هێزێن ئیرانێ زارۆکەکێ کورد یێ 16 سالی کوشتن

iran-komar-zarok-kurd

هێزێن ئەولەکاریێ یێن ئیرانێ شەڤا بووری ل باژارێ پیرانشارێ یێ سەر ب پارێزگەها ئورمیێ یێ رۆژهلاتێ کوردستانێ ڤە ب گوللـەیێن راستی تەقە ل خوەپێشاندەرێن ل دژی دەستهلاتێ کرن و د ئەنجامێ دا زارۆکەکی 16 سالی یێ کورد هات کوشتن.

د حەفتەمین حەفتیا خوەپێشاندانێن ل دژی دەستهلاتا ئیرانێ دا، کو پشتی جانژدەستدانا کەچا کورد یا ژ سەقزێ ژینا ئەمینی دەست پێ کریە، شەڤا دەرباسبوویی ل چەند باژارێن رۆژهلاتێ کوردستانێ خوەپێشاندانێن ل دژی دەستهلاتا ئیرانێ بەردەوام بوون.

ل باژارێ پیرانشارێ یێ سەر ب پارێزگەها ئورمیێ ڤە ژی هەتا دەرەنگیا شەڤێ خوەپێشاندان هەبوو و ل تاخا کۆنەخانێ یا پیرانشارێ ئالۆزیەکا دژوار د ناڤبەرا خوەپێشاندەران و هێزێن ئەمنی یێن ئیرانێ دا دەرکەت.

هێزێن ئەولەکاریێ یێن ئیرانێ ب گوللـەیێن راستی تەقە ل وەلاتیێن بەشدار د خوەپێشاندانێ دە کرن و د ئەنجام دە زارۆکەکی 16 سالی یێ کورد ب ناڤێ کۆمار دەروفتادە جانێ خوە ژ دەست دا.

کۆمار دەروفتادە چەند دەمژمێران بەری کو ب گوللـەیا هێزێن ئیرانێ بێ کوشتن، د حەسابا خوە یا ئێنستاگرامێ دا پۆستەک بەلاڤ کربوو و تێدا نڤیسیبوو:

“ئەم خەلکێ رۆژهلاتا ناڤینن، هنەک ژ مە د شەر دا تێن کوشتن، هنەک ژ مە ل زیندانێ، هنەک ژ مە ل سەر جادەیان دمرن، هنەک ژ مە د دەریایێ دا نۆقمی ئاڤێ دبن، هەتا چیایێ بلند ژی تۆلا تەنێتیا خوە ل مە هلددن، چنکو کارێ مە مرنە”.

هەر ل پیرانشارێ زارۆکەکا كچ یا 12 سالی یا ب ناڤێ دیانا مەحموودی ژی کو د خوەپێشاندانێن رۆژا شەمبیێ دا ب گوللـەیا هێزێن ئیرانێ ژ سەرێ خوە بریندار ببوو، جانێ خوە ژ دەست دایە.

ل گۆر زانیاریان، گوللـە ب سەرێ دیانا مەحموودی کەتبوو و ب دژواری بریندار بووبوو، نەشتەرگەری ژێ را هاتیە کرن لێ بەلێ ژ بن نەشتەرگەریێ دەرنەکەتیە و جانێ خوە ژ دەست دایە.

ل گۆر ئاژانسا ئێرنا یا تایبەت ب چالاکڤانێن مافێن مرۆڤان ل ئیرانێ، ژ دەستپێکا خوەپێشاندانێن ڤێ جارێ ڤە هەتا دوهـی 34 زارۆک ژ ئالیێ هێزێن ئەمنی یێن ئیرانێ ڤە هاتنە کوشتن.

کۆمار دەروفتاده‌ و دیانا مەحموودی دو ژ وان زارۆکانن کو ب گوللـەیێن راستی ژ هێلا هێزێن ئەولەکاریێ ڤە ل سەرانسەرێ ئیرانێ هاتنە کوشتن، رایەدارێن تەهرانێ ب دەرەو ئیدیعا دکن کو چ گوللـەیێن راستی ژ هێلا هێزێن ئەولەهیێ ڤە ل دژی خوەپێشاندەران نەهاتنە بکارئانین.

حه‌فتیا بووری راپۆرتەرێ تایبەتێ نەتەوەیێن یەکبوویی ژ بۆ ئیرانێ جاوید رەحمان بانگ ل جڤاکا ناڤنەتەوەیی کر کو مەکانیزمەکا ناڤدەولەتی بهێته‌ ئاڤاکرن داکو دەربارێ کوشتنا خوەپێشاندەرێن ل ئیرانێ لێکۆلینان بکەن.

هەروها شەڤا دەرباسبیوو ل باژارێن سنە، دیواندەرە، دێگولان و مەریوانێ ل پارێزگەها سنە، سەردەشت، پیرانووئار، مهاباد و بۆکان ل پارێزگەها ئورمیێ، روانسەر ل پارێزگەها کرماشانێ، ئاودانان و ئیلام ل پارێزگەها ئیلامێ خوەپێشاندان بەردەوام بوون.

ل باژارێ سنە هەیا سەرێ ڤێ سبەهێ ژی خوەپێشاندەر ل دەرڤە بوون و درووشمێن ل دژی دەستهلاتا ئیرانێ ددان، ل تاخا ویلاشەهرا سنە ئالۆزی د ناڤبەر خوەپێشاندەران و هێزێن ئەمنی دا ده‌ركه‌تن، و تەقەیەکا زێدە هات کرن.

هەر ل سنەیێ هێزێن ئەولەکاریێ یێن ئیرانێ هەول دان کچەکا خوەندەکار ل جهێ مانا خوەندەکاران یا زانینگەها کوردستانێ بگرن، لێ مامۆستایێن زانینگەهێ چوونە بەر دەریێ ئاڤاهیا کو خوەندەکار لێ دمان و رێ نەدان کو هێزێن ئەمنی وێ خوەندەکارێ دەستەسەر بکه‌ن.

پوستێن ھەمان بەش