ئه‌نجوومه‌نا ئاساییشا هه‌رێما كوردستانێ، ئیرۆ داخۆیانی ده‌ربارێ ئێریشا شه‌ڤا ده‌رباسبوویی یا سه‌ر رێیا هه‌ولێر – پیرمام دا و راگهاند كو ئه‌ڤ ئێریش ژ بۆی چێكرنا زه‌خته‌كه زێده‌تر ل سه‌ر هه‌رێما كوردستانێ، هاتییه ئه‌نجام دایین.
داخویانییا ئه‌نجوومه‌نا ئاساییشا هه‌رێما كوردستانێ وهایه:
ئێریشا ته‌رۆریستی یا شه‌ڤا ده‌رباسبوویی ل سه‌ر هه‌ولێرێ، درێژه‌پێدانا وان ئێریشانه یێن كو ژ بۆی چێكرنا زه‌ختێ ل سه‌ر هه‌رێما كوردستانێ، هاتییه ئه‌نجام دایین.
درۆنا ژ بۆی ڤێ ئێریشێ هاتییه بكارئانین، ژ سینۆرێ باژارۆكێ پردێ ژ هێلا میلیشایێن حزبوللا ڤه به‌ر ب هه‌ولێرێ هاتبوو ئاراسته كرن.
پاش ئێریشێ هنه‌ك سایتێن فه‌رمی یێن گرێدای هێزه‌كه هه‌رێمێ، وه‌كه جارێن به‌رێ ووسا به‌لاڤ كر كو د ڤێ ئێریشێ ده ئۆتۆمبیله‌كا مۆسادا ئیسرائیلێ هاتییه هه‌ده‌ف گرتن و هاتییه ئیدیعا كرن كو كه‌سه‌ك هاتییه كوشتن.
ئارمانج ژ ڤان ده‌ره‌وان چێكرنا باندۆرا ل سه‌ر رایا گشتی یه. لێ به‌لێ ژ بۆی گه‌لێ هه‌ولێرێ و هه‌رێمێ ب گشتی ئه‌شكه‌ره بوو و وان ب چاڤێ خوه جیێێ ئێریشێ و جۆر و زرارێن وێ دیتن، نووچه‌یێن ووسا ژی بوونه جیێ ترانه حه‌نه‌كان.
تشتێ كو ئه‌ڤ هێز پرۆباگاندایێ ژ بۆی دكن، وه‌كه هه‌وله‌كێ یه ژ بۆی په‌چنینا لاوازی و شكه‌ستنێن وان، ئه‌گه‌ر نه بلا ئاساییش و ئه‌وله‌هییا كو ل جه‌رگێ پایته‌ختێ و باژاران هه‌یه بپارێزن.
هه‌رێما كوردستانێ چ ده‌مه‌كێ نابه پێگه‌هـ ژ بۆی گه‌فخوارن و ئێریش كرنا سه‌ر ده‌وله‌تێن جیران، ل هه‌مان ده‌مێ رادگهینین كو دڤێ ئه‌ڤ ده‌وله‌ت رێزێ ل سه‌روه‌رییا خاك و گه‌لێ هه‌رێما كوردستانێ و ئیراقێ بگرن.
ئه‌نجوومه‌نا ئاساییشا هه‌رێما كوردستانێ
9/6/2022
