بەردەڤکێ سەرۆکۆمارێ ترکیەیێ دا خویاکرن، ترکیە د چارچۆڤەیا ئەولەکاری و نەهیشتنا هەبوونا پهكهكێ – یهپهگێ دا، ل سەر سینۆرێن خوە د ئۆپەراسیۆنان دا بەردەوام دبە. کالن گۆت ژی، گاڤێن سوێد و فینلاندا ئاڤێتنە، دلگرانیێن وان ل بەر چاڤان نەگرتنە.
بەردەڤکێ سەرۆکۆمارێ ترکیەیێ ئیبراهیم کالن، بەریا لووتکەیا ناتۆ یا 29-30ێ خزیرانێ سەردانا ئیسپانیایێ کر. کالن ل مهدریدێ دا خویاکرن، ل ئیدلب، عەفرین و سەرێکانیێ، ترکیە ب کرداری هەرێمەکە ئەوەلە دروست کریە و هەبوونا سەربازێن ترکیێ ل ناڤا ئاخا سووریێ، رێ ل بەر کۆچبەربوونا سووریان دگرە. ژ بەر ڤێ پێویستە وەلاتێن ئەورۆپا سپاسییا ترکیێ بکن.
کالن گۆت: «ترکیە ب هێز و دەرفەتێن خوە ل سەر سینۆرێ سووریێ بەرگریێن پێویست پێشخستنە. ل دژی پهكهكێ – یهپهگێ و داعشێ هەتا نها مە سێ ئۆپەراسیۆنێن مەزن ئەنجام دانە. ژ ڤر و پێ ڤە ژی، د دەم و جهێ گونجاو دە ئەمێ بەردەوام بن. سەرۆکۆمارێ مە 10 سالن بەحسا دروستکرنا هەرێمەکە ئەولە دکە، لێ مخابن بەرسڤێن پێویست نەدیتنە. ترکیە نها ل ئیدلیب، عەفرین، سەرێکانیێ و هەرێمێن دن، ب ئاوایەکە کرداری هەرێمەکە ئەولە دروست کریە و وەلاتیێن سووریێ ل وان ناڤچەیان هیشتنە. هەبوونا لەشکەرێن ترکیەیێ ل وان ناڤچەیان، پێلەکا نوو یا کۆچبەربوونێ ئاستەنگ دکە. وەلاتێن دۆست و هەڤپەیمان، شوونا کو رەخنە بکن، دڤێ ژ هەبوونا سەربازێن ترکیەیێ دلخوەش بن و سپاس بکن. ئەگەر لاوازی هەبە، کۆچبەری دێ باندۆرەکە مەزن ل ئەورۆپا ژی بکە. هێزا ترکیەیێ یا راکرنا پێلەکە نوو یا کۆچبەران نینە. ل هەمبەر کۆریدۆرا تەرۆرێ ژی ترکیە هەتا نها چاوا هەلوەستەکە زەلال وەرگرتیە ژ ڤر و پێ ڤە ژی بەردەوام دبە».
کالن دەربارێ پرسا ئەندامەتیبوونا سوێد و فنلاندایێ دە دا خویاکرن، وان داخواز و دلگرانیێن خوە د وارێ شەرێ دژی تەرۆرێ و هەبوون و کارێن رێخستنێن پهكهكێ/یهپهگێ ل هەر دو وەلاتان پێشکێشی ئالیێن سوید و فینلاندا کرنە و هەموو زانیاری و بەلگە پارڤە کرنە.
کالن گۆت، هەتا نها ژ هەر دو وەلاتان گاڤێن پێویست کو دلگرانیێن ترکیەیێ دەرباس بکن، نەهاتنە ئاڤێتن. دەما گاڤێن پێویست هاتن ئاڤێتن، دێ هەلوەستا وان ژی وەرە گوهارتن، لێ هەتا وها نەبە، د مژارا ئەندامتیێ دە پێشڤەچوون چێنابە.
کالن هەر وها سپاسیا ئیسپانیا ژی کر کو مۆلەتا سیستەما پاتریۆت یا بەرگریا ئاسیمانی یا ل ئەدەنەیێ درێژ کریە، کو هێ بەرێ هن وەلاتان ئەڤ سیستەم ژ ترکیەیێ ڤەکشاندبوون.
بەردەڤکێ سەرۆکۆمارێ ترکیەیێ دا زانین ژی، لووتکەیا مهدریدێ گەلەک گرینگە، ژ بەر کو د لووتکەیێ دە، ستراتەژیا ناتۆ دێ وەرە نووکرن و ل سەر شەرێ ئوکراینا، ئاسایشا خوارنێ، شەرێ ل دژی تەرۆرێ و پێوەندیێن ب رووسیایێ رە، بریارێن نوو وەرن گرتن.
