كا خاكا خوه وه‌ندا كرییه!!.
هه‌گه‌ر ئه‌م هنه‌كی ل سه‌ر باشوور بسه‌كنن و ڤێ گۆتنێ شیرۆڤه بكن، وێ سه‌ناریۆیێن راده‌ستكرنا ناڤچه‌یێن وه‌كه «زنارا كێسته، خامتیر و كوره‌ژار، خاكورك و شه‌كیف» و ده‌هان هه‌رێمێن دن ژ بۆی مه پڕ زه‌لال ببن، هه‌موه‌خت فه‌دا كرنا سه‌دان زارۆكێن كوردان.
«چ دبه بلا ببه»، ب واته‌یا نه‌گرینگه چ بقه‌ومه، خاكا وه‌لات وه‌ندا ببه، زارۆكێن كوردان وه‌رن قه‌تل كرن، گوندێن وان وه‌رن شه‌وتاندن، كۆچبه‌ری چێببه قه‌د نه گرینگه، گرینگ ئه‌ڤه خه‌تا كو په‌كه‌كه لێ دمه‌شه، ئانگۆ خه‌تا شه‌رێ وه‌كاله‌ت و به‌رفه‌ره‌هكرنا سینۆرێن میساقا مللی، خه‌تا دژه ده‌وله‌تا كوردی، ئێنجام وه‌رگره.
دیرۆكا په‌كه‌كێ شاهده كو رێخستنێ ب قاسی ده‌وله‌تا ترك زارۆكێن كوردان قه‌تل كرنه، ب ته‌سبیتا نه‌ته‌وێن یه‌كبوویی په‌كه‌كه ژ بۆی چێكرنا شه‌رڤانان پشت به‌ستنێ ل سه‌ر ره‌ڤاندنا زارۆكان دكه، ئه‌ڤ ژی یێك ژ سه‌ده‌مانه كو یه‌كێتییا ئه‌ورۆپا و ئه‌مه‌ریكا په‌كه‌كێ وه‌كه رێخستنه‌كه ته‌رۆرێ ناس دكن.
42 سالن په‌كه‌كه دبێژه: «ئیسال سالا سه‌ركه‌تنێ یه، ئیسال وێ داوییا فاشیزمێ به، ئیسال ئه‌مێ به‌رخوه‌دانێ گه‌ش بكن»، هه‌یا رۆژا مه یا ئیرۆ ئه‌ڤ ده‌ره‌و ژ رێبه‌رێن رێخستنێ تێن بهیستن، لێ یا راست 40 سالێن دن ژی ب قه‌دن نه‌سه‌ركه‌تنه‌ك ل هۆلێ تێ دیتن و نه‌ژی داوییا فاشیزمێ تێ ژیان كرن، تشتا كو چێدبه ته‌نێ هه‌ده‌ردانا خوینا زارۆكێن كوردانه، زارۆكێن كو ژ سه‌ر رییا دبستانان تێن ره‌ڤاندن، زارۆكێن كو خوینا وان ب هه‌روه تێ فه‌دا كرن.
په‌كه‌كه ئیرۆ ژی هاتییه وێنه‌یێن هنه‌ك زارۆكان د مه‌دیایا خوه ده پارڤه‌كرنه و ل سه‌ر نڤیساندیه: «چ دبه بلا ببه، ئه‌مێ دژمنێ داگیركه‌ر تێك ببن»!!.
په‌كه‌كه ڤان زارۆكان ژ بۆی خاپاندنا هنه‌ك زارۆكێن دن زێده د مه‌دیایا خوه تینه پێش، هه‌گه‌ر نه هه‌ر كورده‌ك دزانه كو رێخستنێ ب هه‌زاران زارۆك فه‌دا كرنه و دژمنێ داگیركه‌ر هێژان چ تێكبرن ژ په‌كه‌كێ تام نه‌كرنه.
تشتا راست ژی ته‌نێ ئه‌ڤه كو ب ئحتیماله‌كا پر مه‌زن ل رۆژێن پێش په‌كه‌كه وێ شه‌هاده‌تا ڤان هه‌ردو زارۆكان ژی ب داخویانییه‌كێ پارڤه بكه و دیسا وێ ببێژه: «چ دبه بلا ببه، داوییا فاشیزمێ نێزیك بوویه».
