ئارتێشا تركیێ گونده‌كێ ستراتیجی ل به‌رواری بالا گرت
ئارتێشا ده‌وله‌تا ترك یا داگیركه‌ر د رییا كه‌ڤن یا سه‌رزیری ره ده‌رباسی ناڤچه‌یه‌كه دن یا به‌رواری بالا بوو، ئه‌ڤ 3 رۆژن ژی رێخستنا په‌كه‌كێ ئه‌و ناڤچه ژ بۆی ئارتێشێ چۆل كرنه.
چاڤكانیێن تایبه‌ت یێن پێگه‌ها «داركا مازی» ئه‌شكه‌ره كرن، ئیرۆ رۆژا یه‌كشه‌می 17/7/2022ێ ئارتێشا تركیێ ده‌رباسبوونا له‌شكه‌رێن خوه د رییا كه‌ڤن یا سه‌رزێری ره ژ بۆی گوندێن به‌رواری بالا ده‌وام كرییه و ده‌ستنیشان كر، نها گهیشتنه گوندێ هه‌لوا نه‌سارا كو دێ نوقته‌یێن خوه ل ور ئاڤا بكن.
گوندێ گوندێ هه‌لوا نه‌سارا یێك ژ گوندێن ده‌ڤه‌را به‌رواری بالا یه، دكه‌ڤه خه‌تا سینۆر، گرێدای ناڤچه‌یا كانی ماسێ – قه‌زایا ئامێدیێ یه، ئه‌ڤ گوند ب خوه‌زایا خوه چیایی و بلنده، لڤ و ته‌ڤگه‌رێن چه‌كدارێن په‌كه‌كێ ب سالانه ل دۆرا گوند و ده‌ڤه‌رێ هه‌یه.
ل گۆری ئاگاهیێن ده‌ستێ مه، ئارتێشا تركیێ 3 رۆژان به‌رێ ده‌رباسبوونا خوه یا به‌ر ب گوندێ ستراته‌جی یێ ب ناڤێ «هه‌لوا نه‌سارا» ڤه ده‌ستپێكریه و هێژان ده‌وام دكه، رێخستنا په‌كه‌كێ ژی كو لڤ و ته‌ڤگه‌را وێ ل هه‌رێمێ هه‌یه، ئه‌ڤ ده‌ر چۆل كرن و یێك گوللـه به‌ر ب ئارتێشێ ڤه نه‌ته‌قاندن و ژ ور بازدانه.
پێگه‌ها داركا مازی هین بوو كو ل حه‌فته‌یا رابووری رێخستنا په‌كه‌كێ 3 چه‌كدارێن خوه شاندبوون گوندێ «بیگداودا – گه‌لیكێ» واته گوندێ «ئالیخان» یێ نوو – ((گه‌لیكێ ئه‌و گونده كو ل ئۆكتۆبه‌را سالا 2020ێ چه‌كدارێن په‌كه‌كێ غازی ئالیخان برێڤه‌برێ ئاسایشا ده‌ریێ سینۆر یێ سه‌رزێرێ لێ شه‌هید كری))، ئه‌ڤ گوند نێزی گوندێ تروانشێ یه، بالافرێن جه‌نگێ یێن تركیێ ب وێ سه‌ده‌مێ ناڤه‌ندا گوند بۆمبه‌باران كر، دو ژ وان چه‌كدارێن په‌كه‌كێ كوشتن و یه‌كێ دن فه‌له‌تی.
چاڤكانیێن مه ده‌ستنیشان كرنه كو لڤ و ته‌ڤگه‌را په‌كه‌كێ ل دۆرا گوندێ گه‌لیكێ هه‌نه و ئه‌ڤ له‌شكه‌ركێشیا نوو یا ئارتێشا تركیێ یا كو د رییا كه‌ڤن ئا سه‌رزیرێ ره ده‌ستپێكریه پاش بوویه‌را گوندێ گه‌لیكێ هاتیه، ئاگاهی هه‌نه كو ئارتێشا تركیێ ب رییا هه‌وایی ژی ل دۆرا گه‌لیكێ دا ژ بالافران داكه‌تبوون.
رێخستنا په‌كه‌كێ ل گۆری پیلانه‌كه ژێر ب ژێر كو ل نێڤبه‌را وێ و تركیێ ده هه‌یه، ژ سالا 2020ێ ڤه ب ئاوایه‌كی سیستماتیك شه‌رێ خوه یێ ساخته ل دژی تركیێ ده‌رباسی كووراهییا خاكا هه‌رێما كوردستانێ دكه، ئه‌ڤ پیلان ب 4 قوناغان هات بجیكرنه ئێنجام ژی ده‌هان گوند و ناڤچه د ڤان دو سالان ده بوون ناڤچه‌یێن شه‌ر و شه‌رێ كو به‌ریا 2020ێ ل خه‌تا سینۆر دهات دیتن، ئیرۆ گهایه ناڤه‌ندا گوند و دۆربه‌را باژارۆكان.
