ل شەڤا 5ێ ئیلۆنێ یەکینەیەکا پەکەکێ ل دەڤەرا دۆلا بالیسانا سەر ب ناڤچەیا خەلیفانێ بوو ئارمانجا فرۆکەیێن بێفرۆکەڤانێن ترکیێ. ژ خۆلەکێن دەستپێکێ یێن ڤێ بوویەرێ مەدیایا پەکەکێ وەکە ھەر جار ھەول دا کو بەرپرساتیا بوویەرێ بخن ستوویێ ھێزێن پێشمەرگە. چاپەمەنیا پەکەکێ بوویەر وەکە “پەدەکێ و پێشمەرگەیان ئێریشی گەریلا کرن” نیشان دا. پاشێ گۆتن کو چەند گەریلا دیل کەتنە دەستێ پێشمەرگە.

 لێبەلێ، بوویەرێ گەلەک جوودا روودایە. ب راستی چ قەومی؟

شەڤا 5ێ ئیلۆنێ چ قەومی؟

ل گۆر ئاگاھیێن کو دارکا مازی ژ چاڤکانیێن ھەرێمێ وەرگرتنە، ل ھەرێما ب ناڤێ گەلیێ بالیسانێ یەکینەیەکا پەکەکێ یا ژ 5 کەسان پێک تێ دبن ھەدەفا درۆنێن ترکا. ھەر وھا د ناڤا ئاگاھیێن کو ھاتنە بدەستخستن دا ئەڤ یەکینا پەکەکێ کەتنە گوندێن ل سەر رێکێ ب بێتەلا بچووک و تەلەفۆنێ ئاخڤتینە. ژ بەر ڤێ یەکێ ئەڤ یەکینە دەمەک بەرێ ژ ئالیێ فرکەیێن کەشفێ ڤە ھاتییە شۆپاندن.

د ئێرشا دەسپێکێ دا یەکسەر 3 گەریلا ژیانا خوە ژ دەست ددن. دو گەریلایێن مایی ژی ب برینداری خوە دگھینن ناڤا باخچەیێن گوندا. یەک ژ ڤان گەریلایان دکارە باخڤە. ژ بۆ ئالیکاریێ گازی گوندیان دکە. رەوشا برندارێ دن پر گرانە. ھێزێن پێشمەرگە سەر ئاگاھدارییا گوندیان دا دچن جھێ بوویەرێ. ھەر دوو برینداران دکن ئامبولانسێ دا و بەر ب نەخوەشخانەیێ رێ دکەڤن. د رێ دا گەریلایێ برینا وی گران ھێژ نە گیھان نەخوەشخانێ ژیانا خوە ژدەست ددە. گەریلایێ دن ڤەدگوهێزن نەخوەشخانەیا ھەوارھاتنێ.

دەرەوا پەکەکێ یا کو دبێژە “گەریلا و پێشمەرگە شەر کرنە”

مەدیایا پەکەکێ ڤێ دەرەوێ بەلاڤ دکە و دبێژە “ژ شەڤا بۆری ڤە پێشمەرگە بانگا تەسلیمبوونا برینداران دکە” گەریلا ژی ژ بۆ خوە رادەستی پێشمەرگە نەکن شەر دکن. ووسا دیارە کو پەکەکە دخوازە ل سەر دۆلا بالیسان بانگا فتنە و فەسادییێ بکە، لەوما چیرۆکێن دەرەو ڤەدھینە، سەرەراری کو پەکەکێ چ زانیاری و ئاگاھی ژ ڤێ بوویەرێ نینە ژی. ژ بەر کو چ پەڤچوون د ناڤبەرا چەکدارێن پەکەکێ و پێشمەرگێ کوردستانێ دا چێنە بوونە.

فاشیستێن ترک و مەژی هشکێن پەکەکێ ب ھەڤ را پەدەکە کرن ئارمانچ

ھەموو گوندیێن گوندێ «تاراوە و خاتە» یێن کو بوویەر لێ قەومی، تەماشە کرن دەما کو پێشمەرگەیان چەکدارێن پەکەکێ یێن بریندار ب ئامبوولانسێ رزگار کری. ھەتا دووھ شەڤ ھەیا دانێ ئێڤارێ مەدیایا ترکیێ ب ھنجەتا چما “پێشمەرگە ب ئامبوولانسێ چەکدارێن پەکەکێ رزگار کرنە” ئێرشی ھەرێما کوردستانێ دکرن. راگاھاندنا پەکەکێ ژی ب تۆھمەتا پەدەکێ ئەو ئیخبار کرنە ئێرشی سەر حکوومەتا ھەرێما کوردستانێ و پەدەکێ دکر. نە ژ نیشکاڤەیە کو ئەندامێن دەولەتا ترک و ئالیگرێن پەکەکێ ب ھەڤ را ئێریشی  پێشمەرگە و بارزانی دکن. پەکەکە و دەولەتا ترک ب ھەڤرا ب سالایە دخوازن ھەرێما کوردستانێ وەکە شەیتان دەستنیشان بکن. دوھ ژی ھەمان تشت ل دەڤەرا دۆلا بالیسان-خەلیفان ھات دوبارەکرن.

یانی گەریلایێن بریندار بانگ ل گەل دکن کو مە رزگار بکن. پێشمەرگە گەریلایێن بریندار ددە پشتا خوە و دگھینە ئامبولانسێ. لێ پەکەکە بوویەرەکا وھا دلئێش ژی ساختە دکە کو بکە مژارا فتنە و فەسادییێ. پەکەکە دزانە کو ھەرێما کوردستانێ ژ بەر حەساسیەتێن سیاسی داخویانیەکا فەرمی نادە و نکارە ببێژە “ل سەر بانگا وان مە گەریلایێن بریندار رزگار کرنە”. ژ بەر ڤێ راستییێ ژی پەکەکە وە دبینە کو مەیدان ژ بۆ وان مایە و ئاگرێ فتنێ گوور دکن.

ھەکەر ھێزێن پێشمەرگە ژی، ب شێوازێ پەکەکێ بەرسڤا پەکەکێ بدن دێ چ ببە؟

حکوومەتا ھەرێما کوردستانێ، ھێزێن پێشمەرگە و رێڤەبەریا پەدەکێ تەڤی ھەموو بێرێزی و فتنەیێن پەکەکێ ژی، ب شێوازێ پەکەکێ بەرسڤ نەدا. د راستیێ دا پێشمەرگێ کوردستانێ چ جاران چەکدارێن پەکەکێ نەکرییە ئارمانچ. د ڤان 3 سالێن داوی دا پەکەکێ 12 پێشمەرگە شەھید کرن و ب دەھان زارۆک ژی سێوی ھشتن. لێ پێشمەرگەیان ل چ گرۆپ و یەکینەیێن پەکەکێ نەخست. ھەگەر ھێزێن پێشمەرگە ل دژی پەکەکێ بکەڤنە ناڤا لڤ و تەڤگەرێ باوەر بکن ھێزێن پەکەکێ یێن ل دەڤەرا بەھدینان و گارێ کو مراد قەرەیلان ژی د ناڤ دایە، نکارن پاری یەک نان ژی، پەیدا بکن.

ل گۆری رەوشا جوگرافی یا ھەرێمێ، ئەگەر پەدەکە ب راستی ئیستیخباراتێ بدە ھێزێن ترک و د ئێریشان دا هەماهەنگیێ بکە، ل دەردۆرا ئامادیێ، گارێ یەک گەریلا ژی نامینە. ھێزا کو ڤێ ھەری باش دزانە پەکەکەیە. لێبەلێ سەرەرای ڤێ راستییێ ژی پەکەکە رۆژەڤا خوەیا سیاسی ددۆمینە. ب ئیحتیمالەکا مەزن ئەو دێ وەک پار د رۆژێن پێشییا مە دا ل ئەورۆپا، ترکیا و ھتد کامپانیایەکێ ل دژی ھەرێما کوردستانێ برێڤە بەن و کەسێن سەرهشک و نەزان ل دژی پەدەکێ و حکوومەتا کوردستانێ درووشما بقیرن.

مالپەرا دارکا مازی ھەفتەیا بۆری گۆتارەک وەشاندبوو و ل سەر سەدەمێن تەڤگەرا ڤێ داویێ یا مەدیایا پەکەکێ یا ل دژی پێشمەرگە نڤیسەک وەشاند بوو: https://darkamazi.net/archives/1034477

ل ھەمبەر ڤان ھەموویان پیدڤییە رەوشەنبیرێن ھەرێما کوردستانێ ب تایبەتی ژی رەوشەنبیرێن نەتەوپەروەر ڤان دەرەوێن پەکەکێ ئاشکەرا بکن و ھەلوەستەکێ کوردستانی رابەر بکن. پیدڤییە ژ پەکەکێ بهێتە پرسین چ کارێ گەریلا ل دەڤەرا خەلیفانێ ھەیە ؟

 بوویەر ل کو دەرێ  پێک ھات؟

بوویەر د ناڤبەرا گوندێن «تاراوە و خەتا» یێ گەلیێ بالیسان روو دا. گەلییێ بالیسان دکەڤە ناڤبەرا ناڤچەیێن رانیا-حەریر و خەلیفان دا. ئەڤ ھەرێم ب ھەوایی 170 کم دووری سینۆرێ ترکیایێ یە. ھەکەر گەریلا ب رۆژان ژی بمەشە نکارە عەسکەرێ ترک ب چاڤان ببینە. پرسا یەکەم کو تێ بیرا مرۆڤ، “گەلۆ چەکدارێن پەکەکێ ژ بۆ دژی دەولەتا ترک شەر بکە یان ژی ژ بۆ دژی ھێزێن پێشمەرگێ کوردستانێ شەر بکە ل ورە؟

پەکەکە دخوازە ل قونتارا پایتەختێ کوردستانێ ھەولێرێ خوە تەڤگەر بکە و دەولەتا ترک بدە دووڤ خوە و بینە ناڤا جەرگێ باشوورێ کوردستانێ و پاشێ ژی بێبەختییێ ل پێشمەرگێ کوردستانێ بکە. کورتەیا چیرۆکا بوویەرا 5ێ ئیلۆنێ ل دۆلا بالیسان قەومی ئەڤەیە.