ھەڤسەرۆکاتیا کۆنسەیا رێڤەبەرا کەجەکێ جەمیل بایک و بەسێ ھۆزات داخویانیەک بەلاڤکرن. د ڤێ داخویانیێ دا ل سەر کۆمکوژیا شەنگالێ نرخاندن ھاتن کرن. د نرخاندنا کەجەکێ دا راستی ھاتن بەرەڤاژیکرن، ب دەھان پێشمەرگەیێن ژ بۆ شنگالێ ژیانا خوە ژ دەست دان و بریندار بوون راستی بێ ئەدەبییا کەجەکێ ھاتن، ب دەھان پەیڤێن درەو و بێبەختانە ل دژی حکوومەتا ھەرێما کوردستانێ ھاتن کرن.

کەجەکێ درندەیێن داعشێ پاک  دبینە

د داخویانیا ل سەر ناڤێ کۆنسەیا رێڤەبەرا کەجەکێ ئەوێن قەتلیعام کری ئانگۆ داعش و ھێزێن ل پشت وێ تاوانبار نەکر. کەجەکێ ژ بۆ کو داعشێ بەرائەت بکە، بوویەرێن ل شنگالێ دقەومن، د بن ناڤێ پەدەکێ دا پێشمەرگە و حکوومەتا ھەرێما کوردستانێ تاوانبار کر. ئەم وسا ببێژن، کەجەکێ د داخویانییا خوە دا 11 جاران بەحسا داعشێ کرییە لێ 26 جاران ب نەباشی بەحسا پەدەکێ کرییە. تەڤی کو شەنگال د ناڤبەرا کوردستان و ئیراقێ دا ھەرێمەکا ب ناکۆکە و ب فەرمی د بن کۆنترۆلا ئیراقێ دایە ژی، رۆلا دەولەت و ئارتێشا ئیراقێ ب تەڤاھی ھاتیە پاشگوھکرن. پەکەکێ ب ڤی رەنگی نیشان دا کو چاوا دژمنێن سەرەکی دان ئالیەکێ و چاوا ل دژی کوردان شەر کر. ڤێ جارێ ژی پەکەکێ ب بەردەوامی پێشمەرگەیان ژ کۆمکوژیا شنگالێ تۆمەتبار کر. لێ بەلێ کەجەکە ل سەر ڤێ یەکێ ما و گەلەک دەرەوێن بێەخلاقانە کرن. یەک ژ وان دەرەوان، دبێژە “حکوومەتا ھەرێما کوردستانێ بەشداری جڤینا کو کۆمکوژیا شەنگالێ ھاتبوو پلانکرن” بوویە.

داخویانیا کەجەکێ داخویانیەکە ل سەر دەرەو، بێبەختی و دژمنکارییێ ھاتیە نڤیساندن.

داخویانیا کەجەکێ تەنێ ژ دژمناھییا خەتا نەتەوی یا کورد بارزانی و پەدەکێ پێک تێ. دبە کو ئەم بزانین کو کەجەکە یان ژی ئەم ببێژین پەکەکە د ڤێ داخویانیێ دا کەرب و کین ل دژی پەدەکێ نیشاندایە. ب تاوانبارکرن و دەرەوێن بێ ئەخلاقانە ھەول دا ڤێ نەفرەتێ ئاشکەرا بکە.

د داخویانیا کەجەکێ دا ھات گۆتن کو رایەدارێن ھەرێما کوردستانێ و پێشمەرگەیان دزانی دێ کۆمکوژی ل شەنگالێ هێتە ئەنجامدان. ھەر وھا پەکەکێ گۆت، “بەریا کۆمکوژیێ، ژ بۆ پلانسازیا چاوانیا گرتنا شنگالێ و جھێن دن ھەڤدیتن دھاتن کرن و تێدا پەدەکە ژی بەشداری ڤان جڤینان بوو.” یانی کەجەکێ گۆت کو داعش و پەدەکێ جڤینەکا ھەڤپار ل دار خستییە. پەکەکە ژی باش دزانە کو ئەڤ نە راستە و دەرەوەکا ب دووڤکە. ب راستی داعشێ زرارا ھەری مەزن گھاندییە ھەرێما کوردستانێ، پەدەکێ و پێشمەرگە. پێشڤەچوونا بلەزا ھەرێما کوردستانێ ژ بەر ئێرشێن داعشێ راوەستیا و کەتە ناڤا شەرەکێ مەزن. ل رۆژھلاتا ناڤین یا ھەری زێدە ژ ھەبوونا داعشێ زەرار دیتی و ئیرادەیا دژبەرییا داعشێ نیشان دای ژی ھەر حکوومەتا هەرێما کوردستانێ و پەدەکە بوون. ب دەھان راستیێن دیرۆکی ھەنە کو پەکەکێ بەرۆڤاژی کرینە.

ما شنگال د بن کۆنترۆلا ئارتێشا ئیراقێ دا بوو ؟

ب سالانە پەکەکێ ژ بۆ کو پێشمەرگەیان بەرپرسیارێ بوویەرا شنگالێ نیشان بدە، ھەولدانێن مەزن کرن. د ڤێ یەکێ دا دبێژە کو شنگال د بن کۆنترۆلا پێشمەرگە دایە. پەکەکێ چ جاران ئارتێشا ئیراقێ ژ شنگالێ بەرپرسیار نەدیتیە. لێ دەستپێکا کۆمکوژیا شنگالێ ب کەتنا مووسلێ ڤە گرێدایی یە. ئارتێشا ئیراقێ ژ تەلەعفەر کو 40 دەقەیان دووری شنگالێ یە ب ترومبێلان دەرکەت و رەڤی. ھەر تشت ب وێ دەست پێ کر.

لێ پەکەکێ ب بۆمبەبارانا خوە یا پرۆپاگاندایێ رێ ل بەر ئاشکەراکرنا تشتێن کو ل شنگالێ دقەومن، گرت. یەکانە کارێ سەرەکی یێ پەکەکێ-کەجەکێ د 8 سالێن پشتی کۆمکوژیا شنگالێ ئەنجامدای، ئەو بوو کو ب تشتێن کو ل شنگالێ قەومین دناڤ مالا کوردی دا فتنە و فەسادیێ بەلاڤ بکە، ب دەرەوەکا مەزن دژمناتیا ل دژی پەدەکێ چێبکە.

کەجەکە: کەدەپە ناھێلە گەل خوە ب رێڤە ببە

گەر مرۆڤ ل داخویانی و مەدیایا پەکەکێ و کەجەکێ بنێرە، ھەول ددن ئیسپات بکن کو ھەموو شنگالی پشتگری ددن پەکەکێ. کەجەکێ د داخویانیا خوە دا گۆت، “پەدەکە ناھێلە گەل خوە ب رێڤە ببە.” لێ یا کو ناھێلە گەل خوە برێڤە ببە و بەشداری ھلبژارتنان ببە پەکەکە یە. ھەژمارا ئێزیدیێن ل دەردۆرا پەکەکێ ھەموو 1500 کەسن، ڤێ هەژمارێ زارۆک و تفال ژی تێ دا نە. د ھلبژارتنێن جۆتمەھا بۆری دا پەکەکێ تەڤی دەنگێن عەرەبان ژی ب تەنێ 900 دەنگ ئینان. بەرۆڤاژی ڤێ یەکێ پەکەکێ ل شنگالێ ھێزەکە بچووکا لەشکەری کو گەلێ باکور و رۆژئاڤا ژی د ناڤ دایە ئاڤا کریە و ب ڤێ ھێزێ ترسێ د ناڤا گەل دا بەلاڤ دکە و زەختێ ل کەسێن وەلاتپارز دکە. ناھێلە ناڤێن وەکی ڤیان دەخیل کو د ناڤا گەلێ ئێزدی دا ھلبژارتیە بکەڤە شنگالێ. پەکەکە ل شنگالێ ھێزەکا داگیرکەرە. ناھێلە گەلێ شنگالێ پێشەرۆژا خوە ئاڤا بکە و برینێن خوە دەرمان بکە.

کەجەکە: گەریلا ل شەنگالێ نینە

ھەڤسەرۆکێن کەجەکێ بایک و ھۆزات سەر تشتێن کو ھەموو جیھان دزانە ژی دەرەو کرن و  گۆتن، ” گەریلا ل شنگالێ نینە.” و کەسێن کو دگۆتن “پەکەکە ل شەنگالێ یە” وەک خایین راگهاندن. لێ بەلێ، بەرەڤاژی راستە. ل گۆری مە ژی یێن ئارمانجا پەکەکێ یا ل شنگالێ ئاشکەرا نەکە خاینە. پێدڤییە کوردستانی و وەلاتپارێزێن راست دیار بکن:

1- پەکەکە ل سەر خوین و ئێشا گەلێ شنگالێ دخوازە خوە ل شنگال و ئیراقێ ب جھ بکە.

2- پەکەکە ھەول ددە کو خەلکێ شنگالێ ژ کوردستانێ ڤەقەتینە و وان بکە لنگەکێ پرۆژەیا ھەیڤا شیعە یا ئیرانێ.

3- پەکەکێ ل سەر شنگالێ را خەتا مادەیێن ھۆشبەر و قاچاخچیتیێ ئاڤا کریە. د ھەر سازیەکێ دا کادرۆیێن خوە ب جیھ کرنە. شنگال د پراکتیکێ دا گرێدایی کۆمیتەیا پەکەکێ یا رۆژئاڤایە.

د ناڤبەرا رێزکێن داخویانیا کەجەکێ دا گەلەک ھەڤۆکێن کو ھەقیقەتێ تنە دکن و دخوازن د ناڤا کوردان دا دژمنکارییێ دەرخینن ھەنە. داخویانیا کەجەکێ ڤێ یەکێ نیشان ددە. پەکەکە-کەجەکە دێ ب بەردەوامی ل شنگالێ ب ھەڤکاریا حەشدا شەعبی ئاگرێ فتنە و فەسادییێ گوور بکە.