ئەم د سالڤەگەرا 8 یا جینۆسایدا شنگالێ دا، یێن كو هاتینه قەتلکرن ب رێزداری ب بیر تینن، رەحمێ ژ وان را دخوازین، بەرپرسیارێن ڤێ کارەساتێ و هێزێن ل پشت وان ب کەرب و نەفرەت شەرمەزار دکه‌ین.
یەکانە تشتا کو دێ ئارامیێ گه‌هینیته شنگالێ ئەوە کو ببیته پارێزگەهەک ل سەر هەرێما کوردستانێ
جینۆسایدا شنگالێ یان ژی وەکە کو کوردێن ئێزدی دبێژن «فەرمانا 73»، راستی ب پلانسازیەکا هەرێمی هات کرن، د کۆمکوژییا شنگالێ دا دەستێ ترکیێ و ئیرانێ ژی هەبوو، ل سەر شنگالێ هەول هات دان بژاردەیا سەرخوەبوونا هەرێما کوردستانێ بهێته ئاستەنگکرن و ئەڤ رەوش هێژ ژی به‌رده‌وامه، ئەم دکارین ببێژن کو چارەنووسا شنگالێ ب راستی ژی ب قەدەرا هەرێما کوردستانێ ڤە گرێدایی یە، یەکانە تشتا کو دێ ئارامیێ ئینیته شنگال و ئێزیدخانێ ئەوە کو شنگال ب سەرێ خوە وەکە پارێزگەهـ و د ناڤ سنۆرێن هەرێما کوردستانێ دا بهێته برێڤەبرن، سیستەما پارێزگەهێن هەرێما کوردستانێ سیستەمەکە کو رێ ل بەر رێڤەبەرییا هەرێمی ڤەدکەت، ئەگەر شنگال پشتی هەولێر، سلێمانی، دهۆک و هەلەبجە ببیته پێنجەمین پارێزگەها هەرێما کوردستانێ، دێ ئەو بێئارامییا دەڤەرێ ژ هۆلێ رابیت، وەکی دی، پشتی فەرمانا 73 یا داعشێ، ئێزدی و گەلێ شنگالێ یێ د ناڤا فەرمانا 74 دا دژین.
په‌كه‌كه مفای ژ ئێش و ئازارێن ئێزدیان وەردگریت
تاکە رێیا رزگاربوونا ئێزدیان ژ فەرمانا 74 تەڤلیبوونا هەرێما کوردستانێ یە، شنگال نها ئەردەکێ بێ ئاڤ، بێ کەهرەب و بەلەنگازە کو تێدا کۆمێن حه‌شدا شه‌عبی یا شیعه و باسکێ وان یێ په‌كه‌كێ لێ دگەرن، هەر رۆژ جینایەت لێ دهێنه کرن و خەتا بازرگانیا تریاکێ یا کو ژ ئیرانێ هەتا سووریێ درێژ دبیت، د سەر وێرێ دەرباس دبیت، ناهێلن ئێزدی برینێن خوە بپێچن، هێزەک ژی هەیە هەول ددەت فەرمانا 74 یا كو ئێزدیان هێژ نەدیتی ئەنجام بدەت، ئەو هێز ژی په‌كه‌كه یە.
په‌كه‌كه هەول ددەت ژ خوین، ژیان و ئێشا ئێزدیان مفای وەربگریت، هەول ددەت ئێزدیان ژ هەرێما کوردستانێ ڤەقەتینیت، په‌كه‌كه د بەردێلا قوتکرنا شنگالێ ژ هەرێما کوردستانێ دا، داخوازا فەرمیکرنا ئیرانێ ل ئیراقێ دکەت، واته هەردو دیپلۆماتێن په‌كه‌كێ کو ل تاخێ لوکس یێ «کەردادە» یێ بەغدایێ بژین، مفای ژ ئێزدییان وەربگرن، ژ ئیرانێ چەکان بستینیت و حکوومەتا ئیراقێ رێ بدەت کو هندەک کادرۆیان بینیت و ببەته ئەورۆپایێ. ژ بۆ ڤێ ژی دڤێت ناڤەکێ زەلال ل هەبوونا په‌كه‌كێ یا ل شنگالێ بهێته کرن: «په‌كه‌كە ل شنگالێ هێزەکا داگیرکەرە».
په‌كه‌كه ب مرنا ئێزدیان کێفخوەشە
په‌كه‌كه ژ ئێش، ژ رۆندک، ژ جوان، ژ چیا، ژ کال و پیران، ژ مرنا مرۆڤان و گۆڕێن ئێزدیان مفای وەردگریت، کوشتنا ئێزدیان ژ بۆ په‌كه‌كێ چ واتەیا خوە نینە، بەرۆڤاژی ڤێ یەکێ، په‌كه‌كه د وێ باوەریێ دایە کو هەر چه‌ند ئێزدی بمرن، دێ پەیوەندیا خوینێ یا د ناڤبەرا وان دا خورت ببیت و ب مرنا ئێزدیان کێفخوەش دبیت.
په‌كه‌كه ژ بۆ كو ئێزدیان ئیستیسمار بکەت، هەم ئێزدیان ل هەمبەری هەڤ دەردئێخیت و هەم ژی ئێزدیان ل دژی هەرێما کوردستانێ هان ددەت، په‌كه‌كه د ناڤا ئێزدیان دا هندەک ناکۆکیێن دیرۆکی کوور دکەت، په‌كه‌كه ناکۆکیێن ئۆلی د ناڤبەرا شنگال و شێخان دا کوور دکەت، په‌كه‌كه ناکۆکیێن د ناڤبەرا عەشیر و بنەمالان دا کوورتر دکەت، په‌كه‌كه دەستوەردانێ ل سیستەما دیانەتا ئێزدیاتیێ دکەت، په‌كه‌كه ئێزیدیان هەم ژ کوردایەتیێ و هەم ژی ژ ئێزدیاتیێ دوور دئێخیت، په‌كه‌كه ژ بۆ کو ئێزیدیان ل گۆرب دلێ خوە ب کار بینیت، دخوازیت ئێزدیێن په‌كه‌كێ ب ئافرینیت.
پێدڤیە ل دژی پرۆپاگاندایا نەفرەتێ یا کو ژ ئالیێ په‌كه‌كێ ڤە دهێته مەشاندن، تێکۆشین بهێته كرن
پێدڤیە ئەم ڤێ راستیێ هەم ژ بۆ ئێزدیان و هەم ژی ژ بۆ هەموو کوردان ب ئاوایەکی ڤەکری بێژین، ژ بەر کو په‌كه‌كه ل سەر شنگالێ سیاسەتەکا قرێژ دمەشینیت و د ناڤا کوردان دا ناکۆکیان بەلاڤ دکەت، پێدڤیە ئێدی په‌كه‌كه دەستێ خوە ژ پستویێ ئێزدییان بكێشیت، ژ بەر کو په‌كه‌كه ڤێ یەکێ ناکەت، دڤێت وەلاتپارێزێن کورد یێن رەسەن په‌كه‌كێ ژ سەر پشتا ئێزدیان بینن خوارێ، ئەڤە ب تەنێ ب دیپلۆماسیێ چێنابیت، ژ بۆ ڤێ ژی دڤێت کەش و هەوایێ کو په‌كه‌كێ د قادا فکر-پرۆپاگاندایێ دا ئافراندی بهێته شکاندن، ئێزدی ژی ل سەر بنیاتێ خوە ب رێخستن ببن.
په‌كه‌كێ د سالا 2014 دا ل شنگالێ ب رێیا چاپەمەنیێ سەروەریەکا مەزن یا دەروونی ب دەست ئێخست، ئەوێ سەردەستیا خوە ل دژی کوردان بکارئینا، هەول ددا کوردان ل هەمبەری هەڤ ده‌رخینیت، ب راستی چ پەیوەندیا وێ پرۆپاگاندایێ ب راستیێ ڤە نه‌بوو.
بەرپرسێن هەرێما کوردستانێ چ بەرسڤا پرۆپاگاندایا په‌كه‌كێ نه‌دان
چاپەمەنیا په‌كه‌كێ نه‌هێلا راستیا بوویەرێن ل شنگالێ قەومین بگه‌هیته رایا گشتی، کێم کورد راستیا کو نها ل شنگالێ دقەومیت دزانن.
بۆ نموونه؛ نزانیت شنگال هێژ ژی د بن دۆرپێچێ دایە و چ هێزەک نه‌شێت هاریكاریێ بگه‌هینیتێ، ناهێته زانین کو پێشمەرگەیان دەما دخواستین هاریكاریێ بگه‌هینن شنگالێ ب دەهان شەهید داینە، ناهێته زانین کو ژ نشكه‌كێ ڤه ئارتێشا ئیراقێ هەر دەر چۆل کرییە لەوما ژی داعش ل وێرێ د ئامادەباشیێ دا بوو، دەما بوویەر دەست پێ کری، رۆژا ئەول پێشمەرگە داکەتبوون چیایێ شنگالێ و ژ بەر کو په‌كه‌كێ رێ نەدا ئۆپەراسیۆن ل گوندێ کۆجۆ بهێته کرن، کۆمکوژیا گوندێ کۆجۆ روودا، درەوا کو په‌كه‌كه دبێژیت مە ب 12 کەسان ئێزدی رزگار کرینە، هێژ ژی دهێته باوەر کرن!.
یا کو بوویە سەدەم کو ئەڤ درەوا په‌كه‌كێ ئەوقاس بەلاڤ ببیت ئەوە کو رایەدارێن پێشمەرگە، بوویەرێن ل شنگالێ رووداین ژ بۆ رایا گشتی نەگۆتن، دەما کو پێشمەرگە چوون شنگالێ رزگار بكه‌ن، ل زومار ب دەهان شەهید دان، ب دەهان پێشمەرگە ژ گه‌نجێن بەهدینانێ ل زومارێ د رێیا شنگالێ دا شەهید بوون، ڤان شەهیدان دخواستن رێکا رزگار بوونێ ڤەکن، پێشمەرگە ب هەلیکۆپتەران داکەتن چیایێ شنگالێ و د داویا هەر تشتی دا خەلەتی ژی هاتن دیتن و پێشمەرگە د دەمەکێ زوو دا هاتە سەفەربەر کرن، سەرۆک بارزانی ب خوە ئۆپەراسیۆنا شنگالێ ب رێڤەبر و ناڤەندا باژارێ شنگالێ رزگار کر، ل زاخۆ هەتا سلێمانیێ گەلێ کورد نانێ خوە ل گەل ئێزدیان پارڤە کر، هەرێما کوردستانێ ژ بۆ ئێزدیان ب هەموو ئیمکان و دەرفەتێن خوە ڤە سەفەربەر بوو.
لێ مخابن ژ بەر کو بەرپرسێن هەرێما کوردستانێ و پێشمەرگە د ئاستا پێویست دا درەوێن په‌كه‌كێ یێن ل سەر شنگالێ ئاشكه‌را نەکرن، کارێ کو پێشمەرگەی و هەرێما کوردستانێ ژ بۆ کوردێن ئێزدی و شنگالێ کری، ب قاسی درەوا په‌كه‌كێ كاریگه‌ر و دیار نەبوو، رایەدارێن هەرێما کوردستانێ درەوا په‌كه‌كێ یا ل سەر شنگالێ شەرمەزار کرن، هێسان دیتن لێ نەخواست ب شێوازێ وان بەرسڤێ بده‌ن، لێ بەلێ په‌كه‌كێ سیاسەتا خوە یا فتنە و فەسادیێ ل شنگالێ بەردەوام کر.
نها دەما وێ هاتیە کو مرۆڤ ببێژیت ئێدی بسەکنە، ب دەهان نامیلکە، وێنەیێن پێشمەرگەیێن کو ل وێرێ ژیانا خوە ژ دەست دانە و شاهدێن وان بوویەران، دڤێت بێژنە جیهانێ کا هەرێما کوردستانێ چەند ژ بۆ رزگارکرنا شنگالێ ژ دەستێ داعشێ تەڤگەریا و کا چاوا سەرۆک بارزانی ئۆپەراسیۆنا رزگارکرنا شنگالێ ل وان چیا و زناران برێڤەبر، تشتا کو ل دژی فەسادیێن په‌كه‌كێ یێن ل شنگالێ بهێته کرن، دێ ئەو بیت کو لێکۆلینەک ل سەر راستیا شنگالێ بهێته کرن و ئەنجامێن وێ ل گەل گەلێ کورد بهێنە پارڤەکرن، په‌كه‌كە کێشەیا هەره مەزنە ژ بۆ شنگالێ، گەر ئەڤ کێشەیە چارەسەر نه‌بیت دێ كارتێكرنا خوە یا وێرانکار ل هەموو هەرێمێ كه‌ت، ئێدی دەم هاتیە ب دەنگەکێ بلند مرۆڤ بێژیتە په‌كه‌كێ، دەستێ خوە ژ پستۆیێ گەلێ ئێزدی بکێشە.
