ئارتێشا ئیراقێ زیندانه‌كه نهێنی یا په‌كه‌كێ ل شه‌نگالێ ئه‌شكه‌ره دكه
ئیستخباراتا ئارتێشا ئیراقێ، زیندانه‌كه نهێنی یا په‌كه‌كێ ل چیایێ شه‌نگالێ ئه‌شكه‌ره دكن، لێ به‌لێ ژ هێلا چه‌كدارێن په‌كه‌كێ ڤه رێگری ل وان تێ كرن كو به‌ر ب جیهێ زیندانێ ڤه بچن.
چاڤكانیێن پێگه‌ها «داركا مازی» ل ده‌ڤه‌را شه‌نگالێ ئه‌شكه‌ره كرن، ئیستخباراتا ئارتێشا ئیراقێ كارینه زیندانه‌كه نهێنی یا رێخستنا په‌كه‌كێ، ل هه‌رێما ب ناڤێ «چلمێران» یا ل چیایێ شه‌نگالێ ئه‌شكه‌ره بكن، لێ به‌لێ هێژان نكارینه به‌ر ب جیهێ زیندانێ ڤه بچن.
ده‌ستنیشان كر، ئیستخباراتا ئارتێشا ئیراقێ ئاگاهی ب ده‌ست خستن كو زیندان ل وێ هه‌رێمێ هه‌یه، لێ به‌لێ وه‌ختا فه‌رماندارێ یێك ژ فه‌وجێن فرقه‌یا 20 خوه‌ستی ب ئه‌ركا خوه بچه وێ هه‌رێمێ ژ بۆی پشكنینێ، ژ هێلا چه‌كدارێن په‌كه‌كێ ڤه پێشی لێ تێ گرتن.
چاڤكانیێن پێگه‌ها مه ئه‌شكه‌ره كرن كو پشتره لیوا روكن ئه‌سیر یێ فه‌رماندارێ فرقه‌یا 20 ب پشته‌ڤانیا هێزه‌كه له‌شكه‌ری و دو هه‌لیكۆپته‌ران دچه وی جیهی و ل گه‌ل هنه‌ك چه‌كدارێن گرێدای په‌كه‌كێ ئالۆزی دردكه‌ڤه.
ل گۆری هنه‌ك دیمه‌نان كو ژ بۆ پێگه‌ها مه هاتنه شاندن، ئالۆزیا د نێڤبه‌را فه‌رماندارێ فرقه‌یا 20 و هنه‌ك چه‌كدارێن ئێزدی و سووری یێن گرێدای په‌كه‌كێ ده ده‌ردكه‌ڤه و فه‌رماندار ژ وان چه‌كداران ره دبێژه: «هوون ب ت ئاوایێ پێشیێ ل فه‌رمانداره‌كێ ده‌وله‌تا ئیراقێ ل سه‌ر خاكه‌كه ئیراقی دگرن».
پرسا ل ڤر تێ كرن ئه‌ڤه:
گه‌لۆ وه‌ختا فه‌رمانداره‌كێ له‌شكه‌ری یێ هه‌ری بلند نكاره بكه‌ڤه هه‌رێما چلمێران یا ل چیایێ شه‌نگالێ، ئه‌ڤجا هه‌مولاتیك ئێزدی یێ بێ چه‌ك و هێز وێ چاوا بكاره بكه‌ڤه وارێ خوه، یان ئێزدیێن كو ئه‌ڤ چه‌ند سالن د كامپان ده دمینن، وێ چاوا بكارن ڤه‌گه‌رن وارێ خوه؟!
