ئەندامەکی ئەنەکەسێ د ناڤا ھەڤپەیمانیا ئۆپۆزیسیۆنا سووریێ (ئیتیلاف) دا رادگھینە، “سستی و نەجدیبوونا ھەلوەستا نەتەوێن یەکگرتی، ئامەریکا و ھەڤپەیمانیا ناڤدەولەتی، دھێلە پێڤاژۆیا ئاستانایێ پێش بکەڤە.”
ل سەر پرسا ئەگەرا ئاساییبوونا پێوەندیێن ترکیا و سووریێ دا نوونەرێ ئەنەکەسێ د ئیتیلافێ دا شەلال گەدۆ ژ کوردستان 24ێ را گۆت: “ژ سالا 2017ێ ڤە پێڤاژۆیا ئاستانا ل سەر حەسابا پێڤاژۆیا جەنێڤێ، ھەری زێدە رۆل و باندۆرا وێ ل رەوشا مەیدانی و سیاسییا سووریێ دبە. دەستەیا دانووستانان و کۆمیتەیا دەستوورا سووریێ یا کو ب سەرپەرشتیا نەتەوێن یەکگرتی برێڤە دچە، ژ چەند سالان ڤە نەکاری تشتەکێ جێبەجێ بکە، ژ بەر کو نەتەوێن یەکگرتی، وەلاتێن رۆژئاڤا و ئامەریکا د چارەسەریا رەوشا سووریێ دا نە جدی بوون. ل ھەمبەرێ ژی وەلاتێن گەرەنتۆرێن ئاستانایێ (رووسیا، ترکیا و ئیران) ب جدی کار دکن. د ڤێ رەوشێ دا، ژ بۆی مە نە جھێ ماتمایینێ بوو کو ئەڤ ھەر سێ وەلاتە، گوھارتنێ ل سەر ئاستا مەیدانی و سیاسی یا سووریێ چێبکن.”
گۆت ژی: “سستی و نەجدیبوونا ھەلوەستا نەتەوێن یەکگرتی، ئامەریکا و ھەڤپەیمانیا ناڤدەولەتی، دھێلە پێڤاژۆیا ئاستانایێ ب پێش بکەڤە و رۆلا وێ یا سەرەکی د گوھارتنا ھەلوەستا ترکیا و وەلاتێن دن دا چێببە. ترکیا نھا د بن فشارەکا مەزنا رووسیایێ دایە کو کریزا سووریێ ل گۆری بەرژەوەندیێن ھەڤبەشێن ھەر سێ وەلاتێن گەرەنتۆرێن ئاستانایێ چارەسەر بکن. ل داویێ، ئەڤ وەلات دێ بەرژەوەندیێن خوە بەری ھەر تشتی بپارێزن.”
گۆت ژی: “راستە ترکیا ھەتا نھا پشتەڤانیا بەشەک مەزن ژ ئۆپۆزیسیۆنا سووریێ و ب تایبەت ئیتیلافێ دکە و ئۆپۆزیسیۆن ل وی وەلاتییە، لێ ئەز نە باوەرم کو د دەمەک نێزیک دا چ گوھارتن بکەڤە ھەلوەستا ترکیا، یان ژی بکەڤە پێوەندیێن ئۆپۆزیسیۆن و حکوومەتا ترکیێ. ژ ئالیەکی دن ڤە ھلبژارتنێن سالا داهاتی یێن ترکیێ ژی، رۆلەکا وێ یا گەلەک گرنگ د ڤان سیاسەتێن نوویێن ترکیێ دا ھەیە، ژ بەر کو پارتیێن ئۆپۆزیسیۆنێ یێن ترکیێ کارتا کۆچبەرێن سووری ل ھەمبەر ئاک پارتیێ ب کار تینن. د ڤێ دەربارێ دا نە دوورە ھن گوھارتنێن دن ژی دەربارێ سووریا، کۆچبەرێن سووریێ و پێوەندیا ب ئۆپۆزیسیۆنا سووریێ ڤە چێببن.”
ل سەر پرسا کو ترکیا فشارێ ل ئۆپۆزیسیۆنا سووریێ دکە تا کو دەست ب دانووستاندنان لگەل رێژیما سووریێ دا بکە، شەلال گەدۆ گۆت: “ھەتا نھا مە نەبھیستیە کو ترکیا فشار ل ئۆپۆزیسیۆنێ کریە تا کو گوفتووگۆیان لگەل رێژیمێ دا بکە. نە دوورە ترکیا ژ بۆ بەرژەوەندیێن خوە، وەک گەلەک وەلاتان پێوەندیێن خوە ب رێژیما سووریێ ئاسایی بکە. لێ وێ ھەتا نھا چ فشار ل ئۆپۆزیسیۆنێ نەکریە.”
دەربارێ باندۆرا نێزیکبوونا ترکیا و سووریێ ل سەر رۆژئاڤایێ کوردستانێ دا، شەلال گەدۆ دیار کر: “ئەگەر پێوەندیێن ترکیا و سووریێ ئاسایی ببن یان نەبن، چ گەرەنتی ژ بۆ مانا قەوارەیا (رێڤەبەریا خوەسەر) کو ل رۆژئاڤایێ کوردستانێ ھەیە، نینە. ل ئاستا ھوندر و دەرڤەیی سووریێ، چ کەس ڤێ قەوارەیێ ناس ناکە. ڤێ قەوارەیێ ھەتا نھا نەکاریە دانپێدانەک یاسایی، جەماوەری، نشتمانی ژی وەربگرە. د ھەمبەرێ دا ژی، ئەو نە قەوارەیەکا کوردییە ژی، ژ بەر کو وێ پارێزگەھا رەقا و دێرازۆر خستیە ناڤا خوە، ڤێجا ژ سەدی 70-80 ژ وێ نە کوردن. ھەتا نھا چارەنڤیسا ڤێ قەوارەیێ نە زەلالە. د ڤێ رەوشێ دا کورد و قەوارەیا ھەیی، ل پێش مەترسیەکا مەزنن.”
