به‌رهه‌م سالح و مانۆره‌كا سیاسی یا نه‌سالح
دكتۆر به‌رهه‌م سالح سه‌رۆك كۆمارێ ئیراقێ و ئه‌ندامێ سەرکردایەتیا یه‌نه‌كێ، ژ بۆی فه‌رمی كرنا چه‌كدار و میلیشیایێن په‌كه‌كێ د ناڤا ره‌فێن حه‌شدا شه‌عبی دا، كه‌تییه ناڤا هه‌ولێن مه‌زن دا، ژ بۆی ڤێ ژی جڤینه‌ك ل گه‌ل شاندێ په‌كه‌كێ ئه‌نجام دایه.
رۆژا یه‌كشه‌مبی یا رابووری 19 خزیرانا 2022، شانده‌كێ شه‌نگالێ كو پرانی ژێ كادرۆ و رێخستنێن په‌كه‌كێ بوون، ل كۆچكا سه‌لام ژ لایێ دكتۆر به‌رهه‌م سالح ڤه هاتن پێشوازی كرن.
پێگه‌ها «داركا مازی» ژ چاڤكانیێن خوه یێن تایبه‌ت، ناڤێن ته‌ڤ ئه‌ندامێن شاندی و كادرۆیێن په‌كه‌كێ یێن كو لگەل دكتۆر به‌رهه‌م دا جڤیانه، هه‌ر وها ناڤه‌رۆكا جڤینێ ب ده‌ست خستنه.
نوونه‌رێن په‌كه‌كێ یێن كو لگەل به‌رهه‌م دا جڤیایین ئەڤەنە:
عومه‌ر سالح ئیبراهیم / سه‌رۆكێ پارتییا ئازادی و ده‌مۆكراسی یا ئێزدی
ده‌خیل مراد حه‌سه‌ن / پارتییا ئازادی و ده‌مۆكراسی یا ئێزدی
ئینعام ئلیاس حه‌سه‌ن / پارتییا ئازادی و ده‌مۆكراسی یا ئێزدی
فه‌هه‌د حامد عومه‌ر / راسپاردی ژ بۆی بریڤه‌برنا قائیمه‌قامییا شه‌نگالێ
خودێدا جۆكی حسێن / راسپاردی ژ بۆ برێڤه‌برنا ناحیا سنوونێ
حسێن حه‌جی نه‌بسۆ / سه‌رۆكێ كۆما رێڤه‌به‌رییا خوه‌سه‌ر
به‌رهه‌م سالح د جڤینێ دا، ئه‌ڤ كادرێن په‌كه‌كێ وه‌كه نوونه‌رێن شه‌نگالێ حه‌سباندنه، شاندا په‌كه‌كێ ژ به‌رهه‌م سالح خوا‌ست كو چه‌كدارێن په‌كه‌كێ د ناڤا ره‌فێن حه‌شدا شه‌عبی دا بهێن فه‌رمی كرن، به‌رهه‌م سالح ژی سۆز ب وان داییه ژ بۆی ڤێ ئارمانجێ ئالیكاریێ بكه.
چاڤكانیێن پێگه‌ها «داركا مازی» ئا‌شكه‌را كر كو د جڤینێ دا به‌رهه‌م سالح گۆتیە شاندێ په‌كه‌كێ كو ئه‌و كوشتنا زارۆكه‌كێ ئێزدی ل سنوونێ شه‌رمه‌زار دكه، لێ به‌لێ چ ئاماژه ب وێ یه‌كێ نه‌كر كو 4 كادرۆیێن په‌كه‌كێ یێن نه ئیراقی د عه‌ینی باره‌گه‌هێ دا هاتبوون كوشتن.
چاڤكانیێن پێگه‌ها «داركا مازی» ئا‌شكه‌را كر، به‌رهه‌م سالح ژ بۆ كو چه‌كدارێن په‌كه‌كێ ب فه‌رمی ته‌ڤلی ره‌فێن حه‌شدا شه‌عبی بێن كرن، جڤینه‌ك ژ بۆی وان ل گه‌ل قه‌یس خه‌زعه‌لی رێكخست و ل سه‌ر داخوازییا به‌رهه‌م سالح، قه‌یس خه‌زعه‌لی دوهـ رۆژا سێشه‌می 21/6/2022 ل گه‌ل شاندێ په‌كه‌كێ جڤیا.
خه‌زعه‌لی ل ئۆفیسا خوە یا ل بەغدایێ پێشوازیا شاندێ شنگالێ و په‌كه‌كێ كر، داوود جوندی بەرپرسێ ناڤەندا رێخستنێن یەنەکێ ل شنگالێ سه‌رۆكاتییا شاندێ كر.
شاندێ ناڤبووری ب هوورگلی دەربارێ ئێش و ئازارێن نشتەجهێن باژێر ژ بۆی خه‌زعه‌لی ئاخڤی و ژێرا گۆت: «دخوازین هوون هێزه‌كا حه‌شدا شه‌عبی بشینن شه‌نگالێ ژ بۆ كو شه‌نگال پاراستی به»، خه‌زعه‌لی ئه‌ڤ داخوازییا وان وه‌رگرت و سۆز ب وان دا كو ئالیكارێ وان به و هه‌ول بده حه‌شدا شه‌عبی د شه‌نگالێ دا جیهـ بگره.
هه‌ولێن به‌رهه‌م سالح یێن مه‌شرووع كرنا هێزێن په‌كه‌كێ د شه‌نگالێ دا و هه‌ولێن چێكرنا شریكاتییه‌كا نوو دنێڤبه‌را یه‌نه‌كێ و په‌كه‌كێ دا ل وێ ده‌رێ، به‌را كو مانۆره‌ك سیاسی به ل دژی گه‌ل و نوونه‌رێن ره‌سه‌ن یێن شه‌نگالێ، ب فیتا ئیرانێ و چارچووڤه‌یا هه‌ماهه‌نگیێ هاتییه، ژ به‌ر كو به‌رهه‌م باش دزانه، یێن كو شه‌نگالییان وه‌كه نوونه‌رێن خوه د هلبژارتنا داوین یا پارلمه‌نتۆیا ئیراقێ دا هلبژارتین، نامزه‌دێن كیژان پارتییا كوردستانی بوون، هه‌ر وها باش دزانه گه‌لێ ره‌سه‌نێ شه‌نگالێ ب تو ئاوایی نامه‌زدێن په‌كه‌كێ، حه‌شدا شه‌عبی و هه‌ر وها یێن پارتییا به‌رهه‌م سزا دان، لوما ته‌ڤگه‌را به‌رهه‌م سالح و ئه‌رك و کارێن وی یێن نه‌سالح چ باندۆرا خوه ل شه‌نگالێ ناكه.
