د 6ێ تیرمەھێ دا ل ئامەدێ کەسەک ل بەر ئاڤاهیەکێ ب گولـلەیەکێ کو ل پشت ستوویێ وەکتبوو هاتبوو کوشتن. کەسێ کو ھات تەرۆرکرن سییاسەتمەدار «حکمەت فیدان» بوو. فەرمانا کوشتنا «حیکمەت فیدان» ژ قەندیلێ ھاتیە دایین. مراد قارایلان کو د وان سالان دا ناڤێ ژمارە یەکێ پەکەکێ بوو، ژ بۆ کوشتنا «حکمەت فیدان» ئەندامەکێ ھێزا تایبەتا پەکەکێ یێ ب ناڤێ «دەنیز ئوولاش» ھاتبوو ئەرکدارکرن. باھۆز ئەردال ب رێکا ملیسەکێ جۆلەمێرگی تەبانجەیەکا بێدەنگ ژ بۆ قاتلی رێکر ئامەدێ.
کوشتنا حیکمەت فیدان بەردەوامیا سیاسەتا پەکەکێ یا تنەکرنا ھەر کەسێ کو نە پەکەکەیە بوو. ئەڤ شێوازێ جینایەتێ ل باکورێ کوردستانێ ب کوشتنا «فەرید ئووزون» هاتە دەست پێ کرن. ئانکو پەکەکێ ب کوشتنا «فەرید ئووزون» دەست ب کوشتنا سییاسەتمەدار و سەرۆکێن کوردان کر لێ فەرقا «حکمەت فیدان» و یێن مینا «فەرید ئووزون» ئەو بوو کو حکمەت فیدان نە ناڤەکێ دەرڤەیی پەکەکێ بوو، وی ژیانا خوە د زندانان دا دەرباس کر و ل باکورێ کوردستانێ پشتگریا سیاسەتا پەکەکێ دکر.
حکمەت فیدان ل گوندێ «مەرسکا» یێ ناڤچەیا «مێردین ئۆمەرییا» ژ دایک بوویە. پشتی کو خواندنا خوە د سالا 1970یێ دا قەداندی، بوو مامۆستا. دەما ل گوندێ خوە مامۆستا بوو، د سالا 1976ێ دا لگەل پەکەکێ دا پەیوەندی چێکرن. لگەل دامەزرینەرێن پەکەکێ دا یێن مینا عەڤدلا ئۆجالان، مازلووم دۆگان و خەیری دورموش ھەڤالتی کر. د بجیهبوونا پەکەکێ یا ل ھەرێما مێردینێ دا یەک ژ کەسێن بباندۆر بوو. پشتی دەربەیا لەشکەری یا 12ێ ئیلۆنێ ئەو ھات گرتن. ل گرتیگەھا ئامەدێ یا کو ب ئیشکەنجەیێن گران دەرباسی دیرۆکێ بوویی دا گرتی بوو. د دۆزا پەکەکێ دا 10 سالان د گرتیگەھێ دا ما. د سالا 1991ێ دا ژ گرتیگەھێ دەرکەت، لێ دەما کو ژ ئالیێ پەکەکێ ڤە ھاتیە کوشتن ژی، ھێژ د دۆزا پەکەکێ دا 36 سال سزایێن گرتیگەھێ بەردەوام دکر.
پشتی کو ژ گرتیگەھێ دەرکەت، ب ئاوایەکێ ئەکتیف بەشداری خەباتێن سیاسی یێن پەکەکێ ل باکورێ کوردستانێ و ترکیێ بوو. د پارتیێن وەکی DEP و HDPێ یێن ل باکورێ کوردستانێ خەبتی. جیگرێ سەرۆکێ هەدەپێ بوو. د سالا 1995ێ دا، دیسا ژ بەر خەباتا خوە یا سیاسی، دەمەکێ کورت د زندانا «مالتەپە» یا ئەنقەرەیێ دا ھاتە راگرتن. د ھەر واری دا پشتگری دا تێکۆشینا کورد و کوردستانێ.
د سالێن 1995ێ، 1999ێ و 2002ێ دا ژ لیستەیا پارتیێن کوردی بەشداری ھلبژارتنێن پارلامەنتۆیێ بوو.
حکمەت فیدان کەسەکێ نژادپەرەست و وەلاتپارێز بوو. وی باوەری ب خوەبرێڤەبرنا کوردان ھەبوو. ب ڤێ ھەستێ ژ سالا 1976ێ ھەتا 2004ێ 29 سالان خزمەتا پەکەکێ کر. هەموو جورێن خەباتێن سیاسی مەشاندن. گەریلایێن بریندار دەرمانکرن و شەرڤان ژ بۆ پەکەکێ ئامادە دکرن.
د پێڤاژۆیا ھاتنا عەڤدلا ئۆجالان بوو ترکیایێ د سالا 1999ێ دا ل ھەمبەری خەتا ئۆجالان بێ باوەر بوو. دەما کو ئۆجالان گۆتیە ئەفسەرێ ترک، “دایکا من ترکە، ئەز دخوازم خزمەتا دەولەتا خوە بکم” حکمەت فیدان ژی وەکە ھەر کوردەکێ عاجز بوو. فیدان د سالێن 1980یێ دا ل زیندانا ئامەدێ راستی ئیشکەنجەیێن ھەری گران ھاتبوو، لێ ناڤێ هیچ یەک ژ ھەڤالێن خوە نەدا دەولەتێ و ل بەر خوە دا بوو. د وێ باوەریێ دا بوو کو ھەلوەستا ئۆجالان خیانەتە.
لێ ھکمەت فیدان خەلەتیا کو گەلەک سیاسەتمەدار دکن کر. وی ژی دفکری کو پکک ژ بلی ئۆجالان وێ خەتەکە وەلاتپارێزیێ بپارێزە. وی د گۆت “راستە ئۆجالان خیانەت کریە، لێ گەریلا ژی ھەنە، ئەزێ تێکۆشینا وان بدۆمینم.
لێ دەما کو رەفتارێن پەکەکێ یێن لگەل ئۆجالان دا و سەرپەرشتیکرنا وان ل سەر سیاسەتا باکور دیتی، وی دەست ب رەخنەکرنا پەکەکێ کر. وی نێزیکبوونێن کەسێن وەکی جەمیل بایک، موستەفا قاراسوو و ھتد ژ بۆ سیاسەتێ، شەری و کوردستانێ رەخنە دکر. نێزیکاتیا وان قەبوول نەدکر. رێز ژ تێکۆشینا پەکەکێ دگرت، لێ د وێ باوەریێ دا بوو کو پێدڤییە پەکەکە ھشمەندییا بەرێ دەرباس بکە. وی ددیت کو ب ڤی شێوازێ سییاسەتێ پەکەکە تەنێ کوردان مەحکوومی گرێکەک کۆر دکە.
وی پشتگری دا بزاڤا ب ناڤێ PWD کو ژ ئالیێ عۆسمان ئۆجەلان و نیزامەدین تاش ڤە ھاتبوو ئاڤاکرن
حکمەت فیدان د شوباتا 2005ێ دا، د جڤینا کو ل ئیزمیرێ ل «هۆتەلا کایا پرەستیژ» دا دهاتە کرن بەشدار بوو کو تێدا ئامادەکاریێن ئاڤاکرنا DTPێ دھاتن کرن و ب ئاشکەرا راگھاند کو ئەو دخوازن سیاسەتا باکورێ کوردستانێ ژ بن کۆنترۆلا پەکەکێ دەربێخن و گۆت، “ئەز باوەر ناکم تەڤگەرەک ژ بۆ دەمۆکراسیێ، مافێن مرۆڤان و دەولەتا یاسایی کار بکە د بەرژەوەندییا کوردان دا بە.”
ئەڤ ھەلوەستا حکمەت فیدان بوو سەدەم کو ژ ئالیێ پەکەکێ ڤە د لیستەیا خاینان دا جھ بگرە. دەستپێکێ کەسەکێ کو ل سەر ناڤێ مراد قارایلان لگەل فیدان دا ئاخڤتی، گۆت کو گەر ئەو گاڤان پاشدا نەهاڤێژە داویا وی باش نابە، ب ڤی رەنگی پشتی ھەفتەیەکێ حکمەت فیدان ھات کوشتن.
شارەداریێن نێزیکی پەکەکێ ژ بۆ راکرنا جەنازەیێ حکمەت فیدان دەتیریا راکرنا جەنازە ژی نەدان. نەهێلا خەلک بچن سەرساخیێ. پشتی هەفتەیەکێ، وان داخویانیەک بەلاڤ کر سەرساخی ژ بۆ وی خواست، مینا کو وی ب رێکەکا سرووشتی جانێ خوە ژ دەست دابە.
دووڤرا مستەفا قاراسوو وھا گۆت: “گەلێ کورد دزانە دێ ل جەنازەیێ کێ خوەدی دەربکەڤە یان ژی دەرنەکەڤە. کەس ل خایینان خوەدی دەرناکەڤە.”
یالچن کوچوک کو ئۆجالان دبێژیتێ مامۆستەیێ من ژی وھا گۆت: “مەسەلەیا حکمەت فیدان مەسەلەیا فەدەرالیزمێ یە و پارچەیەکە ژ یێکبوونا بارزانی” و وی ژی ل سەر ناڤێ دەولەتا ترک کوشتنا حکمەت فیدان پەژراند.
کوشتنا حکمەت فیدان بەسە کو ئەم بزانین کا چ ئیستیبدادەک ل بن پەیڤا دەمۆکراسییا کو پەکەکە قالا وێ دکە ھەیە. ژ سالێن 1970یێ ڤە پەکەکێ ب ھێزێن خوەیێن چەکدار و ب گەفخوارنێن خوە سیاسەتا باکورێ کوردستانێ داگیر و یەکدەستدار کریە. ل گۆری پەکەکێ “پێدڤییە ھەر کوردەکێ نە پەکەکەیی بهێت کوشتن”. کەسێ کو نە پەکەکەیی بە ب ناڤێ خایین، جەحش و سیخوریێ تێن کوشتن. حکمەت فیدان ژی تەنێ ژ بەر رەخنەیێن خوە ژ ئالیێ پەکەکێ ڤە رەغمێ کو 29 سالان خزمەتا وان ژی کربوو، ھات کوشتن.
