جەندەرمەیێن ترکیێ ل وانێ مینیبووسا کۆچبەران گولەباران کرن و د ئەنجامێ دا زارۆکەک 4 سالی جان دا و 12 کەس ژی بریندار بوون.
ھات راگھاندن، 3یێ تیرمەھا 2022یێ ل ناڤچەیا مەحمودیێ یا وانێ د خالەکا کۆنترۆلێ دا ھێزێن ئەمنی یێن ترکیێ مینیبووسەک گولەباران کرنە و د ئەنجام دا زارۆکەکێ جان دایە و 4 ژێ گران 12 کەس ژی بریندار بوونە.
ھەروھا ھاتیە ئاشکەراکرن، کەسێن بریندار راکرنە نەخوەشخانەیێ و 30 کەسێن د مینیبووسێ دا ژی ھاتنە دەستەسەرکرن.
ل گۆر داخویانیا پارێزگاریا وانێ: “3یێ تەمووزا 2022یێ دەردۆرا دەمژمێر 16:00 ل تاخا «کۆچباش» یا سەر ب ناڤچەیا مەحمودیێ ڤە جەندەرمەیان خواستنە مینیبووسەکا ب گومان ل خالا کۆنترۆلێ راوەستینن لێ شۆفێرێ مینیبووسێ رانەوەستیایە و جەندرمەیان گولە بەردانە تەکەرێن وێ لێ ئەو گولە ل زارۆکەکێ کەتیە و وی زارۆکی جانێ خوە ژ دەست دایە. ھەروھا 12 کۆچبەرێن د مینیبووسێ دا ژی ب سڤکی بریندار بوونە.”
پارێزگاریێ ھەروھا راگھاندیە کو پشتی بوویەرێ شۆفێرێ مینیبووسێ و کەسەکێ کو قاچاخچیتیا کۆچبەران دکن رەڤیانە و دەربارێ بوویەرێ دا لێپرسینا عەدلی و ئیداری ھاتیە دەستپێکرن.
ھەروھا کانالا مولتەجی مەدیا (مەدیایا پەنابەران) ل سەر تویتەرێ دیار کریە کو یەک ژن، یەک زارۆک ب گشتی سێ کەسان جان دانە و 7 کەس ژی ب گرانی بریندار بوونە.
