پەکەکێ راستییێن د قادا لەشکەری دا ب درەوێن مەدیایی ڤەدشێرە. ڤێ جارێ ژی سەناریۆیەک نوو ل سەر ئەندامێ سەرکردایەتیا پەدەکێ «عەلی عەونی» و ھێزێن پێشمەرگە نڤیساند.
ئاژانسا مەزۆپۆتامیا یا پەکەکێ کو ل ترکیێ وەشانێ دکە دوھی د نووچەیەکێ خوە دا سەناریۆیەک درەو بەلاڤکر. لگۆری ڤێ سەناریۆیا پێکەنۆک «ھولوسی ئاکار، عەلی عەونی و جەردەڤانێن باکورێ کوردستانێ» تێدا جی دگرن. لێ مەدیایا پەکەکێ ھەر تم ب زمانێن جودا یێن مالپەرا خوە درەوان دکە، ژ بەر کو شانسێ گەلێ باشوورێ کوردستانێ ژ بۆ گھاندنا راستیێ ھەیە.
چما سەناریۆیا پەکەکێ د بەشێ سۆرانی دا جودا ھاتە وەشاندن؟
د نووچەیا کو د بەشێن ترکی یێن چاپەمەنیا پەکەکێ ھاتن پارڤەکرن دا گەلەک ناڤ ھاتن بلێڤکرن. ل گۆری ڤێ یەکێ، «عەلی عەونی» و وەزیرێ بەرەڤانیا ترکیێ «ھولوسی ئاکار» ل سەر خەتا سینۆری جڤینەکا ھەڤپار ل دار خستن و ل گۆری وێ ئەرکا پێشمەرگە، جەردەڤان و لەشکەرێن ترکیێ ھاتییە دیار کرن. ھەر ووسا، فەرماندارێن پێشمەرگەیان یێن وەکە «موقەدەم حاج موحەمەد فازل موحەمەد و ھتد دێ لگەل ئارتێشا ترک دا کار کەن. ل گۆری سەناریۆیا پەکەکێ، پێشمەرگەیێن ب ناڤێ لیوایا 4 دێ ب تەمامی لگەل ئارتێشا ترکیێ تەڤبگەرن.
ما قەی چێدبیت کو خەلکێ بەھدینان ئەڤە ھەموو نەبھیستبە؟
ھەروھا ل گۆری نووچەیێ، د ئەنجاما ئێرشا چەکدارێن پەکەکێ و ئارتێشا ترک ل بامەرنێ، کو 2 زارۆک شەھید ببوون. ل گۆری درەوا پەکەکێ دهێتە گۆتن “د ھەمان بوویەرێدا 2 پێشمەرگە ژی ھاتنە کوشتن، لێ ناڤێ وان نەھاتینە ئاشکەراکرن.”
لێ مەدیایا پەکەکێ ئەڤ نووچە د بەشا کورمانجی و سۆرانی دا وەک نووچەیەکا پر کورت پارڤە کر. ژ بەر کو ژ بۆ گەلێ باشوور پر ھێسانە کو پشتراست بکن کا بوویەر راستە یان نا. ل جیھەکێ وەک بەھدینان، کو تێکلیێن مالباتی و عەشیری پر نێزک و ب ھەڤ ڤە گرێدایی نە، مەدیایا جڤاکی ب توندی بکار تینن، تشتەک ڤەشارتی نا مینە. گەر 2 پێشمەرگە ژی شەھید ببان، نە پەدەکێ دکاری بڤەشێرە و نەژی هیچ کەس و ئالیەک دن دکارە ڤەشێرە. ھەروھا ھێزا لیوایا 4 کو تێ گۆتن لگەل ئارتێشا ترکیێ دا تەڤدگەرە، ژ چەند کەسان پێک نایێ. لیوا ب گشتی ژ 3000 کەسان پێک دهێت. ل گۆری مەدیایا پەکەکێ، 3000 پێشمەرگە بەشداری ئۆپەراسیۆنا ل سەر خەتا مەتینا بوونە. راستیا ڤێ یەکێ قەد نینە. نە 3000، گەر 30 پێشمەرگە ژی ل گەل دەولەتا ترک بەشداری ئۆپەراسیۆنێ ببوونا، دا ھەموو ھەرێما بەھدینان زانیت.
ئەردۆگان ئالتانێ مەلەفێ وی تاری و مەدیا پەکەکێ یا ب گومان
یانی نووچەیێن کو ژ ئالیێ پەکەکێ ڤە تێن سەرڤیسکرن ب تەمامی ل سەر دەرەوان ئاڤا بوونە. ب راستی د نووچەیێ دا ئیمزایا «ئەردۆگان ئالتان» ھەیە کو بەرێ ژی ڤی کەسێ تاری دەرەوێن وھا کربوون. سالا بۆری «ئەردۆگان ئالتان» نووچەیەک ب ڤێ مانشەتێ نڤیسیبوو “پەدەکێ 70 گوندێن بەھدینانێ ڤالا کرن و ئەفغانی و ئەندامێن سمۆ ل ور ب جھ کرن” «دارکا مازی» ئەڤ درەو ئاشکرا کربوو. ووسا دیارە کو ئاژانسا نووچەیان یا «مەزۆپاتامیا» تەعلیمات ژ رێڤەبەرییا پەکەکێ وەگرتییە ژ بۆ کو زەمینەکێ ژ بۆ کریارێن ئاژاوەگێریێ ئامادە بکە. تشتا بالکێش و سەیر ئەوە کو ئاژانسا نووچەیان یا «مەزۆپۆتامیا و رۆژنامەیا یەنی یاشام» کو ھەری زێدە ئێرشی ھەرێما کوردستانێ دکن و نووچەیێن سەختە چێدکن، ل ترکیێ وەشانێ دکن و دەولەتا ترک چ ئاستەنگیان ژ بۆ وان دروست ناکەت. ئەڤ یەک د دە نیشاندان کا چاپەمەنیا پەکەکێ ژ ئالیێ کێ ڤە دهێتە برێڤەبرن. گەلەک کەس دبێژن، “گەلۆ دەولەتا ترک مەدیایا پەکەکێ برێڤە دبە؟ بێ گوومان ئەڤ پرسیارە گەلەک د جیھ دا یە.
پەکەکە ژ بۆ هیچ نووچەیەکا خوە نکارە یەک بەلگە ژی پەیدا بکە
د ڤان 4 سالێن داوی دا پەکەکێ ب سەدان نووچە بەلاڤ کرنە کو پێشمەرگە و ئارتێشا ترکیێ پێکڤە تەڤگەریانە. د ڤان نووچەیان دا درەوێن وەکە “جڤینێن ھەڤبەش، پێشمەرگە ب جل و بەرگێن لەشکەری یێن ترکیێ، لەشکەرێن ترکیێ ب جل و بەرگێن پێشمەرگە، ئۆپەراسیۆنا ئارتێشا ترکیێ ل سەر خاکا ھەرێما کوردستانێ، چەکدارێن داعشێ کو ب جل و بەرگێن پێشمەرگە بەشداری ئۆپەراسیۆنێ بوونە، ھەلیکۆپتەرێن ترکیێ ژ جھێن وەکە قەسرا سەدام ل نێزیکی دوھۆکێ رابوونە و ئێرشی گەریلا کرنە و ھتد…” هاتنە پارڤەکرن. ئارمانجا پەکەکێ کو پێشمەرگە وەکە ھەڤپشکێ ئارتێشا ترک نیشان بدە ئەوە کو پێشمەرگان شەھید بکە و پاشێ ژی ببێژە “پێشمەرگە و لەشکەرێن ترکا ناڤھەڤ دا بوون مە ناکاری ژ ھەڤ جوودا بکین”.
سیاسەتا پەکەکێ یا کو د ناڤبەرا کوردان دا دژمناھییێ ئاڤا دکە
یەک بەلگە ژی نینە کو ڤان نووچەیێن پەکەکێ راست دەرخینە. پەکەکە نکارە یەک بەلگە ژی پێشکێش بکە. پەکەکە ژ بلی نڤیساندنا سەناریۆیەکا باش و دوبارەکرنا وێ دەرەوێ تشتەکێ دن نکارە بکە. یێن کو ھەری باش دزانە کو ئەڤە ھەموو درەون، گەلێ باشوورێ کوردستانێ بخوەیە. لێ پەکەکە ب ڤان درەوان کارتێکرنێ ل پارچەیێن دن یێن کوردستانێ ژی دکە. پێدڤییە پەکەکە و ئەڤ درەوێن کو کین و نەفرەتێ د ناڤ مالا کوردان دا بەلاڤ دکەن بینە ئاشکەرا کرن. لێ پەکەکە چووڤکێ دەستێ داگیرکەرانە و ل دژی ھەرێما کوردستانێ دهێتە بکارئینان. یانی د ناڤا رەفێن دژمن دا جھ گرتییە. رەوشەنبیرێن باشوورێ کوردستانێ ھەکە ھەلوەستێ نیشان نەدن، ڤان درەوان ئاشکەرا نەکن و حەسابێ ژ پەکەکێ نەخوازن، دێ پەکەکە بێ راواستان دژی حکوومەتا ھەرێما کوردستانێ نەیارییان بەردەوام کەت.
پێدڤییە رەوشەنبیرێن باشوورێ کوردستانێ ل ھەمبەر درەوێن پەکەکێ خوەدی ھەلوەست بن
رەوشەنبیرێن باشوورێ کوردستانێ، ب تایبەتی یێن کو ل ھەرێما بەھدینان دژین، ل ھەمبەر ڤان دەرەوێن پەکەکێ لاوازن. ئەڤ درەوێن چاپەمەنیا پەکەکێ ژ ئالیێ رەوشەنبیرێن باشوورێ کوردستانێ ڤە بچووک، سڤک و بێ واتە تێن دیتن. ب تایبەتی ژ بەر کو زمانێ مەدیایا پەکەکێ ترکی یە، ئێریشا چاپەمەنیا پەکەکێ یا ل سەر ھەموو نرخێن کوردستانێ و دیرۆکا کوردستانێ ب تەڤاھی باش نایێ دیتن. ئەڤ ھەلوەستا لاواز یا رەوشەنبیرێن کوردستانێ، رێ ل بەر گۆتنێن پەکەکێ یێن کو ھەر کو دچە پێتر بێھش و خوەپەرەست و درەوکەر دبیت، ڤەدکە.
پێدڤییە رەوشەنبیرێن باشوورێ کوردستانێ ل دژی ھەلوەستا پەکەکێ یا کو نەیارییێ د ناڤ کوردان دا گور دکە، ھەلوەستێ نیشان بدن. ھەگەر پەکەکە ب وێرەکی درەوان دکە و دبێژە “5000 ئەندامێن داعشێ ب جلووبەرگێن پێشمەرگە بەشداری ئۆپەراسیۆنا دەڤەرا شێلادزێ بوونە” رەوشەنبیر و رۆژنامەڤانێن بەھدینان بەرپرسن. گەر 10 رەوشەنبیر و چەند رۆژنامەڤان بچن شێلادزێ و بێژن ھۆۆۆۆ پەکەکە کا نێ ئەو 5000 داعشی؟ ھەگەر وان داخویانی بدابا، وێ دەمێ پەکەکە ژی دا لنگێ خوە ل گۆری بەرکا بابێ خوە درێژ کەت. دو دەزگەھێن چاپەمەنیێ ئەڤ درەوا پەکەکێ شۆپاندبا و ل کۆلانێن شێلادزێ ژ رایا گشتی بپرسیبا، “گەلۆ وە 5000 ئەندامێن داعشێ دیتنە؟” ئەگەر وسا کربا، پەکەکە نەدکاری ئەوقاس ئێریشکار تەڤبگەرە.
تشتا کو دێ سیاسەتا پەکەکێ یا ئاڤاکرنا دژمناتیا کوردان و نووچەیێن ساختە دەتە سەکناندن، رەوشەنبیرێن کورد و مەدیایا کوردە.
