موجتەبا خامەنەیی ستراتەژیا نوویا ئیرانێ ئەشکەرە کر: 10 خالێن ژ بۆ پاشەرۆژا کەنداڤێ

رێبەرێ بلندێ کۆمارا ئیسلامییا ئیرانێ، موجتەبا خامەنەیی، ئیرۆ 11ێ گولانا 2026ێ، د داخویانیەکێ دە 10 خالێن ستراتەژیک دەربارێ ئەولەھی و پاشەرۆژا کەنداڤ و تەنگاڤا ھورمزێ دە راگھاندن. ئەڤ داخویانی وەکی نەخشەرێیەکە نوویا تەھرانێ ژ بۆ ناڤچەیێ و پەیامەکە توند ژ بۆ ھێزێن بیانی تێ نرخاندن.

خامەنەیی د خالێن خوە دە تەکەز کر کو ھەبوونا لەشکەرییا ئامەریکایێ ل سەر خاکا وەلاتێن کەنداڤێ، سەدەما بنگەھین یا بێ ئارامیێیە. وی دیار کر کو بارەگەھێن ئامەریکایێ “بێدەستھلاتن” و نکارن ئەولەھیا خوە ژی بپارێزن. رێبەرێ ئیرانێ بانگ کر کو ناڤچە ژ بن باندۆرا ئامەریکایێ دەرکەڤە داکو بەر ب پێشکەتن و خوەشگووزەرانیێ ڤە بچە.

د خالێن دن یێن ستراتەژیێ دە، خامەنەیی بال کشاند سەر چارەنڤیسا ھەڤبەشا ئیرانێ و جیرانێن وێ یێن ل کەنداڤ و دەریایا عوممانێ. وی ب توندی راگھاند کو ژ بۆ بیانیان د کەنداڤێ دە جھ نینە و سیستەمەکە نوویا برێڤەبرنێ ل تەنگاڤا ھورمزێ دەست پێ کریە کو دێ ببە سەدەما دەستکەفتیێن ئابۆری یێن مەزن ژ بۆ گەلێ ئیرانێ.

ل گۆری داخویانیێ، خامەنەیی سەرکەفتنا ئیرانێ د برێڤەبرنا تەنگاڤا ھورمزێ دە وەکی بنگەھا ئەولەھیا ناڤچەیێ پێناسە کر. وی داخواز کر کو ھەموو دەرفەتێن “دژمن” یێن ژ بۆ خەرابکرنا ڤێ تەنگاڤێ ژ ھۆلێ وەرن راکرن و شێوازەکی نوویێ یاسایی و ئیداری ژ بۆ دابینکرنا ئارامیا گەلێن ناڤچەیێ وەرە جیبجیکرن.

ھەروھا ھات راگھاندن کو موجتەبا خامەنەیی، پشتی وەرگرتنا راپۆرا فەرماندارێ بارەگەھا “خاتەمول ئەنبیا”، فەرمان دایە ھەموو یەکەیێن ھێزێن چەکدار کو ل سەر رووبرووبوونا دژمنان بەردەوام بن. ئەڤ فەرمانا رێبەرێ ئیرانێ نیشانا ئاستا ھەری بلندا ئامادەباشیا لەشکەری یا تەھرانێیە د ڤێ قۆناغا حەساسا ناڤچەیێ دە.