بەریا لووتکەیا پەکینێ؛ ئامەریکا و چین نێزیکی پەیمانەکە 30 ملیار دۆلاری دبن
تێ چاڤەرێکرن کو ڤێ ھەفتەیێ واشنگتۆن و پەکین مەکانیزمایەکە نوو ژ بۆ برێڤەبرنا بازرگانیێ راگھینن. ل گۆری ڤێ پلانێ، ھەر دو ئالی دێ باجێن گومرکێ ل سەر کەلووپەلێن ئاسایی ب قاسی 30 ملیار دۆلاران کێم بکن؛ ئەڤ یەک وەکی گوھەرینەکە گرینگ د سیاسەتا رێڤەبەریا ترامپ یا ل بەرامبەری چینێ دە تێ دیتن.
ل گۆری زانیاریێن ئاژانسا رویتەرسێ، بەرپرسێن ئامەریکا و چینێ ژ بۆ ئاڤاکرنا سازیەکێ ب ناڤێ “ئەنجوومەنا بازرگانیێ” کار دکن. ئارمانجا ڤێ ئەنجوومەنێ دیتنا خالێن ھەڤپارە ژ بۆ کێمکرنا باجێن ل سەر وان کەلووپەلێن کو تێکلیا وان ب ئەولەھیا نەتەوەیی ڤە نینە، داکو ھەر دو ئالی بکاربن ب قاسی 30 ھەتا 50 ملیار دۆلاران لھەڤگوھەرتنا بازرگانی یا نوو بکن.
خالا ھەری بەرچاڤ د ڤان دانوستاندنان دە ئەوە کو واشنگتۆن ئێدی داخوازێ ژ پەکینێ ناکە کو مۆدەلا خوەیا ئابۆری بگوھەرینە و بکە مینا مۆدەلا بازارا ئازادا ئامەریکایێ. نوونەرێ بازرگانیێ یێ ئامەریکایێ، جەیمسۆن گرێر، ئەڤ ئاوایێ نوو وەکی “بھەڤگرێدان” ب ناڤ کر؛ ئارمانجا ڤێ ستراتەژیێ گونجاندنا دو سیستەمێن ئابۆری یێن جودایە، بێیی کو ھەول بدن یەکدو بگوھەرینن.
وەکی ئامادەکاریەکێ ژ بۆ لووتکەیا ترامپ و جین پینگ، وەزیرێ خەزینەیێ یێ ئامەریکایێ سکۆت بیسنت و جیگرێ سەرۆکوەزیرێ چینێ ئیرۆ (چارشەمبێ، 13ێ گولانا 2026ێ) ل باژارێ ئینچیۆنێ یێ کۆریا باشوور سێ دەمژمێران جڤیان. ھەر چەند تو داخویانیەکە فەرمی نەھاتبە بەلاڤکرن ژی، چاڤکانی دبێژن کو رێ ژ بۆ لھەڤکرنا “30 ملیاران ل بەرامبەری 30 ملیاران” ھاتیە خوەشکرن.
ئەڤ ھەولدانا نوو یا ھەر دو وەلاتێن زلھێز پشتی داکەتنەکە بەرچاڤا د ئاستا بازرگانیێ دە تێ؛ لھەڤگوھەرتنا بازرگانی ب رێژەیا %29 داکەتیە و گھیشتیە 415 ملیار دۆلاران. ھەر وھا کوریهینانا بازرگانیێ یا ئامەریکایێ ل بەرامبەری چینێ ژ بۆ 202 ملیار دۆلاران داکەتیە کو د دو دەھسالێن بۆری دە ئاستا ھەری نزمە.
تەڤی ڤێ ئاساییکرنا د وارێ کەلووپەلێن ئاسایی دە، ئامەریکا تەکەز دکە کو باجێن گشتی و قەدەغەیێن توند یێن ل سەر ھناردەکرنا تەکنۆلۆژیێن پێشکەفتی (وەکی چیپێن ئەلەکترۆنیک) وەکی خوە دمینن؛ ژ بەر کو ئەڤ مژار راستەراست ب ئەولەھیا نەتەوەیی ڤە گرێدایی نە.
ئەڤ لھەڤکرنا چاڤەرێکری، ھەگەر ژ ئالیێ ترامپ و جین پینگ ڤە ل پەکینێ بێ ئیمزەکرن، دێ ببە سەدەما چێکرنا ھەڤسەنگیەکە نوو د شەرێ سارێ ئابۆری یێ د ناڤبەرا ھەر دو وەلاتان دە.
