د سالڤەگەرا رەفەراندۆما سەرخوەبوونا کوردستانێ دا کوردێن باکورێ کوردستانێ ب سەربلندی رەفەراندۆمێ ب بیر تینن و ئالیێن کو رەفەراندۆمێ وەک شۆرەشەکێ ب بیر تینن ھەنە و نڤیسکار ژی بالێ دکشینن سەر رۆلا سەرۆک بارزانی یا د رەفەراندۆمێ دا کو ل ھەمبەر فشارێن ھوندر و دەرڤە خوە نەچەماند.
5 سال د سەر رەفەراندۆما سەرخوەبوونا کوردستانێ را دەرباس بوون. د 25 ئیلۆنا 2017 دا رەفەراندۆما سەرخوەبوونا کوردستانێ ب دەنگێ %92.7 ھات ئەرێکرن. ئەڤ یەک د ناڤا کوردێن سەرانسەرێ جیھانێ دا ب کەیفخوەشی ھات پێشوازیکرن.
ل باکورێ کوردستانێ ژی گەلەک کەس بۆ بەشداریا رەفەراندۆمێ چووبوون باشوورێ کوردستانێ کو وێ رۆژێ وەک رۆژەکە دیرۆکی و نەتەوەیی یا دیرۆکا کوردستانێ پێناسە دکن.
سیاسەتمەدار محەمەد ئەمین خەرخوری ژ کوردستان 24ێ را راگھاند: “ئەز گەلەک کێفخوەشم کو د رەفەراندۆما سەرخوەبوونا کوردستانێ دا بەشدار بووم و من دەنگێ خوە ب کار ئانی. رەفەراندۆما سەرخوەبوونا کوردستانێ شۆرەشەک بوو ژ بۆ کوردستانێ. وەک شۆرەشا ئیلۆن و گولانێ گرینگ بوو.”
د پێڤاژۆیا رەفەراندۆما سەرخوەبوونا کوردستانێ دا ژ بۆ کو رەفەراندۆم نەیێ ئەنجامدان گەلەک ھەول ھاتن دایین لێ تەڤی ھەموو فشاران رەفەراندۆم ھات ل دارخستن. نڤیسکارێن باکورێ کوردستانێ ژی دبێژن گرینگ بوو کو سەرۆک بارزانی ھەمبەر فشاران ھەلوەستەک ببریار نیشان دا.
بەردەڤکێ پلاتفۆرما زمانێ کوردی شەرەفخان جزیری ژی دیار کر: “رەفەراندۆم بوو تاپۆیا کوردستانێ ژ بۆ ھەموو کوردان. بیا من تشتێ دەرکەتی پێش ھەلوەستا سەرۆک بارزانی بوو کو ھەمبەر فشارێن ھوندر و دەرڤە سەری نەتەواند و بیا خوە کر. دڤێ ئەڤ ھەلوەستا سەرۆک بارزانی ژ بۆ ھەموو کوردان ببە خەتا ئەساسی.”
شیرۆڤەکارێن باکورێ کوردستانێ بالێ دکشینن سەر وێ یەکێ کو رۆلەکەکە گرینگا رەفەراندۆما سەرخوەبوونا کوردستانێ ئەو بوو کو کاری گەلەک کوردێن خوەدی ئیدەۆلۆژیێن دژبەری ھەڤ بینە جەم ھەڤ.
نڤیسکارێن باکورێ کوردستانێ دبێژن دەما رەفەراندۆمێ دا ناڤبەرا پارتی و رێخستنێن کوردان دا ناکۆکی ھەبوون لێ وان ناکۆکیان نەکارین ھەمبەر بایێ داخوازا سەرخوەبوونێ بەر خوە بدن و بانگ تێ کرن کو بلا ھەموو کورد خوەدی ل رەفەراندۆمێ دەربکەڤن.
