رێڤەبەرێ پەکەکێ جەمیل بایک لگەل رێخستنا مەدیایا پەکەکێ یا کو ل ئەورۆپایێ وەشانێ دکە ھەڤپەیڤینەک کر. جەمیل بایک د ھەڤپەیڤینا خوە یا رۆژا جەژنا قوربانێ دا گەلێ باشوورێ کوردستانێ ب سیخوریێ تاوانبار کر، پارتییێن کوردستانی ب ترسۆنەکیێ تاوانبار کرن، سەدەما تێکچوونا خوە یا ل باشوورێ کوردستانێ ژی کرە ستویێ گەلێ ھەرێمێ. بێ گومان، وەکە ھەر جار کەرب و کینا ھەری مەزن نیشانی پەدەکێ و بارزانی کر.

د رۆژەکا وەها دا کو دژمن ژی رێز و حورمەتێ نیشانی ھەڤ ددەن، لایقی جەمیل بایک بوو کو رابە و ھەڤپەیڤینەکێ ئەنجام بدە و دژمناھییێ د ناڤ کوردان دا بەلاڤ بکە. بایک د پەیاما خوە یا جەژنا نەورۆزێ دا ژی تۆڤێ دژمناتیی د ناڤا کوردان دا چاند بوو و ھێزێن پێشمەرگە ئارمانج کربوون. ئەڤە یا شاشە کو مرۆڤ ل بەندێ بیت کو جەمیل بایک باش باخڤیت؛ بایک ئەو کەسە یێ کو ل سەر  خوین، گیان و جەنازەیێن مرۆڤان دژیت، رێھەڤالێن خوە بێ دودلی کوشتینە، گولەیەک ژی نەئاڤێتییە دژمنی و ژ جھێ کو مەترسیدار بیت ژی ھەر دەم رەڤیایە… لەوما ژی ئەم تشتەکێ باش ژ بایک ھێڤی ناکن.

جەمیل بایک: ترکیا بێی پەدەکێ نکارە تشتەکی بکە

جەمیل بایک د ئاخافتنا خوە دا ب بوویەرا «فەرھاد شبلی» کو د ئێریشا ترکان یا ل کەلارێ دا ژیانا خوە ژ دەست دا دەست پێ کر، ھەول دا کو ھەموو ئەنجامێن پراکتیکا پەکەکێ یا بنکەفتی باڤێژە سەر کلتوورێ سیاسی یێ پەدەکێ و بارزانی. خەباتکارێن دارکامازی بەریا نھا ل سەر بوویەرا «فەرھاد شبلی» نڤیسیبوون و گۆتبوو دێ پەکەکە ڤێ بوویەرێ ژی هاڤێژیت سەر پەدەکێ. https://darkamazi.net/archives/1033081

پەکەکێ ئەم خاپاندین. ژ بەر کو پەکەکێ د دیرۆکا خوە دا ھەول دایە ھەموو خەلەتیێن خوە بکەتە ستویێ کەس و لایەنێن دن و وان ب خایینتی و ئاژانتیێ تاوانبار بکە. ھەتتا داگیرکەران تاوانبار ناکە تەنێ کوردان تاوانبار دکە.

جەمیل بایک گۆت، “ئەگەر پەدەکە ئیستیخباراتێ نەدە، دەولەتا ترک نکارە ل باشوور گاڤەکێ ژی باڤێژە و ونداھی ژی چێنابن.” لێ تێ زانین کو گەریلا ل باکورێ کوردستانێ ژ سالا 2016ێ ڤە ھاتیە تەسفیەکرن. ل چیایێن باکورێ کوردستانێ گەریلا ھەری زێدە ب سێ کەسان تەڤ دگەرن. تەمەنێ چ تیمەکا گەریلایان ژ دو سالان دەرباس نابە. ل ئەیالەتا دێرسم و ئامەدێ 4 سالان ل پەی ھەڤ فەرماندارێن وێ ھاتن تەسفیەکرن. ل گارزانێ گەریلا نینە. تەنێ دەم ب دەم ژ ئیرانێ چەند کەس دەرباسی سەرحەدێ ژ رۆژئاڤا ژی دەرباسی مێردین-گاپێ دبن ئەو ژی یەکسەر تێن ژناڤبرن.

پەکەکە نکارە ل باکورێ کوردستانێ یەک چالاکی پێک بینە. مە چالاکی دەرباس کر، ما نکارە بنگەھەکێ خوە ژی چێبکە. د راستیێ دا پەکەکێ ژ سالێن 2000ێ و ڤر ڤە تەنێ ژ بۆ کو چەرخێن خوە بزڤرینە، ب بەردەوامی شەرێ گەریلا یێ کەڤنار دوبارە دکە، جوانێن کورد دکە قوربانی. کەسێن وەکی جەمیل بایک د قادەکا بچووکا سیاسی و جوگرافی دا یا ب خوینا جوانێن کورد هاتیە ئازادکرن ژیانا خوە ب رەنگەکێ ئەولە دبۆرینن. نھا ژی ژ بۆ کو ڤێ راستیێ ڤەشێرن، ھەول ددن کو پەدەکێ ژ بۆ وان بنکەتنێن خوە یێن کو ل باشوور دیتنە تاوانبار بکن.

د دەستێ جەمیل بایک دا هیچ بەلگەیەک کو پەیوەندیا پەدەکێ لگەل میتێ دا ئیسبات بکە نینە.

جەمیل بایک ئیدیعا دکە کو پەدەکە لگەل میتێ دا ھەڤکاریێ دکە و ھەموو ونداھیێن خوە دخە ستوویێ پەدەکێ دا. لێ راستی ئەڤە کو نە د دەستێ پەکەکێ دا و نە ژی د دەستێ جەمیل بایک دا هیچ بەلگە و زانیاریەک نینە کو پەدەکێ لگەل ترکیێ دا یان ژی لگەل وەلاتەکێ دن یێ داگیرکەر دا ھەڤکاریێ دکە. تاکە دەلیل ئەو نووچەیێن دەرەون کو رۆژنامەڤانێن وان ل سەر مێزەی ئامادە دکن. لێ د دەستێ مە دا بەلگەیێن جدی ھەنە کو نیشان ددن پەکەکە، عەڤدللا ئۆجالان و جەمیل بایک لگەل وەلاتێن داگیرکەر دا کار دکەن.

پەیوەندیا سەرکردایەتیا پەکەکێ یا لگەل داگیرکەران دا ب ئیسباتە

ئەم دەست ژ دیرۆکێ بەردەین، ھەما د ڤان سالێن داوی دا جەمیل بایک ل «مێرگەپانێ و قەلاچۆلانێ» د ئاڤاھییێن کو ئیرانێ ژ بۆ وی تەرخان کرنە دا دژییا، گەلۆ بایک چ دایە ئیرانێ؟ مستەفا قاراسوو د زڤستانا بۆری دا چاوا دھات و دچوو تەھرانێ؟ ئەو بەرییا چەند رۆژان ژ بۆ نەخوەشخانەیێ ڤەگەریا تەھرانێ. ئەڤجا ئەڤە بەرامبەر چ دهێت کرن؟

یان ژی ژ بەر کو وە جوانێن ھەر چار پارچەیێن کوردستانێ ل شنگالێ کۆم کرینە و لۆگۆیێ حەشدا شەعبی یا کو ھەردەم ھەولێرێ مووشەکباران دکە، لێ کرنە. بێگومان پەکەکە کارمەندا ئیرانێیە. جەمیل بایک ل زاپ و ئاڤاشینێ جوانێن کورد داڤێژە پێشییا ئارتێشا ترکیێ. ل شەنگالێ ژی خستنە ھەمێزا حەشدا شەعبی یا دژمنێ کوردان.

عەڤدلا ئۆجەلان، مێعمارێ پرۆژەیا ئۆسمانیانە

جەمیل بایک د ئاخافتنا خوە دا گۆت، “ھەڤکارێ ھەری مەزن یێ میتێ بارزانییە. ھەر کەس ڤێ یەکێ دزانە” نا نا، ھەر کەس ڤێ راستییا کو عەڤدللا ئۆجەلان شێورمەندیێ ژ بۆ دەولەتا ترک دکە باش دزانە.

یێ کو گۆتیە، “بارزانی مەترسیدارە، ئەو دێ لگەل ویلایەتێن یەکبوویی یێن ئەمەریکایێ دەولەتا کوردی دامەزرینن، لەوماژی پێدڤیە ترکیا و پەکەکە ب ھەڤ را ھەولێرێ دۆرپێچ بکن” عەڤدللا ئۆجەلان ب خوەیە. ھەموو ڤیدیۆیێن ڤان ئاخفتنێن ئاپۆ ژی ل بەر دەستن و هەر کەسەکێ دیتینە. قەید و ئیفادەیێن ئاپۆ یێن ل دادگەھێ ژی ھەنە.

عەڤدللا ئۆجەلان و پەکەکە گارانتۆرێن پەیمانا میساقا مللی یا ترکییێ نە.

ھەڤکارێ ھەری مەزنێ میتێ پەکەکەیە کو ژ بۆ ترکیایەکا دەمۆکراتیک ب ھەزاران جوانێن کورد ددەت کوشتن.

پەکەکە دچیتە هەر جیهەکێ مرنێ ژی لگەل خوە دا دبەت وی جیهی

جەمیل بایک نکاریبوو لەزا خوە کێم بکە و گۆت، “ئەگەر بارزانی لگەل میتێ دا ھەڤکاری نەکربا، ئیرۆ رەوشا گەلێ کورد دا گەلەک باشتر بە. ژ بەر کو کورد ب دەرفەتێن د دەستێ خوە دا دکارن ل رۆژھلاتا ناڤین ژیانەکا خورت بمەشینن. لێ پەدەکە و بارزانی پێشیا ڤێ یەکێ دگرن.”

د راستیێ دا پەکەکێ ل جھێ کو کەتیێ ژیانێ د تەمرینە. مینا ھێزا پێشەنگا دەولەتا ترک، ھەر جییێ کو د چیتێ دەولەتا ترک ژی لگەل خوە دا دبەتێ. پەکەکە ھەر جیهێ کو چوویێ، هەموو جورێن نرخێن جڤاکی، ژیانا مرۆڤان، ھەبوونا مالباتێ، بەرژەوەندیێن جڤاکی ژناڤ دبە. ژ بەر ڤێ سەدەمێ ھەر جیهێ کو پەکەکە دچیتێ ل ور ئالۆزی، ئاژاوە، بێھێڤیبوون، مالوێرانی، هەژاری و مرن زێدە دبە.

ھەر کەسێ کو ل باکورێ کوردستانێ لگەل پەکەکێ دا پەیوەندی هەبوونە کۆچبەر بوونە، ھاتنە ئاسیمیلەکرن و زارۆکێن خوە وندا کرنە. زارۆکێن مالباتێن کو ل ئەورۆپایێ د ناڤا پەکەکێ دا جھ دگرن، کەتن کۆلانان، خوەندنا خوە هێلا و بوونە مافیا. ئەم بەحسا رەوشا عەفرین، جزیرێ و سوورێ ژی ناکن. پەکەکە ژ خەرجکرنا گییانێ مرۆڤان مفا وەردگریت لەوما ژی حەز ژ مرنێ دکە و د پارێزە.