کوردستان سالڤەگەرا پێنجەمین یا رەفەراندۆما سەرخوەبوونێ ب بیرتینە

referanduma---kurdistan-25-september-2017

ئیرۆ پێنجەمین سالڤەگەرا رەفەراندۆما سەرخوەبوونا کوردستانێ یە، بریارە ژی د ڤێ بیرانینێ دە چالاکیێن جوربجور ل باژار و باژارۆکێن هەرێما کوردستانێ وەرن کرن.

رۆژا 7ێ خزیرانا 2017ێ، نوونەرێن پارتیێن سیاسی یێن د ناڤا پارلامەنتۆیا کوردستانێ دە و ب ئامادەبوونا سەرۆک بارزانی، جیگرێ سەرۆکێ هەرێما کوردستانێ، سەرۆکوەزیر و سەرۆکێ کۆمسیۆنا بلندا هلبژارتنێن کوردستانێ، بریارا ئەنجامدانا رەفەراندۆمێ هاتە دایین و ئەنجوومەنا بلندا رەفەراندومێ هات پێکانین و هەر یەک ژ نوونەرێن پارتیا دەمۆکراتا کوردستانێ (په‌ده‌كێ)، یەکیتیا نشتمانی یا کوردستانێ (یه‌نه‌كێ)، یەکگرتوویا ئیسلامی، تەڤگەرا ئیسلامی، پارتیا زەحمەتکێشان، حزبا شیۆعی و پارتیا سۆسیالست د وێ ئەنجوومەنێ دە بەشدار بوون.

هەر د وێ جڤینێ دە، رۆژا 25ێ ئیلۆنا 2017ان وەک رۆژا ئەنجامدانا رەفەراندومێ ل هەرێما کوردستانێ و ناڤچەیێن کوردستانی یێن ل دەرڤەیی ئیدارەیا هەرێما کوردستانێ هات دیارکرن و تەڤاهیا پارتی و ئالیێن سیاسی رازەمەندیا خوە ل سەر ئەنجامدانا رەفەراندۆمێ نیشان دان.

10 رۆژان بەری ئەنجامدانا رەفەراندومێ و د 15ێ ئیلۆنا 2017ێ دە، پارلامەنتۆیا کوردستانێ ب پرانیا دەنگان برێڤەچوونا رەفەراندۆمێ پەسەند کر، کۆمسیۆنا بلندا راپرسی و هلبژارتنان سەرپەرشتیا برێڤەچوونا رەفەراندۆما سەرخوەبوونێ کر.

بریارا ئەنجامدانا رەفەراندومێ، قۆناغەکە دن یا گرینگا خەبات و قوربانیدانا گەلێ کوردستانێ بوو، ب تایبەت کو تەڤاهیا ئالیان پشتگریا تەمام لێ کرن و سۆز دان کو ب هەموو کارینێن خوە کار ژ بۆ سەرخستنا پرۆسەیا رەفەراندۆمێ بکن.

گرینگیا زێدەتر یا بریارا ئەنجامدانا رەفەراندۆمێ د وێ ده‌ دەرکەت کو نەتەنێ ل هەرێما کوردستانێ، لێ بەلێ ل ناڤچەیێن کوردستانی یێن ل دەرڤەیی ئیدارەیا هەرێما کوردستانێ بێ کرن. ئەڤ رەفەراندۆم ژی ب پشتبەستنا ب بنەمایێن مافێ چارەنڤیسی یا گەلانە کو مافەکی رەوایە و ژ ئالیێ کۆمەلەیا گشتی یا نەتەوێن یەکگرتی ڤە هاتیە ناسکرن و هەرێما کوردستانێ ژی هەموو تایبەتمەندیێن وێ یێن وەک خاک، زمان، کولتوور و دیرۆک هەنە کو بریارێ ل سەر چارەنڤیس و پێشەرۆژا خوە بدە.

رۆژا 25ێ ئیلۆنا 2017ێ ب رێبەرتیا سەرۆک بارزانی، گەلێ کوردستانێ رەفەراندوما سەرخوەبوونێ ئەنجام دا و %93 دەنگێ “بەلێ” دان، هەر چقاس بوویەرێن پشتی رەفەراندومێ، سەرخوەبوونا گەلێ کوردستانێ پاش خست ژی، لێ ئەڤ داخواز هەتا نها د دل و دەروونا هەموو کوردان دە زیندی یە.

پوستێن ھەمان بەش