کێشەیا “باوەریێ” د پێڤاژۆیا چارەسەریێ دە: نێرینێن جودایێن کورتولموش و گەرگەرلیۆغلو
نیقاشێن ل سەر “پێڤاژۆیا چارەسەریێ” و پاشەرۆژا پرسگرێکا کورد ل ترکیەیێ ب داخویانیێن بەرەڤاژی یێن رایەدارێن دەولەتێ و نوونەرێن دەم پارتیێ بەردەوام دکن. سەرۆکێ پارلامەنا ترکیەیێ نومان کورتولموش و پارلامەنتەرێ دەم پارتیێ یێ کۆجاعەلیێ عۆمەر فارووق گەرگەرلیۆغلو، ل سەر شێواز و گاڤێن ئاڤێتنا پێنگاڤێن نوو نێرینێن جودا ئانین زمان. ھەر چەند ھەر دو ئالی گرنگیا بەردەوامیا پێڤاژۆیێ قەبوول بکن ژی، ل سەر مەرجێن دەستپێکرنێ ل ھەڤ ناکن.
سەرۆکێ پارلامەنا ترکیەیێ نومان کورتولموش بال کشاند سەر بەرپرسیاریێن پەکەکێ و دەستنیشان کر کو سەدەما تێکچوونا ھەولدانێن بۆری، جێبەجێنەکرنا سۆزێن چەکدانینێیە. کورتولموش دیار کر کو ئەگەر رێخستنێ د دەما خوە دە چەک دانابان، نھا پێڤاژۆ گھیشتبوو ئەنجامەکە سەرکەفتی. سەرۆکێ پارلامەنێ بانگ ل پەکەکێ کر کو بێ شەرت و مەرج چەکان دەینە داکو رێ ل بەر سیاسەتا دەمۆکراتیکا د بن سیوانا پارلامەنێ دە ڤەبە.
کورتولموش د بەردەوامیا ئاخافتنا خوە دە ئاماژە ب پێنجی سالێن بۆری یێن تژی پەڤچوون کر و راگھاند کو د بن سیوانا پارلامەنێ دە، ب بەشداریا ھەموو پارتیان کۆمیسیۆنەکێ نەخشەرێیەک دیار کریە. سەرۆکێ پارلامەنێ دەستنیشان کر کو ژ بۆ سەروەربوونا براتیێ و دەمۆکراتیکبوونێ، ل ھەرێمێ، ب تایبەتی ل ئیران و سووریەیێ، ژ بلی چەکدانینێ چ رێیەکە دن نەمایە و ئەڤ گاڤ ژ بۆ ئاساییبوونا ھەرێمێ مەجبوورییە.
ل ئالیێ دن، پارلامەنتەرێ دەم پارتیێ عۆمەر فارووق گەرگەرلیۆغلو نێرینەک جودا پێشکێش کر و دیار کر کو پرسگرێکا ھەری مەزنا د ناڤبەرا ئالیان دە، کێشەیا “باوەری و گارانتیێن یاسایی”یە. گەرگەرلیۆغلو راگھاند کو ھەر چەند پێڤاژۆ ب تەمامی نەسەکنبوویا ژی، لێ نھا ھەر دو ئالی (حکوومەت و پەکەکە) ژ ئاڤێتنا گاڤێن بەربچاڤ و جدی دوور دکەڤن و خوە ژ بەرپرسیاریێ ڤەدشێرن.
گەرگەرلیۆغلو بال کشاند سەر پاراستنا ستراتەژیک یا ئالیان و ئانی زمان کو دەولەت داخوازا چەکدانینا یەکسەر دکە، لێ پەکەکە ژی ژ بەر نەبوونا ئەولەھیێ داخوازا زەمینەیا یاسایی دکە. گەرگەرلیۆغلو دەستنیشان کر کو ژ بۆ چێبوونا باوەریێ، پێویستیا پەکەکێ ب گوھەرتن و گارانتیێن یاسایی ھەیە داکو رەوشا چەکدارێن وان د چارچۆڤەیا قانوونی دە وەرە میسۆگەرکرن. ل گۆری داخویانیا وی، ئالیێ خوەدی ھێز حکوومەتە و دڤێت وەکی ھەر جار ئیرادەیا خوەیا سیاسی ب گوھەرتنێن یاسایی نیشان بدە.
