وەزیرێ دەرڤەیێ ئامەریکایێ «ئانتۆنی بلنکن» دژایەتیا وەلاتێ خوە ل ھەمبەر ھەر ئێریشەکا ئارتێشا ترکیێ بۆ سەر سووریێ نیشان دا.
ئانتۆنی بلنکن ژ بۆ رۆژنامەڤانان راگھاند، ھەر ئێریشەکا نوو یا ترکیێ بۆ سەر سووریێ دێ بیتە سەدەما ژناڤبرنا سەقامگیریا ھەرێمی.
بلنکن ل سەر لڤ و تەڤگەرا سەربازی یا بەر ب باکورێ سووریێ ھشیاری دا ترکیێ و راگھاند، ئێریشا سەربازی دێ ھەرێمێ رووبروویی مەترسیێ کەت.
گۆتنێن ئانتۆنی بلنکەن پشتی وێ یەکێ ھات، کو ئیرۆ سەرۆک کۆمارێ ترکیێ رەجەب تەییب ئەردۆگان د جڤینا کۆما پارتیا خوە دا راگھاند: “”ئەم دەرباسی قۆناغەکە نوو یا بریارا خوە یا ئاڤاکرنا ھەرێمەکا ئەولەهـ یا ب کووراھیا 30 کیلۆمەتران دبین. ئەم دێ «تل رفعەت و منبجێ» ژ تەرۆریستان پاقژ بکین. پشترا ژی ئەم دێ قۆناغ ب قۆناغ ل دەڤەرێن دن ژی ھەمان تشتی ئەنجام دەین.”
ئەردۆگان ل سەر داخوازا سوێد و فینلاندایێ یا ژ بۆ ئەندامبوونا ناتۆیێ ژی ئاخڤی و گۆت: “مە دەربارێ ئەندامبوونا ھەردو وەلاتان د ناتۆیێ دا، ژ بەر پشتەڤانیا وان یا ژ بۆ رێخستنا تەرۆرێ یا پەکەکێ و سازیێن گرێدایی وێ، ب ئاوایەکی ئەشکەرە و بلەز راگھاند کو ئەم ل دژی ئەندامبوونا وانین.”
سەرۆک کۆمارێ ترکیێ گۆت: “ناتۆ رێخستنەکا ئەولەھیێ یە، ناتۆ نە رێخستنەکا ئالیکاریا تەرۆریستانە.”
ھەروھا دیار کر: “ل سوێد، فینلاندا، ئالمانیا، فرانسا و ھۆلاندا، پۆلیس وان دپارێزە. ئەو ژی ب پۆستەرێن سەرۆکێ رێخستنا تەرۆریستی خوەپێشاندانا خوە دکن. ل پێشیا دادگەھا مافێن مرۆڤان یا ئەورۆپایێ کۆنان ڤەددن و پارە کۆم دکن. تەڤی ھەموو ڤان تشتان ئەم چاوا دڤێ ببێژن کەرەم بکن وەرن ببن ئەندام.”
