بریارە رۆژا 30/7/2022 روفاتێن سەد ئەنفالبوویان ژ بۆ ھەرێما کوردستانێ بێن ڤەگەراندن و بێن ڤەشارتن.
سەرۆکا لژنەیا شەھیدان ل پارلامەنتۆیا کوردستانێ «سەوسەن میرخان» راگھاند: “ب بۆنەیا سالڤەگەرا 39ێ یا قوربانیێن جینۆسایدا بارزانیان کو رۆژا 31ێ تیرمەھا ھەموو سالەکێ یە، دێ رۆژا 30ێ تیرمەھا 2022یێ دەمژمێر 17:00ێ ئێڤاری 100 روفاتێن ئەنفالبوویێن دن ژ بۆ ھەرێما کوردستانێ هێن ڤەگەراندن.”
ھەرواھا گۆت: “ب مەراسیمەکا تایبەت و ب ئامادەبوونا بەرپرسێن حیزبی، حکووومی و کەسووکارێن شەھیدان ڤە روفاتێن ئەنفالبوویان دێ ژ بۆ گۆرستانا ئەنفالبوویان یا ل بارزانێ هێنە شاندن.”
سەوسەن میرخان گۆت: “رۆژا 31ێ تیرمەھێ سالڤەگەرا قوربانیێن جینۆسایدا بارزانیانە و دەمژمێر 10:00ێ سبەھێ دێ ئەو روفات ب ئاخێ هێن سپارتن و هێن ڤەشارتن.”
ناڤبۆری گۆت، گەلەک تەرم و ھەستی و پرووسکێن دن مانە، یێن گەرمیانێ هێژ مانە، لێ ھەتا نھا دیار نینە دێ ئەو ژی کەنگی ژ بۆ ھەرێما کوردستانێ هێن ڤەگەراندن.
