• ماکۆ ئەردەلان

د ڤان رۆژێن بۆری دە مەدیایێن پەکەکێ ڤیدیۆیەک بەلاڤ کرن کو تێ دە چەند کەس ب زمانێ کوردی و فارسی پەیامەکی بەلاڤ دکن و بانگ ل خوەندەکار و جوانێن رۆژھلات دکن کو ژ زانینگەھ و باژاران دەرکەڤن و ببنە گەریلایێن پەکەکێ. د ڤێ گۆتارێ دە، ئەزێ ھەول بدم دەستپێکێ ئەو پەیامێن کو د شەکل و ناڤەرۆکا ڤیدیۆیێ دە خویا دکن باس بکم، و د بەشا داوی دە ژی دێ بەحسا وان گەف و مەترسیان بکم کو پەکەکە ژ بۆ پاشەرۆژ و تێکۆشینا رزگاریخوازا رۆژھلاتێ کوردستانێ چێدکە و ھەگەر کوردێن رۆژھلات ھای ژ خوە نەبن، ئەو دێ راستی وان تەنگاسیان هێن یێن کو رۆژئاڤایێ وەلاتی ژ بەر پەکەکێ راستی وان هاتی.

ئەڤ ڤیدیۆ ھەر چەند 2 خولەک و 15 سانیەیە، لێ چەندین پەیامێن گرنگ دحەوینە و ئەڤ پەیامێن ھان ب زەلالی پێوەندیا پەکەکێ ب رەژیما ئیرانێ و گەف و مەترسیێن پەکەکێ ل سەر تەکۆشین و پاشەرۆژا رۆژھلاتێ کوردستانێ نیشان ددە.

کەسێن د ڤیدیۆیێ دە کی نە؟

د ڤیدیۆیێ دە 10 کەس تێن دیتن کو تەنێ یەک ژ وان روویێ خوە ناگرە و یێن دن ھەموویان روویێ خوە ڤەشارتنە. بەری کو ئەز بەحسا سەدەمێن ڤەشارتنا روویێ وان کەسا بکم، دخوازم باسی خالەک گرینگ بکم ئەو ژی ئەڤە کو د ڤیدیۆیا پەکەکێ دە “جەمەدانی” و “شەدا” هاتنە بکارئانین، کو هەر دو ژی بەرێ ژ ئالیێ پەکەکێ ڤە نەدھاتە بکارئانین، هەڤدەم خەباتکارێن هوندرین یێن رۆژهلاتێ کوردستانێ و گەلێ وێ پارچەیا کوردستانێ د ڤان سالێن داوی دا هلگرتنا “جەمەدانیێ” وەکە سمبۆلەک ژ بۆی جوداکرنا خوە ژ پەکەکێ بکار تینن. چەند سال بەرێ د پیرۆزباھیێن نەورۆزێ یێن ل رۆژھلاتێ کوردستانێ دە، ئالیگرێن پەکەکێ ب بلندکرنا ھندەک ژ ڤان “کەفیکا” کو گەریلا بکار تینن و ب راستی ژی ئەز نزانم ناڤێ وان چییە لێ پشتراستم چ پەیوەندیا وان ب کوردان ڤە نینە، ھەول دان ووسا نیشان بدن کو پەکەکە ل رۆژھلاتێ کوردستانێ خوەدی پێگەهەک مەزنە. لێ گەلێ رۆژھلات ب بلندکرنا “جەمەدانیێ” کو سەمبۆلا تێکۆشینا نەتەوی یا وێ پارچەیێ یە، پلانێن پەکەکێ پووچ کرن. بەرتەکێن گەلێ رۆژھلات ل ھەمبەر کۆمپلۆیا پەکەکێ و کۆمارا ئیسلامی ئەوقاس بەرفرەھ بوو کو نەورۆزا رۆژھلات ب “نەورۆزا جەمەدانیێ” ھاتە بناڤکرن. بێ گومان ئەو “جەمەدانی” ل رۆژهلاتێ کوردستانێ و پەرچەیێن دن یێن ولاتێ مە دە سەمبۆلا تێکۆشین و بەرخوەدانا نەتەوەیی و شۆرەشگێران و پێشمەرگەیێن کوردستانێ یە ل چیایان. پشتی ئازادبوونا باشوورێ کوردستانێ، گەلەک جاران سەرکردەیێن وێ پارچەیێ د هەڤدیتنێن هەری بلند و دیپلۆماتیک دە ب “جەمەدانیێ” بەشدار بوونە. ھەلبەت رەژیما ئیرانێ دخوازە ڤێ سەمبۆلێ ژ رۆژھلاتێ کوردستانێ بستینە و پەکەکە ژی ئالیکاریا ڤێ یەکێ دکە، لێ خەلکێ رۆژھلات ھشیارترن ژ ڤێ یەکێ کو ب ڤان پیلانیێن زارۆکانە بهێن خاپاندن.

د ڤیدەۆیێ دە یا سەیر ئەوە کو پەکەکە مفا ژ “جەمەدانیێ” وەرگرتیە و ھنەک کەسێن کو د ڤیدیۆیێ دا دەردکەڤن روویێ خوە ب “جەمەدانیێ” گرتنە. بکارئانینا “جەمەدانیێ” ژ ئالیێ پەکەکێ ڤە نایێ وێ واتەیێ کو باوەریا وێ “جەمەدانیێ” ھەیە، بەلکو دەما پەکەکە تێگهشتی کو نکارە ڤێ سەمبۆلا تێکۆشین و شۆرەشگەرێن کورد ژ گەل بستینە، د نها دا دخوازە ب مفا وەرگرتن ژ “جەمەدانیێ” و “شەدێ” خوە ب دۆستێ رۆژهلات نیشان بدە هەیا کو ب ڤی ئاوا بکارە گەل بخاپینە.

خالەک دن یا ڤیدیۆیێ ئەڤەیە کو چما ژ بلی کەسەکی تەڤ کەسێن دن یێن د ڤیدیۆیێ دا دیار روویێن خوە ڤەدشێرن؟ ھەلبەت ئەڤ یەک ژ دو ئەگەران دەرناکەڤە: یان یێن د ڤیدەۆیێ دا دیار دبن گەریلاتیێ وەک شەرم دحەسبینن، لۆما روویێ خوە ڤەدشێرن، یان ژی پەکەکە دەرەوان دکە و کەسێن کو د ڤیدیۆیێ دا خوەیا دبن گەریلایێن وێ یێن بەرێ نە و ژ بەر کو ب دەرکەتنا روویێ وان دێ هەر کەس بزانبە دەمەک درێژ ل چیا و شکەفتان دا ژیانە و جوداهیەکا مەزن د نێڤبەرا وان و کەسێن ل باژاران ژیان دکن و د زانینگەهان دا دخوینن هەیە، لەوما روویێ خوە ڤەدشێرن.

ناڤەرۆکا ڤیدیۆیێ

د فۆرما ڤیدیۆیێ دا گەلەک خالێن دن ژی ھەنە کو د شیاندایە نیقاش ل سەر بهێت کرن، لێ ئەم دخوازن زێدەتر بەحسا ناڤەرۆکا ڤیدیۆیێ و پەیامێن وێ بکن.

ڤیدیۆ ب وێ یەکێ دەست پێ دکە کو ژنەک ب روویێ خوە یێ نخوماندی نامەیەکێ دخوینە و نڤیس ژی ب کوردیەکا گەلەک خەراب ھاتیە نڤیساندن. د نامەیێ دا ئەڤ کەس وەکە کۆمەک جوان و ژنێن زانینگەھا سنەیێ تێن بناڤکرن. یێن کو ل سنەیێ دژین دزانن کو ل سنەیێ گەلەک زانینگەھ ھەنە، لێ چ زانینگەھەک ب ناڤێ زانینگەھا سنەیێ نینە. کەسێن کو ئەڤ گۆتارە نڤیساندنە و یێن خواندنە یان ھایا وان ژ باژارێ سنەیێ نینە یان ژی مەبەستا وان “زانینگەھا کوردستانێ”یە و ب دلمراد ناڤێ “کوردستان” ب کار نەئانیە و کرنە سنە.

د ھەڤۆکا یەکەم دا ناڤێ شۆرەشا ڤێ جارێ یا گەلێ رۆژهلاتێ کوردستانێ و ئیرانێ ب “شۆرەشا ئازادیا ژنێ” ب ناڤ کرن. ئەشکەرەیە کو گەر ئەم ل گۆر رێزمانا کوردی لێ بنێرن، واتەیا ھەڤۆکێ تێ وێ واتەیێ کو دخوازن ل ھەمبەری ڤێ شۆرەشێ ل بەر خوە بدن! لێ ئەم ڤێ یەکێ دخن بن حەسابا نەخوەندەواریا وان و تەنێ دێ بەحسا واتەیا “شۆرەشا ئازادیا ژنێ” کین. چ کەس حاشایێ ژ ڤێ یەکێ ناکە کو سەرھلدان و شۆرەشا ئەڤ جارە یا رۆژھلاتێ کوردستانێ و ئیرانێ ب کوشتنا ھۆڤانە یا کەچا کوردا سەقزێ یا ب ناڤێ ژینا ئەمینی یا 22 سالی ژ ئالیێ لەشکەرێن رەژیما ئیرانێ ڤە دەست پێ کر. ئەشکەرەیە کو کوردێن رۆژھلات ب راستی باوەر دکن کو تەڤی کو ژینا ژ بەر کو “ژن” بوو ھات گرتن ژی، لێ ژ بەر کو “کورد” و “کوردستانی” بوو ھات کوشتن. ژ ئالیەکێ دن ڤە سیاسەتمەدارێن نەتەوەیا فارس و ھەموو کەسێن کو ل دژی مافێن نەتەوەیێن بندەستێن ئیرانێ نە، ھەول ددن کو ئاستا مەزناتی و بەربەلاڤبوونا ڤێ سەرهلدانێ کێم بکن و وەکە سەرھلدانەک ژ بۆ بدەست خستنا مافێن چینەکا تایبەت ب ناڤ بکن و ببێژن گەل ب تەنێ ژ بۆی ئازادیا جل و بەرگان و هلوەشاندنا یاسایا “حیجابا نەچاری” داکەتنە کۆلانان.

ھەلبەت رەژیما تەھرانێ ژی ئەڤ یەک پێ نەخوەش نینە ژ بەر کو ب راستی هەم مەزناھیا سەرھلدانێ کێم بوویە و هەم ژی ب ھێسانی دکارە خوە رزگار بکە. بۆ میناک ب راکرنا “پۆلیسێن ئەخلاق” و رێگری نەکرن ژ ژنێن کو خوە حیجاب ناکن، دکارە ڤێ شۆرەشێ بفەتسینە. نها دەستپێکریە ژی و بەرپرسەکی رەژیما ئیسلامی د ھەڤپەیڤینەکێ دا گۆت: “مە د یاسایێ دا بەحسا ھەبوونا “پۆلیسێن ئەخلاق”ی نەکریە. خوە ئەحمەدینەژاد ژی وھا گۆت: “چ ئایەت و حەدیسەک نینە کو ببێژە، ئەگەر کەسەک خوە حیجاب نەکە بلا وی ل کۆلانان بگرن”. ل ڤڕ پرسا ژ پەکەکێ تێ کرن ئەڤە کو ئەگەر وەکە ئەو دبێژن شۆرەش شۆرەشا ئازادیا ژنێ بە، ب گوھەرتنا ھندەک یاسایان د چارچۆڤەیا رەژیما تەھرانێ دا، بەشەک ژ ئازادیێن ژنان دکارە بهێن دابینکرن، لێ مافێن رەوا یێن کوردان و رزگاریا کوردستانێ دێ چ لێ هێن؟ ب کورتی پەکەکە ژی وەک فاشیستێن فارسان دخوازە مافێن نەتەوی یێن نەتەوێن بندەستێن ئیرانێ و پرسا ئازادکرنا خاکێن ڤان ملەتان و د سەری دا نەتەوا کورد و رۆژھلاتێ کوردستانێ بخە ئالیەکێ و ژ بیرا وان ببە.

د بەشەکا دنا پەیامێ دا، دەما بەحسا رەژیما ئیرانێ تێ کرن، ھەول تێ دایین کو تەنێ وەکە رەژیمەکا زەلامسالاری بهێت نیشاندان و تایبەتمەندیێن داگیرکەریا وێ رەژێمێ ھاتینە ڤەشارتن و ب چ ئاوا ئاماژە پێ نایێ کرن. ژ بۆ مە کوردان مژارا ھەری گرینگ پرسگرێکا خاکا کوردستانێ و داگیرکرنا وێ ژ ئالیێ رەژیما ئیرانێ ڤەیە. رەژیمێن کو کوردستانێ داگیر دکن، چ زەلامسالاری بن چ فیمینیست، چ ئیسلامی و چ کۆمونیست، ڤێ راستیێ ناگوھەرینن کو ئارمانجا سەرەکەیا کوردان ئازادکرنا خاکا وانە و دژایەتیکرن و تێکۆشینا ژ بۆ ھلوەشاندنا سیستەما کۆلۆنیالیست دڤێت کارێ وان یێ یەکەم بیت. لێ مخابن پەکەکە نە تەنێ ناخوازە سیستەمێن کۆلۆنیالیستێن کوردستانێ ژ ھۆلێ بێن راکرن و کوردستان وەک وەلاتەکی داگیرکری ئازاد ببە، بەلکو ب ئەشکەرە و بەرفرەھ ل دژی رزگاری و سەرخوەبوونا کوردستانێ و ئاڤاکرنا دەولەتا کوردستانێ دەردکەڤە.

پشتی چەند گۆتنان، د پەیامێ دا رەوشا ئیرانێ وەک دەرفەتەکە زێرین ژ بۆ “یەکگرتن” و “خوەرێخستنکرنا” گەلێن ئیرانێ ھات نیشاندان. ئەڤ یەک ژی ب زەلالی نیشان ددە کو پەکەکە گرنگیێ ب مافێن نەتەوی یێن کورد و رزگاریا رۆژھلاتێ کوردستانێ نادە و ئێماژە ب ڤێ یەکێ نایێ کرن کو ئەڤ سەرھلدان دەرفەتەکە زێرینە ژ بۆ رزگاریا نەتەوی یا بەشەکی ژ وەلاتێ کوردان. د شوونا وێ دا بەحسا خوەرێخستنکرن و یەکگرتنا گەلن ئیرانێ دکە، کو ھەلبەت ژ بۆ بەرژەوەندیێن پارتیا خوەیە و خوە حازر کریە کو ھەمان کارەساتا ئانیە سەرێ رۆژئاڤایێ کوردستانێ، بینە سەرێ رۆژھلات ژی.

د داویا داخویانیێ دا ھێزێن گەریلا وەکە رێخستنا ھەری خورتا “ژن و جوانان” ب ناڤ دکە و بانگا بەرفرەھکرنا وێ دکە. ژ بۆی مزنکرنا هێزا گەریلا ژی ژ جوان و ژنان تێ خوەستن کو ببنە گەریلایێن پەکەکێ. ھەلبەت ل ڤڕ ب ئەشکەرە دەردکەڤە کو ئارمانجێن ڤێ پەیامێ تەنێ د بەرژەوەندیا رەژیما داگیرکەرا ئیرانێ دایە. یەک ژ تایبەتمەندیێن ڤێ سەرھلدان و شۆرەشا گەلێن رۆژھلاتێ کوردستانێ و ئیرانێ ئەوە کو تەڤی زەختێن رەژیمێ ژی، گەل ئامادە نینە ژ وەلاتێ خوە دەرکەڤە و ل بەر خوە ددە. ئەڤ ژی ژ باوەریا وان یا ب سەرکەفتنا شۆرەشا وان دهێت. ھەر چەند د خوەنیشاندانێن بەرێ یێن ئیرانێ دا گەلەک کەس ژ ترسا ئەشکەرە بوونا وان و سزادانا وان ژ ئالیێ رەژیمێ بەر ب وەلاتێن دن ڤە رەڤیان و ئاوارەی ولاتێن هەڤ سینۆرێ ئیرانێ بوون، لێ د ڤێ شۆرەشێ دا نە خەلکێ ئیرانێ، بەلکو بەرپرسێن رەژیمێ و مالباتێن کاربدەستێن رەژیما ئیرانێ نە کو درەڤن.

مانا گەل ب تایبەتی ژن و جوانێن کو رۆلا پێشەنگێن ڤێ شۆرەشێ دلیزن، رەژیما ئیرانێ نیگەران کریە. رایەدارێن تەھرانێ هەول ددن ل شوونا کو جوان و ژن ل کۆلانان بمینن و خوە بپارێزن ژ ئیرانێ دەرکەڤن. داخوازا پەکەکێ یا ژ بۆ گەریلابوونا جوان و ژنان ل گۆری بەرژەوەندیێن رەژیما تەھرانێ یە و بێ شک ب ھەڤکاری و لھەڤکرنا ھەر دو ئالیان بریار ھاتیە دایین. د رەوشا ئیرۆ دا ل رۆژھلات قادا راستا شۆرەش و تێکۆشینێ کۆلانێن باژار و باژارۆکانە، پەکەکە دخوازە ب کشاندنا جوان و ژنان بۆ ناڤا رەفێن گەریلا دا هەم ڤێ شۆرەشێ لاواز بکە و هەم ژی هێزەکا نوو یا مرۆڤان ب دەست بخە ژ بۆی کو ب دەستێ ترکا ب کوشتن بدە و داویێ بازارەک سیاسی ب خوینا وان بکە.

د ھەمان دەمێ دا بەحسکرنا رۆلا گەریلایان وەکە ھێزەکا چەکدار، ئەڤ ژی ب روویێن وان یێن گرتی کو بێھتر وەکە ھێزەکا وێرانکەر دهێت نیشاندان، دکارە وەکە بەلگەیەکێ ژ بۆ ئیسباتکرنا یەک ژ ئیدیعایێن رەژیما ئیرانێ ب گشتی و ب تایبەتی یێن “ئیتیلاعاتا ئیرانێ” و “ئیستیخباراتا سوپایێ پاسداران” بیت کو بەردەوام باس ل ڤێ یەکێ دکن کوردان رۆلەک وێرانکەر هەیە د خوەپیشاندانان دا و یێن تێن کوشتن ب وان چەکان تێن کوشتن کو کورد بکار تینن. ئیران ب ڤان ئیدیعایان دخوازە کۆمکوژیێن خوە رەوا نیشان بدە و نەتەوەیێن دن بترسینە کو کورد دخوازن خاکا وان داگیر بکن. ئەڤ یەک دکارە یەکتیا نەتەوێن ئیرانێ ژ بۆ رووخاندنا رەژیما تەھرانێ تێک ببە، کو ھەلبەت ئەڤ یەک تەنێ د بەرژەوەندا رەژیما ئیرانێ و داگیرکەرێن کوردستانێ دا یە. ئەڤ مژار ژ بۆ رەژیما ئیرانێ ئەوقاسی گرینگە کو ئامادە بوو ب دەھان مووشەک و درۆنێن خوەکوژ بەر ب پارتیێن نەتەوی یێن رۆژھلاتێ کوردستانێ ڤە باڤێژە.

د داویا ڤیدیۆیێ دا ئەو چەند کەس ل چەپکان ددن و درووشمەیێن “بژی سەرۆک ئاپۆ” دقیرن و دخوازن ب رێیا رێبەرێ پەکەکێ یێ گرتی د گرەڤا ئیمرالیێ دا و د بن رەحما دەولەتا ترک دا رۆژھلاتێ کوردستانێ رزگار بکن.! د پاشپەردەیا ڤیدیۆیێ دا وێنەیێ عەبدوللا ئۆجالان و چەند ئالایێن رەنگاورەنگ یێن پەکەکێ و شاخێن وێ تێنە دیتن کو ڤێ راستیێ ئیسبات دکە کو ھەڤۆکێن “پەژاک” و “کۆدار” تەنێ پەیڤن و یێن د کەتوار دا هەیی و بریارێ ددە ب تەنێ پەکەکە یە، ژ بەر ڤێ یەکێ ژی من د گۆتارا خوە دا ب تەنێ پەیڤا پەکەکە بکارئانیە.

ب لێنێرینا بلەز ل فۆرم و ناڤەرۆکا ڤێ کورتە ڤیدیۆیێ خویا دبە کو ئارمانجا پەکەکێ پشتگریکرنا تێکۆشینا رۆژھلاتێ کوردستانێ نینە و دخوازە ھەمان کارەساتا کو ئانیە سەرێ رۆژئاڤایێ کوردستانێ بینە سەرێ رۆژھلات ژی. د بەشا بهێت یا ڤێ گۆتارێ دا ئەز دێ بەحسا گەفێن پەکەکێ یێن ل سەر پاشەرۆژا رۆژھلات و راستیا شاخێن کو د بن ناڤێن جودا یێن وەک پەژاک، کۆدار و ھتد دا ژ بۆ خاپاندنا گەلێ رۆژھلات ھاتنە ئافراندن، بکم. هەڤدەم دێ ل پەی بەرسڤا ڤێ پرسێ گەرین کو گەلۆ پەکەکە دکارە پلانا ل دژی رۆژئاڤا پێک ئانی ل رۆژھلات ژی پێک بینە.

ب مە رە بن…