ھەر کەس ھەمفکرە کو ئێریشا پەرەخێ ئێریشەکا ل سەر ھەبوونا ھەرێما کوردستانێیە. دو ئالیێن کو نە ھەمفکر ھەنە. یا یەکەم دەولەتا ترکە، یا دویەمین ژی ھەدەپەیە. ھەر دو ژی ھەول ددەن کو مەسەلێ ب کوردان ڤە گرێبدەن. دەولەتا ترک ڤێ یەکێ وەکە “ئێریشا تەرۆرێ” ب ناڤ دکە و ھەدەپە ژی دبێژە کو “پەدەکێ پیشییا ڤێ ئێرشێ ڤەکرییە”.
ب راستی ئەم ژ ئێریشا دەولەتا ترکا ل سەر کوردان ناترسین. دەولەتا ترک 100 سالن ئێریشی کوردان دکە. ئەم ژ ھەدەپەیا کو جلووبەرگێن کووردی ل خوە کری و ئێریشی کوردان دکە دترسین. ژ بەر کو ھەدەپە ڤەگوھەریە بزاڤەکەێ کو ب جل و بەرگ و ب ناڤێ کوردان، پشت ڤە خەنجەرێ ل کوردان ددە.
پەرەخ ھات تۆپبارانکرن. ئەڤ ئێرش ژ بۆ ھەرێما کوردستانێ دەربەک مەزن بوو. ھەرێما کوردستانێ ھەم د وارێ سیاسی، ھەم ژی د وارێ ئابۆری و ھەم ژی د وارێ ئەولەھیێ دا برینەک مەزن خوار. لێ ھەدەپێ دەسپێکێ ئێریشی ھەرێما کوردستانێ کر. کۆمەک ب پێشەنگیا پارلامەنتەرا ھەدەپێ یا وانێ «مووئازەز ئۆرھان» ل وانێ پانکارتا “کوژەر ئاکەپە و پەدەکە نە” راکرن. پشترا یەک ژ ھەڤسەرۆکێن بەرێ یێن ھەدەپێ «سەزای تەمەلی» ژی گۆت، “ژ بەر کو پەدەکە بوویە سەدەما ڤێ یەکێ ئەڤ بوویەر پێک تێ.” پشتی ڤێ یەکێ جیگرا سەرۆکێ گشتی یێ ھەدەپێ «توولای حاتمۆغولار» ئاخڤی و گۆت، “پەدەکێ رێ ل بەر ئۆپەراسیۆنێ ڤەکر”.
ئەم لێ زێدە بکن کو ل کێلەکا ڤان ئاگاھیان ھەم دەم «سەزا تەمەلی و توولای حاتمۆغولار نە کوردن و ھەردو ژی ژ چەپێن ترکانن. توولای حاتمۆغولار ھەڤسەرۆکا بەرێ یا پارتیا رزگاریخوازا سۆسیالیستیا چەپێن ترکان بوو.
ئەم ل دیمەنێ دنێرن، ھەرێما کوردستانێ زەرەرمەندە لێ دیسا ھەرێما کوردستانێ دهێت تاوانبارکرن. ھوون ل ھەدەپا کو دبێژە پەدەکە بەرپرسیارە نەنێرن، ھەدەپە ب پارادیگمایا خوە ڤە دژمناتیا ھەرێما کوردستانێ دکە، ئەو بەردەڤکێ دەولەتا ترکن. مژارا سەرەکی ئەوە دەولەتا ترک و ھەدەپە ھەبوونا حکوومەتا فەدەرالا کوردستانێ قەبوول ناکن.
ئەرێ راستە. ژخوە ژ بۆ ڤێ ھەدەپە ھاتیە ئاڤاکرن. کەسێن کو نزانن ھەدەپە چاوا ھاتیە ئاڤاکرن ھەتا نھا نکارن فێم بکن کا چما ھەدەپە ل دەرڤە و ل ھەمبەری پەدەکێ دەرکەتیە.
بەلێ، ئەڤ راستییە. ل رۆژھلاتا ناڤین دەولەتا ترک و پەکەکە سەرکێشییا ھێزێن کو ناخوازن کورد ب سەرێ خوە خوەرێڤە ببن دکە. پەکەکە ژی دبێژیتە ئالا کوردستانێ ئالا پەدەکێ. دەولەتا ترک دبێژیت باکورێ ئیراقێ. ھەردو ھێزان ژی قەبوول نەکرن کو د شەخسێ پەدەکێ دا کورد ببن خوەدی پێکھاتەیەکا رەوا و فەدەرال. و ل ڤر ب ھەڤکاریا ڤان ھەر دو پێکھاتەیێن دەولەتا ترک- پەکەکێ ھەدەپە ھاتە ئاڤاکرن. ئۆجەلان و ھاکان فیدان بنیاتێ ھەدەپێ د 15ێ جۆتمەھا 2012ێ دا ل ئیمرالییێ دانا. نە کو تەنێ ئەم ڤێ دبێژن، عەڤدللا ئۆجەلان ب خوە و وەزیرێ ناڤخوەیێ بەرێ بەشیر ئاتالای ڤێ یەکێ دبێژن.
ئۆجالان ب خوە ژی ئەڤ یەک ژ بۆ شاندا کو د 14ێ نیسانا 2013ێ دا لگەل وی دا ھەڤدیتن ئەنجامدای، پەروین بولدان و سری سورەیا ئۆندەر ئەڤ یەک گۆتبوو. ئۆجالان دبێژە وی ژ بۆ ھەدەپێ-ھەدەکێ لگەل شاندا میتێ دا ھەڤدیتن ئەنجامدایە و لگەل شاندا میتێ دا رێککەفتینە کو ئەڤ پێکھاتە ئانکو ھەدەپە چەپگر بن. ئەڤ ئاخافتن ب بەلگە نە. یانی ئۆجالان و موستەشارێ میتێ ھاکان فیدان بریار دان کو ھەدەپە ببیتە پێکھاتەیەکا چەپێن ترک. ھەبوونا چەپێن ترکان د ناڤا بزاڤێن کوردان داە جھێ گومان و شکێیە. ژ بلی چەند کەسێن ترک یێن دورست پێڤە، ژ سالێن 1970یێ هێرڤە چەپێن ترکیێ د ناڤ حەرەکەتێن کوردان دا تەنێ نوونەراتییا دەولەتا ترکا یا کوور و ئیستخباراتا ترک میتێ کرنە. گەر ھوون ل دیرۆکا تەکۆشینا 40 سالان یا باکورێ کوردستانێ بنێرن ھوونێ ڤێ یەکێ پر ب زەلالی ببینن.
وەزیرێ کارێن ناڤخوە وێ دەمێ بەشیر ئاتالای د 14ێ تیرمەھا 2012ێ دا دگۆت “میتێ ھەدەپە ئاڤا کر”. ھەمان ئاتالای د 30ێ خزیرانا 2015ێ دا گۆت، “راستی رەخنە ل سەر ھەدەپێ ھەبوون. مە د سیاسەتێ دا رۆلەکێ کاریگەر دا ھەدەپێ و مە ھەدەپە ب ھێز کر.”
بەلێ، بێیی کو هوون ڤێ راستیێ ببینن، ھوون نکارن رابن و ببێژن کورد دەنگێن خوە ددەنە ھەدەپێ، ھەدەپە پارتییا کوردانە. بەلێ، د ناڤ ھەدەپێ دا کوردێن وەلاتپارێز ھەنە، د ناڤ ھەدەپێ دا کوردێن کو راستی زلمێ ھاتنە ھەنە، د ناڤ ھەدەپێ دا ژی کوردێن رەسەن ھەنە. لێ ھەدەپە نە د بن رێڤەبەرییا ڤان کوردێن وەلاتپارێز دایە. رێڤەبریا ھەدەپێ د دەستێ کەسێن لگەل پەکەکێ و میتێ دا رێککەفتی دایە و مەرجەعێن بریارێ نە.
د ناڤ ھەدەپێ دا یێن پیچەک وەلاتپارێزی لگەلدا ھەیی تێنە گرتن و درەڤن ڤی ئالی و ئالیێ هە، لێ بەلێ وەکیلێن چەپێن ترکێن وەک توولای حاتمۆغولار، سڕ سوورەییا ئۆندەر و ھتد، ب رحەتی ل جھێ خوە روونشتی نە.
ژ بلی ڤان پەکەکەییێن وەک «دیرایەت تاشدەمیر، عەلیجان ئوونلوو، تەییب تەمەل، فاتما کوورتولان، فەلەکناس ئوجا» ژی ھەنە. ھەر وھا ژ ستەنبۆل و ئەنقەرەیێ ب بالافرێ دچن سلێمانیێ و نامەیێن د ناڤبەرا ھەدەپێ و پەکەکێ دا تینن و دبن. لگەل سەبری ئۆک و بەسێ ھۆزات دا ھەڤدیتنان ئەنجام ددەن و ل ئەنقەرەیێ تەعلیماتان ددەنە ھەدەپێ. لێ ئەو ل جیێن خوەیێن رەحەت روونشتنە. چما گەنجەکێ ئامەدی ژ بەر درووشمەیان دهێت گولـلەبارانکرن، لێ ئەڤ کەسە قەت نایێن گرتن؟
یانی پەکەکە و میت ب ھەڤ را بریارێ ددەن کا کی بهێت گرتن و کی نەهێت گرتن.
بەلێ، پەکەکێ و میتێ ب ھەڤ را ھەدەپە ئاڤا کر. د دەما کو ھاتیە دامەزراندن دا، ژ بۆ کو کوردێن باکور ژ مافێ خوەرێڤەبەریێ دوور بخن و بخن ناڤا ھەولدانا دەمۆکراتیکبوونا دەولەتا ترک، ھاتن ئەرکدارکرن. سەدەم ئەڤەیە کو ھەدەپە ھەر جارێ ئێرشی پەدەکێ، پێشمەرگێ کوردستانێ و حکوومەتا ھەرێما کوردستانێ دکە. ئەو قاس بێ ئەخلاق و بێ ئەدەب ئێرشی سەر نرخێن نەتەوایا کورد دکن. ژ بۆ ڤێ ژی دەما کو ھەرێما کوردستانێ ژ بەر ئێریشا پەرەخێ د نالە ھەدەپە شوونا کو داگیرکەرییا ترک شەرمەزار بکە، دژی “پەدەکێ و بارزانی” مەش دارخستن و ئێرشی ھەرێما کوردستانێ کرن.
