پێڤاژۆیا کو پشتی داخویانیا ھەپەگێ یا د 18ێ جۆتمەھێ دا ژ بەر بوویەرا 17 گەریلایێن ژیانا خوە ژ دەست دایی، ھاتی دەست پێ کرن، پێڤاژۆیەکە کو دڤێت ژ ئالیێ کوردان ڤە پر باش بهێت نرخاندن. ژ بەر کو پەکەکە دخوازە ئەڤێ پێڤاژۆیێ بەر ب ژەھریکرنا مەژییێ کوردان ڤە ببە. یێن کو مرنە زارۆکێن کوردانە، دەولەتا ترک ئەو کوشتنە، پەکەکێ ئەو جوان ب زانابوون خستنە وان کوونێن سیخوران ئانکو تونەلێن مرنێ دا، گەلۆ چما یێ تاوانبار پەدەکەیە. پەکەکە سەردەستیا خوەیا مەدیایێ ژ بۆ سەختەکاریێ باش بکار تینە. پەکەکێ ھەموو تێکلی، رێککەفتن، گەل و مەدیایا خوە ژ بۆ دژمناتیا پەدەکێ بکار تینە. دەما کو پەکەکە دفکرە کو چاوا بێبەختییێ ل پەدەکێ بکە، سەد مخابن مەدیایا باشوورێ کوردستانێ د ناڤا کەلاجانەکێ دا دخوازە ل سەر سەلاحەدین دەمیرتاش نووچەیەکێ بالاڤ بکە و دفکرە کا دێ کیژان خەباتکارێ ھەدەپێ بکە مێڤان دا کو بینەران زێدە بکە.
ب ئاوایەکی خوەزایی قادا پرۆپاگاندەیێ ژ بۆ پەکەکێ مایە. پەکەکە ب تەنا سەرێ خوە دسترە و دلەیزە. پەکەکە ب ھنجەتا پەدەکێ ڤێ قادێ تەنێ ژ بوو دژمناھییا ناڤ مالا کوردان بەلاڤبکە، بکار تینە. د دیرۆکا جیھانێ دا ب سەدان تەڤگەرێن چەپ و راستگر دەرکەتنە ھۆلێ کو ژ بۆی ملەتێ خوە شۆرەش کرنە، لێ کەسی ئەڤ قاس زرار نەدایە بیر و روحا یەکتیا ملەتێ خوە. راستە دەولەتا ترک ب ئاڤێتنا کیمیایی جوانێن کورد قەتل کرن و ژ دژمنی مەرحەمەت ھێڤیکرن دژمناتی بخوەیە. لێ چەکا راستییا کیمیایی پەکەک ب خوەیە، ژەھرا کیمیایی ژی ب قاسی پەکەکێ زرارێ ناگهینە کوردان. ژ بەرکو باندۆرا چەکا کیمیایی سینۆردارە لێ پەکەکە ب ڤێ ژەھرا خوە دخوازە سەران سەری کوردستانێ ژەھری بکە. پەکەکێ ل چار کنارێن وەلات کورد د وارێ سیایسی، جڤاکی، ئەخلاقی، ئابۆری و شوونواری دا فەتساندییە.
ب قاسی جەماوەرێ پەکەکێ جاھل، نەزان، بێ ئیرادە، موورید و ئاڤس بوویی چ جەماوەر تونە. ب راستی دەما ئەم ل جەماوەرێ پەکەکێ دنێرن، تشتا کو تێ بیرا مە ئەو گۆتنا خوەشا جەنگیز ئایتماتۆڤە. “مەعیدە ژ مەژی ژیرترە ژ بەر کو مەعیدە دزانە بڤەرەشە، لێ مەژی ھەموو قرێژیێ دادقورتینە.”
ئەڤ چل سالن گرسەیا پەکەکێ ھەموو ئاخافتنێن قرێژ، دەرەو و بێەخلاقی داتقورتینیت. نھا ئەڤ گرسە ژ ئالیێ پەکەکێ ڤە ژ فکر و ھەستێن کوردایەتی دهێت شووشتن. ئەڤ گرسەیا بێھش بوویی ب سەرکێشییا پەکەکێ ڤە ئێریشی کوردان دکە.
دەما کو ل جھەکی نووچەیەک پەسنێ پێشمەرگەیان ددە، ھەموو جەماوەرێ پەکەکێ ب یەک دەنگ بێرێزییێ ل پێشمەرگە دکن. دەما شاندەکە بیانی دھێت ھەرێما کوردستانێ و رێوورەسمەکی فەستیڤالێ د ھێتە مەشاندن ئێرشێن پەکەکێ یێن مەدیا جڤاکی زێدە دبن. کەرکووک ھات داگیرکرن، گرسەیا پەکەکێ دلشاد و کێفخوەش بوو.
پەکەکێ کورد ل کوردی کریە دژمن سرووشتا جڤاکا کورد گوھەراندییە. پەکەکە نە تەنێ گرسەیا خوە د وارێ رامانی دا، د وارێ ئەخلاقی دا ژی پووچ کرییە. دکارن بێ شەرم دەرەوان بکن، دکارن بێرێزییێ ل ھەموو دەستکەفتێن نەتەوی بکن.
میناک یەک ژ وان ھونەرمەند «ھۆزان دییار»ە. سترانبێژ دییار رابوو بەشداری بەرنامەیەک تەلەڤزیۆنێ بوو، وی وەک پسپۆرێ شەر بەحسا ھەرێما کو دەولەتا ترک لێ چەکێن کیمیایی بکار ئانی، کر. ل گۆر ھۆزان دیار پەدەکێ رێک چێکر دا کو دەولەتا ترک بکاربە چەکێن کیمیایی بکار بینە. لۆما ژی «ئایتاماتۆڤ» گۆتیە “مەعیدە دهەلاڤێژیت، مەژی نکاریت بهەلاڤێژیت”. لێ بەلێ یێ کو پیچەک ئاقل ھەبە دێ ل نەخشەیێ بنێرە و بزانە کو رێیا وەرخەلێ نە ژ ئامێدییێ، ژ چەلێ دچە دەڤەرێن ئۆپەراسیۆنێ. ھۆزان دیار نەکاری خوەبگرە و گۆت، “دڤێ پەدەکە بهێتە تەجریدکرن”. ئەڤ جەماوەرێ پەکەکێ کو ئەم ژێ رە دبێژن بێەخلاقە ئەڤەیە. ئەم ژ دییار دپرسین: “پار د جۆتمەھا 2021ێ دا پەکەکێ گۆتبوو جارەکێ ل وەرخەلێ 5 کەس، جارەکێ 4 کەس ب چەکێن کیمیەوی ھاتنە کوشتن. گەر پەکەکێ دزانی کو دەولەتا ترک دێ چەکێن کیمیایی بکار ئینیت، وێ دەمێ چما پشتی سالەکێ دیسا زارۆکێن کوردان خستن ڤە وێ کونا سیخوری دا؟”
ئەرێ، دڤێت جەماوەرێ پەکەکێ، داییکێن وان گەریلایان ڤێ پرسیارێ بکەن. “پەکەکێ چما زارۆکێن وان خستنە وێ توونێلێ دا” و دزانی کو ئەو دێ مسۆگەر بمرن. جەماوەرێ کو ڤێ پرسێ نەکاری ژ پەکەکێ بکە، ئەو گرسە نە تەنێ کوردایەتی و ھێزا خوەیا رامانی وەندا کرییە، ئەخلاق و وژدانا خوە ژی وندا کریە. لێ پەکەکە ب مرنا جوانێن کورد دژیت، گەر مرن سەکنی دێ پەکەکە ژی مریت.
زیھنیەتا کو پەکەکە دخوازە بئافرینە ژ ئێریشێن کیمیایی یێن دەولەتا ترک مەترسیدارترە. پەکەکە وەکە ئێشا پەنجەشێرێ لاش و مەژییێ کوردان تێک دبە.
