رێخستنا په‌كه‌كێ د سالڤه‌گه‌را 10ێ یا «شۆره‌شا رۆژئاڤا» ده داخویانی ل ئاستا ژوور دان هه‌ما ب كورتاسی گۆت: «ب خێرا ئاپۆ رۆژئاڤا بوویه رۆژئاڤا»، كه‌د و زه‌حمه‌تیا گه‌ل ژ بۆ ئاپۆ حه‌ساب كر، هه‌ما هه‌ما نه‌گۆت هه‌گه‌ر نه ژ ئاپۆ به چپكا بارانێ ل رۆژئاڤا ناباره.
ل گه‌ل ده‌ستپێكرنا شه‌رێ ناڤخوه یێ ل سووریێ، ده‌رفته‌ك زێڕین ژ بۆ كوردێن رۆژئاڤا ده‌ركه‌ت هۆلێ كو مافێن خوه ده‌ست بخن، لێ به‌لێ هه‌ر د زوو ده ره‌ژیما ئه‌سه‌د پارتیا یه‌كیتیا ده‌مۆكراتیك، باسكێ په‌كه‌كێ یێ رۆژئاڤا ئه‌ركدار كر كو ل دژی لڤ و ته‌ڤگه‌را كوردان ده‌ركه‌ڤن، ل وێ ده‌مێ په‌كه‌كێ چریسكا «شۆره‌شا راسته‌قینه» یا كوردی ل ور بێده‌نگ كر و قه‌تلعام چێكرن، ب كورتاسی په‌یه‌دێ پێش ره‌ژیما ئه‌سه‌د ڤه شه‌ره‌كی ب وه‌كاله‌ت ل دژی كوردان مه‌شاند.
د قۆناغا دویه‌مین ده كو ده‌ركه‌تنا ته‌رۆرا داعشێ بوو، گه‌لێ رۆژئاڤا به‌رخوه‌دان ده‌ستپێكر و كارين پاش پێتری 11 هه‌زار شه‌هید و 22 هه‌زار برینداران سه‌ربكه‌ڤن، لێ به‌لێ په‌كه‌كه كه‌ت ڤێ په‌رچه‌یا وه‌لات ده و گۆت هه‌ر تشت مه كرییه، وێ چ حه‌سابه‌ك ژ بۆی خوینا هه‌زاران شه‌هیدان نه‌كر، گۆت تشتا كو چێبووی ب پارادیگمایا ئاپۆ پێكهاتییه!.
په‌كه‌كه د سالڤه‌گه‌را شۆره‌شا رۆژئاڤا ده چ په‌یامه‌كێ دده تركیێ
په‌كه‌كێ ناڤی كوردستان ل ور قه‌ده‌غه كر، ئالا كوردستانێ قه‌ده‌غه كر، هه‌ری داوی ناڤێ رۆژئاڤا ژی قه‌ده‌غه كر و گۆت ئه‌ڤ ده‌ر باكور و رۆژهلاتا سووریێ یه، ئالا وێ ستێركا په‌كه‌كێ و سه‌مبۆلا وێ وێنه‌یا زه‌لامێ ئیمرالیێ یه! ئێنجاما ڤێ هه‌نگاڤا په‌كه‌كێ ژی داگیركه‌رییا رۆژئاڤا و ژده‌ستچووینا عه‌فرین، سه‌رێكانیێ وگرێ سپی بوو.
19 تیرمه‌ها 2022ێ دێ 10 سال ب سه‌ر ڤێ به‌رخوه‌دانا رۆژئاڤا دا ده‌رباس بن، ته‌ڤی كو ئیرۆ ژی ئه‌ڤ په‌رچه‌یا وه‌لات ل همبه‌ر گه‌فا داگیركه‌ریه‌كه نوو یا تركیێ یه، لێ به‌لێ په‌كه‌كه رابوویه عه‌ینی سالا 2018ێ كریه و ل ئاستا ژوور داخویانی دانه، په‌كه‌كێ د په‌یامێن خوە ده ئیشاره‌ت دایه ده‌وله‌تا ترك كو پەکەکە و ئاپۆ خوه‌دیێن رۆژئاڤا نه، پرسا ل ڤر تێ كرن ئه‌ڤه: گه‌لۆ ئارمانجا په‌كه‌كێ ژ ڤان په‌یامان چی یه؟ هه‌گه‌ر نه ئیستفزاز و راكێشانا پێتر یا ده‌وله‌تا ترك بیت ژ بۆی كووراهییا رۆژئاڤا!.
ئاپۆ: تشته‌ك نینه ب ناڤێ رۆژئاڤا كوردستانێ
رێبه‌رێ زیندانكری یێ په‌كه‌كێ د نۆتێن ئیمرالیێ ده وه‌ختا به‌حسا رۆژئاڤا كوردستانێ دكه دبێژه: تشته‌ك نینه ب ناڤێ رۆژئاڤا كوردستانێ، كوردێن كو ل ور هه‌نه، ل سالێن به‌رێ ژ باكورێ كوردستانێ ره‌ڤیانه و ل ور بجیهـ بوونه.
گه‌لۆ كو ئه‌ڤ نه‌رینا رێبه‌رێ په‌كه‌كێ به ل سه‌ر رۆژئاڤا، قه‌ی رێخستنا ڤی رێبه‌ری وێ چ خێره‌كێ بۆ گه‌لێ ڤێ په‌رچه‌یا وه‌لات چێبكه، رێخستنه‌ك كو هه‌موو پارتیێن وه‌لاتپارێز ئیمها كربن و ته‌كئالی ده‌ستهلات گرتبه ده‌ستێ خوه، وێ چ ده‌ستكه‌فتیان بۆ رۆژئاڤا چێبكه، رێخستنه‌ك كو دبێژه تشتا ل رۆژئاڤا پێكهاتی ب خێرا ئاپۆ پێكهاتیه و كه‌د و زه‌حمه‌تیا گه‌لێ وێ ژ بۆ خوه حه‌ساب بكه وێ چاوا پاشه‌رۆژه‌كێ بۆ وان ئاڤا بكه.
ب كورتاسی ل سالا 2018ێ په‌كه‌كێ وێنه‌یێن ئاپۆ بلندكرن و ب ڤان کارێن پرۆڤاکسیۆن تركیێ سێ باژارێن مه‌زنێن رۆژئاڤا داگیركرن، ئیرۆ ژی په‌كه‌كه هاتیه و جاره‌كه دن دبێژه تركیێ: ئه‌م خوه‌دیێن رۆژئاڤا نه، یار راست په‌كه‌كێ یێك ئارمانج ژ ڤان په‌یامان د ڤێ ده‌مێ ده هه‌یه، ئه‌و ژی رێخوه‌شكرنا ل به‌ر داگیركه‌ریه‌كه نوو یا تركیێ یه.
