هونەرێ کۆلاجێ و موراد قارایلان! به‌شا «2»
د به‌شا دن ئا گۆتارا مورات كارایلان ده كو د رۆژا 8ی تیرمه‌هێ ده ل ئاژانسا ئانفێ یا په‌كه‌كێ هاتبوو پارڤه‌كرن و مه ب هونه‌را كولاجێ شوبهاند، كارایلان دبێژه ئیرۆ گه‌لێ ترك ژ ئارته‌شا ده‌وله‌تا خوه ڤان پرسان دكه:
هوون ل ئامێدیێ چ دكن؟ وه گه‌ل برسی هشتیه، زاته‌ن خه‌ته‌ریا كو هوون ل سه‌ر تركیێ چێدكن مه‌زنه، ت ئیشێ وه ل باشوورێ كوردستانێ هه‌یه؟ هوون نكارن ب كوشتنێ پارتیا كاركه‌ران تونه بكن، هوون نكارن ب كوشتنێ گه‌لێ كورد و دۆزا كوردان ئیمها بكن.
ژ خوه جه‌مال فێم دكه كو ئه‌ڤ پرس پر لوژیكن و مه‌رۆڤ دكاره نرخاندنێن كوور ل سه‌ر ئه‌ساسێ وان پرسان بكه، لێبه‌لێ یاراست گه‌لێ ترك ب پرسێن وسا موخاته‌بی ئارتێشا ده‌وله‌تا خوه نه‌كرنه، ژ به‌ر كو جه‌مال ژ هه‌ر كه‌سی باشتر دزانه كو گه‌لێ ترك پرانی ژێ چقاس نه‌ژادپه‌ره‌ستن، چقاس نه‌ژادپه‌ره‌ستی دژی كوردان بكارئانیه، هوون ژ هه‌ر كه‌سی باشتر دزانن گه‌لێن 4 ده‌وله‌تێن داگیركه‌ر ته‌یبه‌ت ترك، چقاس ژ پارتیا وه حه‌ز دكن، پارتیا كو پێتری داگیركه‌ران دژاتیا نه‌ته‌وه‌یا كورد كری.
گه‌ر مه‌رۆڤ تركان باش ناس نه‌كه و گوهدارییا پرسێن جه‌مال ژێره دبێژه كو گه‌لێ ترك ژ ئارتێشا ده‌وله‌تا خوه كرنه، وێ وسا فێم بكه كو ترك نه‌ته‌وه‌یه‌ك پر مه‌رۆڤدوسته و ڤینه‌كه مه‌زن ژ بۆی كوردان هه‌یه، لێ یاراست نه وسایه، ژ به‌ر كو هوون ژ هه‌ر كه‌سی باشتر دزانن په‌رگالا برێڤه‌برنا تركیێ ژ بۆی نه‌ته‌وه‌یا ترك ده‌مۆكراتیكه و ژ بۆی نه‌ته‌وه‌یێن نه‌ترك فاشیست و كه‌ڤنه‌شۆپه، ئه‌ڤجا ئه‌ڤ نه‌ته‌وێن نه ترك د هوندرێ تركیێ ده بن یان ل ده‌رڤه‌ی سینۆرێن ده‌وله‌تا تركیێ بن.
پرسێن كو وه ل جیهێ نه‌ته‌وه‌یا ترك كرنه ل دژى داخویانى و ئانالیزێن پارتیا وه‌نه كو به‌رێ هاتنه پارڤه كرن و ژ خوه وه ب ده‌ڤێ خو گۆتبوو: ئه‌ڤ شه‌ر ئاكه‌پێ ئه‌نجام دایه ژ بۆ كو دلسۆزیا تركان د هلبژارتنا پێش مه ده ب خوه ره بكشینه.
واته شه‌ركرن دخزمه‌تا ئاكه‌پێ ده یه، ئه‌ڤ ژی دو نه‌رینێن هه‌ڤدژن.
ئه‌م به‌حسا پرسان بكن و كانێ ت بنگه‌هه‌ك ئه‌ساس گرتنه و ب ت ئاوایی هونه‌را كۆلاجێ تێ ده هاتیه بكارئانین.
ئاپێ جه‌مال، ئه‌ڤ نه‌پرسێن گه‌لێ تركیێ نه، لێبه‌لێ تام یێن گه‌لێ كوردن، ته‌یبه‌ت كوردێن باشوورێ وه‌لات ئه‌ڤان پرسان ژ رێخستنا په‌كه‌كێ دكن و ژێره دبێژن:
گه‌ریلا ل ئامیدیێ و گارێ، شه‌رانشێ و كانی ماسێ چ دكن؟
هوون باش دزانن باشوور ئازاده و ئیرۆ رێڤه‌بریه‌كه كوردی هه‌یه، باشوورێ كو ب خوینا هه‌زاران شه‌هیدان د شۆره‌شێن ئیلۆن و گولانێ ده و هه‌ر وها سه‌رهلدانێ هاتیه رزگار كرن، گه‌ر ئه‌ڤ په‌رچه‌یا وه‌لات یا خوه‌سه‌ر نه‌با هوون و رێخستنا هوون ته‌مسیل دكن، نه‌دكارین تێ ده بمینن یان د یێك مه‌ترۆیا وێ ده باره‌گه‌هێن خوه ئاڤا بكن.
كوردێن باشوور هه‌ر وها ژ په‌كه‌كێ دپرسن: ئێشێ وه ل باشوور چ یه؟
كوردێن باشوور د سالا 1991ێ سه‌رهلدان و كوردستان رزگار كر و ب ئاوایه‌كی ده‌مۆكراتیك پارلمه‌نتۆ و حكوومه‌ته‌كه كوردی ئاڤا كرن، پشتره كارین مافێن فه‌ده‌رالی د ده‌ستوورا بنگه‌هین ئا ئیراقێ ده ب جیهـ بكن.
گه‌لێ باشوور دبێژه په‌كه‌كێ:
ئه‌ڤ چ سیاسه‌ته‌كه هوون د مه‌شینن كو بنگه‌ها وێ ژناڤبرنا حكوومه‌تا كوردستانێ ئه‌ساس دگره؟ حكوومه‌تا كو ب قاسی كه‌ڤرێن چیایێن مه‌تین و گارێ شه‌هید دانه، دڤێ هوون بزانبن كو پارتیێن سیاسی یێن باشوورێ وه‌لات فه‌رسه‌ندێ ژ بۆی وه چێناكن كو ئه‌ڤ حكوومه‌ت ژ هێلا وه ڤه بێ تێكبرن.
ئه‌ڤ پارتی ته‌ڤی كو د ناڤا خوه ده یێك ژی نه‌بن، لێ به‌لێ ئه‌ڤ نایێ وێ واته‌یێ كو وێ ب وه ره ژ بۆی تێكبرنا هه‌ڤدو ببن دۆست.
