هەستیێن هاکان د تەلیسیدا هاتن دیتن، لێ کەسێن کو سلۆگان دقیراندن نەهاتن دیتن

دێ چ ب سەرێ لایانێ سێیەمین هێت کو دەمیرتاش باسی وی نەکری؟

ھاکان ئەرسەلان د سالا 1990ێ دا ل «قەرەیازا ئەرزرۆمێ» ھاتیە سەر دنێ. تەڤلی پەکەکێ بوو و 7 سالان بەرێ ل ئامەدێ ل تاخێ سوورێ ژیانا خوە ژ دەست دا. تەمام پشتی حەفت سالان دەولەتێ ھەستیێن وی د گینیکەکێ دا تەسلیمی بابێ وی کرن.

باب ب تەنا سەرێ خوە د دەمەکێدا کو هەستیێن کورێ خوە یێ 22 سالی د دەستێن خوە دا هەلگرتبوون ل ناڤەندا ئامەدێ راوەستیا بوو. ب راستی نە تەنێ بابێ وی، بەلکو ھەموو کورد ل وێ دەرێ و ب دیتنا وی دیمەنی تووشی برینەک دەروونی بوون.

لێ پاشێ مە دیت کو ھندەک ترکێن درندە، کو د ناڤ وان دا نڤیسکار و وێنەکێش ژی ھەبوون، “ژ رادەستکرنا ھەستییان ژی نەرازی بوون”. وان دگۆت؛ دڤیابوو دەولەتێ ھەستی ژی نەدابان دەستێ بابێ وی. ل ڤر ئەم کورد لگەل دەولەتەکا کۆلۆنیالیستا ب ڤی رەنگی درندە و گەلێ وێ یێ بەربەری دا روو ب روو نە.

داخویانیا دەمیرتاش

ھەڤسەرۆکێ بەرێ یێ ھەدەپێ سەلاحەدین دەمیرتاش ل سەر ڤێ مژارێ داخویانیەک دا. دەمیرتاش وھا گۆت: “گەر جڤاک بهێتە دابەشکرن، دڤێت جڤاک ببیتە دو بەش: یێن کو ژ دەمۆکراسی و نرخێن مرۆڤاھیێ یێن گەردوونی باوەر دکن و یێن کو ژ فاشیست و دز… باوەر دکن، دڤێت د ناڤبەرا کەسێن کو دبێژنە ئاپێ عەلی رزا “قەنج لێ ھات” و یێن کو ڤێ ئێشێ د دلێ خوە دا هەلدگرن دا ھلبژارتن چێبە.”

بەلێ، ئاخافتنا دەمیرتاش گەلەک ئەدەبی خویا دکە. لێ نە رەوشا ھەیی راڤە دکە و نە ژی رێیەکا راست ژ بۆ بوویەرێ نیشان ددە. وەکە ھەر جار دەمیرتاش تەنێ ئاخافتنێن  پۆپولیست، گشتگیر و ئەدەبی دکە. واتە دەمیرتاش ژ بۆ لاینگرێن خوە نمایشێ دکە.

کیژان جڤاک، جڤاکا کورد یان جڤاکا ترک؟

گەلۆ چما دەمیرتاش پشتی ھەستیێن ھاکان ئەرسەلان ژی ب ڤی رەنگی دیتی پەیڤا کورد و کوردستانێ ب کار نەئانی. بلا جڤاک ببە دو بەش، باشە. لێ ما جڤاک ژخوە نە بوویە دو بەش؟ یێن تێن کوشتن ژ ئالیێ کوردێن پارچەبوویی نە، ئالیێ دن ژی یێن کو ب مرنا کوردان شاد دبن، سوودێ وەردگرن و نە خەمخوورن.

ھەگەر پشتی ھەستییێن جەنازەیێ هاکان ئەرسەلان ژی ھوون نکارن ببێژن کوردستان، ما دێ چ بێژینە وە. ما نە هاکان ئەرسەلان ژ بەر کوردبوونا خوە شەھید کەت؟ باژارۆکێ «قارایازیێ» جھەکە کو وەلاتپارێزیا کوردان لێ زندییە. بابێ ئەرسەلان ھاکان عەلی رزا زمانێ ترکی ژی نزانیت، لێ دەما دەمیرتاش بەحسا ئێش و ئازارێن بابێ وی دکەت ژی دیسا نکاریت ببێژیت کورد. وێ دەمێ کەسێن سییاسی رزیبوونە. ھەر تشت سافی و زەلالە.

 دەمیرتاش د ئاخافتنا خوە دا نە تەنێ خوە ژ بلێڤکرنا پەیڤا کوردستان پاراست، د ھەمان دەمێ دا نەخواست کوژەرێن ئەرسەلان ژی ئاشکەرا بکە. ئەڤ بوویەرا درندانە نە تشتەکە کو د ناڤا باش و خەرابیێن جڤاکی دا قەومیبیت. بوویەر د ناڤبەرا دەولەتا ترکا کۆلۆنیالیست و پەکەکەیا کو ئیدیعا کربوو ل دژی ڤێ دەولەتێ شەری دکە دا روو دا بوو.

پەکەکە ژی ھەری کێم ب قاسی دەولەتا ترک بەرپرسیارە.

پەکەکێ دزانی کو ئەو جوان ھەموو دێ مرن، زارۆکێن کورد ب ساخی، خستن ناڤ وان گۆرێن کو پەکەکێ دگۆتێ خەندەک. 12 باژارێن کوردان وێران کرن. ھێژ ب دەھان جەنازە ل گۆرستانا بێکەسان بێ خوەدی نە. چما، چما ئەو خەندەک ھاتن کۆلاندن، چما ئەو جوان ھاتن قووربانی کرن؟ چما ھاکان ئەرسەلان ژ گوندێ وی یێ «قەرەیاز» یێ ئەرزرۆمێ ئانین و ل سوورا ئامەدێ دا شەر کرن؟ چما سەرەرایی وێرانبوونا وارتۆ، فارقین و سلۆپییێ پەکەکێ ئەڤ وێرانکاری ل سەر نسێبین، سوور، جزیر، گەڤەر و جھێن دن ژی مەشاند؟ بەسێ ھۆزات ب ناڤێ دێ “ئیعتیبارا مە هەژیێت” هێلا کو ل جزیرێ جوانێن کورد ژ ژێرزەمینێن خانییان دەرنەکەڤن و ل ور بسۆژن. ما ئیعتیبارا وە ژ گییانێ جوانێن کورد ھێژاترە بەسێ خاتوون؟ ئەو گینیکێ ھەستییێن دەستێ مامێ عەلی رزا دا ئەنجاما پلانسازییا وە یا شەرێ خەندەکا (خوەکوژیێ) یە. ئەو کۆما ھەستییان وە دایە پشتا مام عەلی رزا، تاوانا وەیە. پێدڤییە کو گەلێ باکور ژ بەر ڤی شەرێ خەندەکان وە وەک سەرکردەیێن پەکەکێ رەجم بکە. دژمن خوینخوار و ھۆڤە. ما قەی ھوون ڤێ یەکێ نزانن. وە جوانێن کورد بێ سووچ و بێ سەبەپ ئاڤێتن ناڤا ئاگرێ دژمنی دا. نۆکە ژی ل سەر ھەستییێن ئەرسەلان ئیستیسمارێ دکن. شەرمە، عەیبە ئەڤ گەل نە گۆلکێ بابێ وەیە. ھوون دێ حەسابا ڤێ خییانەتا وە ب خەندەکان ل گەلێ کورد کری دەن. شەرێ خەندەکان یێ پەکەکێ خیانەتەکا مەزن بوو ل کوردان ھاتیە کرن و باکورێ کوردستانێ سەرووبن کر.

یێن کو سلۆگانان دقیرن ل کو نە؟

بێ شک ئەم دێ ھندەک کەسێن دن کو دەمیرتاش بەحسا وان نەکری ژی ئینین بیرا وە؛ “ئەو کەسێن کو دگۆتە کەسێن ل دژی شەرێ خەندەکان راوەستیایێ خایین، و بانگا شەرێ خەندەکان دکر” چ ب زەختا پەکەکێ بیت یان نە، ھەدەپەیا کو دەمیرتاش وێ دەمێ ھەڤسەرۆکێ وێ بوو پشتگری دا شەرێ خەندەکان. فیگەن یوکسەکداغ ل فارقینێ دکرە حەوار و دگۆت؛ شەرێ خەندەکان شۆرەشەکە. سڕی سوورەییا ئۆندەر تلیا خوە ل کادرۆیێن پەکەکێ یێن ل دژی شەرێ خەندەکان راوەستیای ژی دھەژاند و د گۆت، “ئەو خەندەک دێ هێنە کۆلاندن.” ب دەھان پارلەمانتەرێن ھەدەپێ د شەرێ خەندەکان دا سەرکردایەتی دکر. کادرۆیێن پەکەکێ یێن ئامەدێ دگۆتە «جگەرجی محەمەد» “شەرێ خەندەکا دێ سوورا ئامەدێ ئازاد کت”. ئەڤجا چ ھات سەرێ وان مرۆڤان؟

ل کودەرێنە ئەو کەسێن بانگا شەرێ خەندەکان دکر و جوانێن کورد ژ بۆی مرنێ هان ددان؟ ھۆۆۆۆۆ بازرگانێن شەرێ خەندەکا، بۆچی هەوە مام عەلی رزا ب گینیکێ جەنازەیێ کورێ وی ڤە، تەنێ هێلا؟ بۆچی هیچ یەک ژ دەهۆلقوتێن شەری یێن ھەدەپێ ژی ل گەل وی نەبوو؟ بۆچی جەنازە تەنێ ژ ئالیێ مالبات و گوندیان ڤە ل گوندی ب ئاخێ هاتە سپارتن؟ بۆچی ھەدەپێ ئەو بەرتەک ژ بۆ ھونەرمەند «گولشەنا پۆپچی» نیشان دایی ژ بۆ ھەستییێن ئەرسەلان ھاکان نیشان نە دا؟

گەر دەمیرتاش دخوازیت ژ بۆ ھاکان ئەرسەلان باخڤیت، دڤێت ئەو دەستپێکێ ل سەر ڤان کریارێن مە گۆتی باخڤیت. ژ بەر کو دەمیرتاش نە شیرۆڤەکارە. دەمیرتاش ژی شریکێ وێ پێڤاژۆیێ یە، یا کو ئەرسەلان ھاکان بەر ب  مرنێ ڤە بری.

ژ بەر ڤێ یەکێ ئەگەر پارچەبوونەک چێببیت، بلا ل سەر ڤی ئەساسی بیت. ژ ئالیەکێ ڤە داگیرکەر-کۆلۆنیالیست، واتە یێن کو ب مرنا ھاکان شاد دبن؛ ژ ئالیێ دویەمین ژی ئەو کەسێن کو لسەر ناڤێ دێ “ھاکان شۆرەشێ کت” ئەڤ گەنجە مەحکوومی خەندەقێ کرن و خوە نێزیکی جەنازەیێ وی ژی نەکرین.

ئەو دەم دەرباس بوویە کو دەمیرتاش رۆلێ سیاسەتڤانەکێ نیەت باش، نەفسبچووک، ھایا وی ژ تشتەکێ نەیی… بگێریت! ئەو دەم نەما برێز دەمیرتاش. د ڤی بابەتی دا دەمیرتاش نکاریت هیچ کەسەکێ دادگەهـ بکەت، بەرەڤاژی تەنێ ئەوە کو مەحکوومێ رەخنەلێگرتنێ یە.

پوستێن ھەمان بەش