نیو یۆرک تایمز: ئیران رازی بوویە دەست ژ یورانیوما زەنگینکری بەردە
رۆژنامەیا ئامەریکایی “نیو یۆرک تایمز”، ژ زارێ بەرپرسێن پایەبەندێن ئامەریکایێ ئەشکەرە کر کو ئیرانێ قەبوول کریە دەست ژ ئەمبارێن خوەیێن یورانیوما زەنگینکری یا ئاستا بلند بەردە. ئەڤ پێنگاڤ وەکی یەک ژ شەرتێن ھەری گرنگێن لھەڤکرنا پێشنیارکری یا ل گەل واشنگتۆنێ تێ دیتن، کو ئارمانجا وێ بداویانینا ئالۆزیان و ڤەکرنا تەنگاڤا ھورمزێیە.
ل گۆری راپۆرتێ، ھەر چەند میکانیزما رزگارکرنا ژ یورانیوما زەنگینکری هێژ ب تەمامی نەھاتیە دیارکرن و ھوورگلیێن وێ بۆ گەرا نوویا دانوستاندنان ھاتنە پاشخستن ژی، دەرخستنا بەیاننامەیەکە گشتی ژ ئالیێ تەھرانێ ڤە وەکی پێنگاڤەکە یەکالیکەر تێ نرخاندن. ھات راگھاندن کو ئیدارەیا دۆنالد ترامپ ژ بەر فکارێن بەرھەلستیا کۆمارپارێزان یا ل ناڤ کۆنگرێسێ، گرینگیەکە مەزن ددە ڤێ بەندێ.
رۆژنامەیێ دەستنیشان کر کو تەھرانێ د دەستپێکێ دە ب توندی رەد کریە کو دۆسیایا یورانیومێ بخە قۆناغا یەکێ یا لھەڤکرنێ. لێبەلێ، پشتی کو دانوستاندنکەرێن ئامەریکایی ب رێیا ناڤبەینکاران ھشیاری دان ئیرانێ کو ئەگەر ئەڤ مەرج نەیێ قەبوولکرن واشنگتۆن دێ ژ دانوستاندنان ڤەکشە و ئێریشێن سەربازی بدە دەستپێکرن، ئالیێ ئیرانی نەچار بوویە ڤێ بەندێ قەبوول بکە.
د راپۆرتێ دە رووپەلێن نەپەنی یێن پلانا سەربازی ژی ھاتنە ئەشکەرە کرن. ھات دیارکرن کو پلاندانەرێن سەربازی د رۆژێن بۆری دە ژ بۆ بۆمبەبارانکرنا بنگەھا ئەتۆمی یا ئەسفەھانێ کو تێ تەخمینکرن پرانیا یورانیومێ ل ورە چەند بژاردە پێشکێشی سەرۆک دۆنالد ترامپ کرنە. د ناڤ ڤان بژاردەیان دە بکارانینا “بۆمبەیا کەلەھ-شکێن” و ئۆپەراسیۆنەکە کۆماندۆیا ھەڤپارا ئامەریکایی-ئیسرایلی ژی ھەبوویە، لێ ترامپ ژ بەر ریسکێن مەزن ئەڤ ئۆپەراسیۆن قەبوول نەکریە.
ل گۆری زانیاریان، نھا د دەستێ ئیرانێ دە نێزیکی 439 کیلۆگرام (970 پاوەند) یورانیوما زەنگینکری یا ب رێژەیا %60 ھەیە. ژ بۆ چارەسەرکرنا ڤێ، دو بژاردەیێن سەرەکە ل سەر مێزەیێ نە: ڤەگوھاستنا یورانیومێ بۆ رووسیایێ (مینا لھەڤکرنا سالا 2015) یان ژی کێمکرنا ئاستا زەنگینکرنا وێ بۆ ئاستەکە نزم.
ل بەرانبەری ڤان پێنگاڤێن ئیرانێ، لھەڤکرن ئازادکرنا ب ملیاران دۆلاران ژ داراییێن ئاستەنگکری یێن تەھرانێ ڤەدگرە. لێبەلێ، وەکی گارانتیەکێ ژ بۆ بەردەوامبوونا دانوستاندنان، شەرت ھاتیە دانین کو پرانیا ڤی پەرەیی د ناڤ سندۆقەکە ئاڤادانکرنێ دە وەرە پاراستن و تەھران نکاربە ب تەمامی دەستێ خوە بگھینێ ھەتا کو لھەڤکرنا داویێ ب فەرمی پێک تێ.
