ڤیدیۆیەک کورت و پەیامەک مەزن ده‌ربارێ مەترسیێن پەکەکێ ل سەر رۆژھلاتێ کوردستانێ – «2»
د بەشا یەکەما ڤێ نڤیسێ دا مە ل سەر فۆرم و ناڤەرۆکا کورتە ڤیدیۆیەکێ کو ژ ئالیێ مەدیایا پەکەکێ ڤە ھاتیە بەلاڤکرن و تێدا تێ ئیدیعا کرن کۆمەک خوەندەکارێن زانینگەھا سنە تەڤلی گەریلا بوونە و بانگ ل جوان و ژنێن رۆژھلات دکن کو ژ کۆلانێن قەلەبالخ دەرکەڤن و تەڤلی رەفێن پەکەکێ ببن، کر. د ڤێ بەشێ دە ئه‌مێ مەترسیێن پەکەکێ یێن ل سەر سبەرۆژا رۆژھلات و راستیا شاخێن کو د بن ناڤێن جودا یێن وەکە «پژاک، کۆدار» ژ بۆ خاپاندنا گەلێ رۆژھلات ئاڤا کرنە، بکین.
لێگەرینا بلەز ل سێ مژاران: «ئاژاندایا پەکەکێ یا تێکلداری رۆژھلاتێ کوردستانێ، سەدەمێن دامەزراندنا پژاکێ وەکە باسکێ پەکەکێ و بەرنامەیا وێ یا ژ بۆ پاشەرۆژا رۆژھلات» دکارە وێنەیەکی زەلال دەربارا نیەت و مەرەما راستەقینە یا پەکەکێ ل همبەر رۆژهلاتێ کوردستانێ بدە مە.
بەرنامەیا پەکەکێ
پەیوەندیێن پەکەکێ ب رەژیما ئیرانێ رە خوەدی دیرۆکەکە درێژە و ب دەھان پرتووک و ب سەدان گۆتار ل سەر ھاتنە نڤیساندن. ئاستا پەیوەندیێن پەکەکێ ب تەھرانێ و دەزگەھێن ئستخباراتی یێن رەژیمێ رە ئەوقاس کوور بوونە کو ب ھەموو پیڤەران مرۆڤ دکارە ناڤێ خیانەتێ لێ بکە. پەکەکێ ژ دەما ھەبوونا خوە ڤە ھەتا نھا یەک تشت ژ بۆ تەڤگەرا رزگاریخوازییا کورد ل رۆژھلاتێ کوردستانێ نەکریە. د سەرھلدانا ٣ێ سباتێ یا ل رۆژھلات و ب تایبەتی ل ئورمیە و سنە، ب ھنجەتا ڤەگەراندنا ئۆجالان بۆ ترکیێ، کو د دەستپێکێ دە ب دەستوورا رەژیما تەھرانێ ھاتن لدارخستن و پشتی کو کوردان داخوازیێن خوە یێن نەتەوی یێن رەوا بەرەڤاژی کۆمپلۆیا ھەڤپارا پەکەکێ و تەھرانێ بلند کرن، ب دەهان کوردێن رزگاریخواز شەهید کرن، پەکەکێ ژ رەژیما ئیسلامیا ئیرانێ توندتر ئێریشی ئیرادەیا نەتەوی یا خوەپێشاندەران کر و خوەپێشاندەر وەکە خزمەتکارێن ئەمپەریالیزم، کەمالیزم و سیۆنیزمێ ب ناڤ کرن. د ھەموو سەرھلدان و خوەپێشاندانان دن دە کو کوردێن رۆژھلات ژ بۆ بدەستخستنا مافێن خوە یێن نەتەوی یێن رەوا ل دژی رەژیما تەھرانێ پێک ئانینە و خوین رژاندنە، پەکەکێ تو جاری ل پێشیا گەل نەبوویە و داخویانی و کارێن پەکەکێ هەردەم د بەرژەوەندییا داگیرکەرێن کوردستانێ دە بوویە.
پەکەکێ ب بەردەوامی دیرۆکا تێکۆشینا رزگاریخوازا کورد ل رۆژھلات مانیپۆلە کریە و ژ «سمکۆ شکاک ھەتا پێشەوا، د.قاسملۆ، برێز فواد، د. شەرەفکەندی» و تەڤ رێبەرێن دن یێن تەکۆشینا رزگاریخوازانەیا رۆژهلاتێ کوردستانێ راستی بێروومەتکرن و ئیهانەکرنا پەکەکێ و ئالیگرێن وێ هاتنە. ت پارتیەکە نەتەوی یا رۆژهلاتێ کوردستانێ تونەیە کو دەستێ پەکەکێ ب خوینا پێشمەرگە، ئەندام و ئالیگرەکێ وێ سۆر نەبوویی.
ژ خەینی ئەندامێن پارتیان و چالاکڤانێن سیاسی، پەکەکێ خوە دودل نەبوویە ژ ت دژمناتیەکێ ل دژی گەلێن ئاسایی یێن رۆژھلاتێ کوردستانێ ژی. گەلەک کەسێن ژ ئالیێ پەکەکێ ڤە ھاتنە رەڤاندن و ونداکرن ھەنە. ئەندامێن پەکەکێ د زیندانان دە ل دژی چالاکڤانێن سیاسیی ێن رۆژھلات ژ رەژیمێ رە وەکە سیخور خەبتینە و هژمارا وان کەسان نە هندکە کو ب سەدەما سیخوریا ئەندامێن پەکەکێ د ناڤا زیندانێن ئیرانێ دە راستی جەزایێن گران هاتنە.
ئانالیزه كرنا پەیوەندیێن ناڤبەرا پەکەکێ و رەژیما تەھرانێ و بەحسکرنا ھەموو خیانەتێن کو پەکەکێ ل کوردێن رۆژھلاتێ کوردستانێ کریە، نە مژارا ڤێ گۆتارێ یە و نە ژی د گۆتارەکێ دە دکارە وەرە بەحسکرن، ژ بەر کو هەر وەک بەرێ مه ئێماژە پێ دایی کارێن دژە گەل یێن پەکەکێ ل دژی رۆژهلاتێ کوردستانێ ئەوقاس زۆرن کو ب دەھان پرتووک دەربارێ وان دە ھاتنە نڤیساندن و ئەز پشتراستم کو ب رووخانا رەژیما ئیرانێ و ئەشکەرە کرنا دۆسیەیێن دەزگەھێن ئیستخباراتی، د شیان دە هەیە ب سەدان پرتووکێن دن ژی ل سەر وان خیانەتێن پەکەکێ وەرن نڤیساندن. لێ ژ بۆ کو ئەم نیەتا پەکەکێ یا راست فێم بکن، ھەوجە بوو کو ئەم بلەز و بەز ل دیرۆکا کریارێن پەکەکێ یێن ل دژی رۆژھلات بنێرن.
سەدەمێن دامەزراندنا پژاکێ
ھەر کەسێ ئاگاهیێن دەستپێکی ل سەر چەوانیا دامەزراندنا پژاکێ و رەوشا ھەرێمی و ناڤنەتەوی یا دەما دامەزراندنا ڤێ شاخا پەکەکێ دە هەبە، وێ ببینە کو ئارمانجا پەکەکێ ژ دامەزراندنا پژاکێ وەکە شاخا خوە ل رۆژھلاتێ کوردستانێ ب ت ئاوا نە ئەڤ بوویە کو خزمەتا تێکۆشینا رزگاریخوازییا ڤێ پەرچەیا ولات بکە.
ئێریشێن 11 ئیلۆنێ یێن تەرۆریستێن ئەل-قاعیدە ل دژی ئه‌مەریکا، قۆناغەکە نوو د سیاسەتا ناڤنەتەوی یا واشنگتۆنێ دە دروست کر. ھەبوونا لەشکەرییا ئه‌مەریکایێ یا ب ئاوایەک بەرچاڤتر ل رۆژھلاتا ناڤین یەک ژ تایبەتمەندیێن ڤێ قۆناغا نوو بوو. ئه‌مەریکایێ ب ئێریشکرنا ل سەر ئافگانیستانێ و رووخاندنا حکوومەتا تالیبانێ رە، هەڤدەم ئیران، ئیراق و کۆرەیا باکور وەکە ئەنیا خەرابیێ ب ناڤ کر. پەکەکێ خوەست رێیەکێ ببینە کو ژ ھەبوونا ئه‌مه‌ریكایێ سوود وەربگرە.
ھەلبەت ب ناڤ کرنا رەژیما ئیرانێ وەک ئەنیا خراپکاریێ دەرفەتەکە باش ژ بۆ ھەموو وان ئالیێن کو دژبەریا رەژیما ئیرانێ دکن، پەیدا کربوو. پەکەکێ ب ئاڤاکرنا پژاکێ خوەست ووسا ب ئه‌مەریکا بدە فێم کرن کو ئەو ژی ل ئەنیا شەر ل دژی ئیرانێ دە جیهـ دگرە و چاڤبرچیتیا پشتگریا ئامەریکایێ دکر. ھەر چقاس پەکەکێ ھەر تم ھەول دایە خوە وەکە تەڤگەرەکە چەپا کو ل دژی ئەمپەریالیزمێ ب تایبەتی ل دژی دەولەتێن یەکبوویی یێن ئه‌مەریکایێ کار دکە نیشان بدە، لێ یا راست ئەوە کو ھەر تم ھەول دایە کو د ئافرێ ئه‌مەریکایێ دە خوە ب چێرینە.
ئەشکەرەیە کو کشاندنا بالا ئه‌مەریکا و پشتەڤانیا وان نە تەنێ سەدەما دامەزراندنا پژاکێ بوو. پشتی کو نەتەوەیا کورد ل باشوورێ کوردستانێ ھنەک مافێن خوە یێن نەتەوی ب دەست خستین و ب دامەزراندنا ستاتۆیەکە سیاسی-نەتەوەیی بوو خوەدی پارلەمەنتۆیا کوردی یا ھلبژارتی و حکوومەتەک کوردستانی راگهاند کو ژ ئالیێ دەرڤە ڤە ھاتبوو ناسکرن. وەلاتێن داگیرکەر گەلەک زەخت ل ڤێ پێکھاتەیا نەتەوی کربوون و ژ بۆ تونەکرنا وێ ل ھنجەتان دگەریان. رەژیما ئیرانێ ھەبوونا پێشمەرگەیان ل قەندیلێ ژ بۆ دژبەریا باشوورێ کوردستانێ و پێکھاتەیا وێ یا سیاسی – نەتەوەیی وەکە ھنجەت بکار ئانیبوو. وێ دەمێ قەندیل د بن کۆنترۆلا پارتیا دەمۆکراتا کوردستانێ یا رۆژھلات دە بوو. سەرکردەیێن پارتیا دەمۆکراتا کوردستانێ (حەدەکێ) ماییندە و ئارامیا حکوومەتا ھەرێما کوردستانێ و پاراستنا پێکھاتەیا سیاسی-نەتەوی یا باشوور کو ب سالان ب تێکۆشین، قوربانیدان و بەخشاندنا خوینێ ھاتیە بدەستخستن ب ئەرکەک نەتەوی دزانی و ووسا دفکرین ئالیکاریکرنا باشوورێ کوردستانێ د قۆناغا رزگارییا نەتەوی دە ئەرکەک نشتیمانیە و سوود ژ بۆی پرسگرێکا کورد ل هەر چار پەرچەیێن کوردستانێ هەیە. هەر ل سەر ڤێ نێرینا نەتەوەیی بوو کو ژ بۆی هێنجەتان نەدن دەستێ رەژێما ئیرانێ ژ قەندیلێ دەرکەتن و پشترە چالاکیێن خوە یێن لەشکەری ل دژی رەژیما ئیرانێ راوەستاند. ب ڤەکشینا پێشمەرگەیان ژ قەندیلێ، پەکەکێ ب ئالیکاری و بریارا رەژیما ئیرانێ ل چیایێن قەندیلێ ب جھ بوو.
د ھەمان دەمێ دە ئیرانێ د ناڤا رۆژهلاتێ کورستانێ ژی ھەموو دەرفەت ب پەکەکێ دان کو چالاکیان ئەنجام بدە. وەکە میناک رۆژنامەیێن فەرمی یێن پەکەکێ یێن وەک «ولات» ل رۆژھلات ژی وەک رۆژنامەیێن دەولەتا ئیرانێ ب ھێسانی پەیدا دبوون. ئەڤ یەک بوو سەدەم کو ھەژمارەکە بەرچاڤ ژ جوانێن رۆژھلاتێ كوردستانێ یێن کو پەکەک باش ناس نەدکرن و د وێ باوەریێ دە بوون کو ئەو ژ بۆ رزگاریا نەتەوی شەر دکە، تەڤلی رێخستنێ ببن. لێ پشتی دەمەکی پەکەکێ دیت کو گەریلایێن رۆژھلات د ناڤا پارتیێ دە دبن ھێزەک کو پشتی دیتنا روویێ راستین یێ پەکەکێ رەخنە ل وێ دگرتن و رەخنەیێن وان باندۆر ل گەریلایێن دن ژی کر. رێڤەبەرێن پەکەکێ گهیشتن ڤێ ئەنجامێ کو ب تاسفیەکرن و دەرخستنێ ب تەنێ نکارن ڤێ پرسگرێکێ چارەسەر بکن، لەوما بریار دان کو گەریلایێن رۆژھلات ژ یێن دن ڤەقەتینن و ب ئاڤاکرنا رێخستنەکە سەختە و ب دانینا چەند کەسان وەک رێڤەبەرێن وێ رێخستنێ کو د راستیێ دە ت دەستهلاتەک د دەست وان دە نەبوو، سەرێ خوە سڤک بکن. ژ بۆ ڤێ ژی پژاک ئاڤا کرن.
ئەشکەرەیە کو دەستھلاتا سەرەکە یا رێڤەبرنا پژاکێ ھین ژی د دەستێ رێڤەبرێن پەکەکێ دە بوو. رێڤەبرێن پەکەکێ کەسێن پێباوەرێن خوە کو ژ رۆژھلاتێ ژی نەبوون د گرینگترین بەرپرساتیێن پژاکێ دە وەزیفەدار کربوون، بۆ میناک ت بەرپرسەکی خالێن گۆمرکی یێن ل سەر سینۆرێ د نێڤبەرا باشوور و رۆژهلاتێ کوردستانێ دە کو پژاک تێدە ب جیهـ کربوو د دەستێن گەریلایێن رۆژهلاتێ کوردستانێ دە نەبوو. پشترە کەسێن کو وەکە سەرکرداتیا پژاکێ ھاتبوون دەستنیشانکرن پێ حەسیان کو ئه‌و ھاتنە خاپاندن و ل بەندێ مانا پەکەکێ ژ بۆ ئەنجامدانا پێنگاڤێن ئەرینی ژ بۆی رۆژھلاتێ کوردستانێ بێ سوودە، ژ پەکەکێ جودا بوون. وەک میناک ھەموو ئەندامێن یەکەم گەرا مەکتەبا سیاسییا پژاکێ ژ پەکەکێ جودا بوون و تەڤی کو پشترە رێخستنەک ب ناڤێ «تفاقا کورد» ئاڤا کرن ژی، لێ ژ ترسا پەکەکێ رەڤیانە دەرڤە و هەیا نها د دەهان گۆتار و پرتووکان دە ب زەلالی باس ل ڤان سەختەکاریێن پەکەکێ کرنە. ئەو کوردێن رۆژھلات ژی کو د ناڤا پەکەکێ دە مان و تێکلیێن پەکەکێ یێن ب ئیرانێ رە رەخنە کرن گاڤ ب گاڤ ھاتن تاسفیە کرن.
سەدەمەکە دن یا دامەزراندنا پژاکێ ژ ئالیێ پەکەکێ ڤە ژ بۆ شەرێ دەستھلاتداریێ د ناڤا رێڤەبەریا پەکەکێ دە ڤەدگەرە. بەریا دامەزراندنا پژاکێ، عۆسمان ئۆجالانێ برایێ خوەدیێ پەکەکێ عەڤدللا ئۆجالان، بەرپرسێ گەریلایێن رۆژھلات بوو. بھێزبوونا گەریلایێن رۆژھلات ژ ئالیێ ھەژمار و کوالیتیێ ڤە پێگەھا عۆسمان ئۆجالان د ناڤ پەکەکێ دە بھێزتر کر و ھەتا بەحسا وێ یەکێ ھات کرن کو پشتی ڤەگەرا ئۆجالان بۆ ترکیێ، عۆسمانێ برایێ وی دکارە سەرۆکاتیا پەکەکێ بکە. کەسێن دن یێن د ناڤا پەکەکێ دە کو چاڤێ وان ل دەستهلاتا سەرەکە یا پەکەکێ بوو خوەستن ب دامەزراندنا پژاکێ پێگەها ئۆسمان ئۆجالان د ناڤا پەکەکێ دە لاواز بکن، ئا راست مرۆڤ دکارە ببێژە پژاک بەرھەما ناکۆکیەکە ناڤخوەیی یا د ناڤا پەکەکێ دە بوو.
فەیدەیێن دامەزراندنا پژاکێ ژ بۆ رەژیما ئیرانێ
گومان د ڤێ یەکێ دە تونەیە کو دامەزراندنا پژاکێ ل گۆری ھەڤپەیمانیا ستراتەژیکا د ناڤبەرا پەکەکێ و ئیرانێ دە ھاتیە ئیمزەکرن دە بوو. ژ بۆ ئیسباتکرنا ڤێ ئیدیعایێ ئەمێ بەحسا چەند راستیان بکین. دبە کو ئەم نە شاش بن ئەگەر ببێژین کو فەیدەیا دامەزراندنا پژاکێ ژ بۆ رەژیما ئیرانێ ژ یا پەکەکێ زێدەترە. فەیدەیێن پەکەکێ یێن د ئاڤاکرنا پژاکێ دە ھەموو تاکتیکی نە، لێ ئیرانێ د ئاڤاکرنا پژاکێ دە فەیدەیێن ستراتەژیک ب دەست خست. چاوا؟
پشتی دوورکەتنا پەشمەرگەیێن رۆژهلاتێ کوردستانێ ژ ناڤچەیێن سینۆری و راوەستاندنا چالاکیێن لەشکەری یێن د ناڤا رۆژهلاتا كوردستانێ ده، رەژیم پێ حەسیا کو ئیرادەیا رزگاریخوازیێ ل رۆژھلاتێ کوردستانێ ھێ ژی بەردەوامە و نایێ تەپەسەر کرن. ژ بەر ڤێ یەکێ ئەو دترسیا کو ئەڤ ھەست دبە کو رێخستنەک دن یا نەتەوی چێبکە. ئەڤ نیگەرانیا تەھرانێ راست بوو، ژ بەر کو پارتی و رێخستن بەرھەما نیەت و ڤالاھیا جڤاکێ نە و پارتی وەک ئالاڤەکی نە ژ بۆ جیبجیکرنا وان نیەتان و داگرتنا ڤالاھیان. نە دوور بوو کو پەنگاندنا ھەستێن نەتەوەپەرەستی ل رۆژھلات ببە سەدەما لێگەرینا ئاموورەک نوو ژ بۆ تژیکرنا ڤالاھیا نەتەوەی یا د ناڤبەرا نەتەوەیێن سەردەست و یێن بندەست دە. ل سەر ڤێ نێرینێ، ستراتەژیدانەرێن ئیرانێ گھیشتن وێ ئەنجامێ کو ل شوونا تەپەسەرکرنا تەڤگەرا ئازادیخوزی یا کوردان ل رۆژھلات، باشترە کو ڤێ تەڤگەرێ ژ رێیا وێ یا راست دوور بخن و بکن دەستێ رێخستنەکی دە کو هەڤسارێ وێ د دەستێ رەژیما ئیرانێ دە بە. بێی گومان پەکەکە باشترین بژاردەیا ئیرانێ بوو.
ژ ئالیەک دن ڤە کریارێن تەرۆریستی یێن رەژیما ئیرانێ ل سەرانسەری جیھانێ ژ ئارژانتینێ ھەتا ڤیه‌نا، پاریس، بەرلینێ، دەنگێ جڤاکا جیھانی بلند کربوو. ئیران وەک بانکا تەرۆریزما ناڤنەتەوەیی و جیێ تەرۆریستان د ھات باسکرن. رەژیما تەھرانێ دخوەست رێیەکێ ببینە کو نە تەنێ خوە ژ بەرپرساتیا کریارێن خوە یێن تەرۆریستی ڤەشێرە، بەلکی خوە ژی وەک قوربانیێن تەرۆریزمێ نیشان بدە. د ڤێ ناڤبەرێ دە، رەژیما تەھرانێ ب بەردەوامی ھەول دا کو تێکۆشینا رزگاریخوازییا گەلێ کورد و نەتەوەیێن دن یێن بندەستێن ئیرانێ وەکە چالاکیێن تەرۆریستی نیشان بدە. ھەلبەت باشترین بژاردە بۆ ستراتەژیا رەژیما ئیسلامییا تەھرانێ دیسا پەکەكه بوو. ھەر چقاس مه ژی وەکە هەر کوردەکی پێ نەخوەشە، لێ ئەڤ راستیەکە کو پەکەکه د ناڤ جڤاکا ناڤنەتەوەیی دە «کاراکتەرەکێ تەرۆریستی» هه‌یه. دامەزراندنا پژاکێ و چالاکیێن وێ یێن ئەشکەرە یێن ل دژی ئیرانێ، ژ ئالیەکی دکاربوو کارەکتەرەک نەدەمۆکراتیک و «تەرۆریست» بدە تێکۆشینا رزگارییا رۆژھلاتێ کوردستانێ و تەپەسەرکرنا تەڤگەرا رەوا یا نەتەوییا کورد وەکە شەرێ تەرۆرێ ب ناڤ بکە، ژ ئالیەکی دن ڤە دبوو ئالاڤەک ژ بۆی رەژێما ئیرانێ ژ بۆی کو خوە وەکە مەزلووم نیشان بدە و خوە وەکە دەولەتەکا کو دژە «تەرۆرێ» شەر دکە بەرچاڤ بکە.
ب کورتی ئەم دکارن بگهن ڤێ ئەنجامێ کو بریارا دامەزراندنا پژاکێ نە تەنێ ژ بۆ خزمەتا تێکۆشینا رزگاریا رۆژھلاتێ کوردستانێ نەبوو، بەلکی بریارەکە ھەڤبەشا رەژیما ئیرانێ و پەکەکێ بوو. ژ بەر کو ب سایا دامەزراندنا پژاکێ پەکەکێ ھنەک دەستکەفتیێن تاکتیکی یێن حزبی ب دەست خستنە و رەژیما ئیرانێ ژی ھنەک دەستکەفتیێن ستراتەژیک ب دەست خستنە.
د بەشا پێش دە ئەمێ بەرنامەیا پەکەکێ/پژاکێ یا رۆژھلاتێ کوردستانێ بنرخینن و وێ ل بەرسڤا ڤێ پرسێ بگەرن کو گەلۆ پەکەکێ دکارە وەکە رۆژئاڤا کوردستانێ پرسگرێکا کورد ل رۆژھلاتێ کوردستانێ ژی بەر ب رێیەکە نەدیار و نە دروست دە ببە و پارێزڤانیێ ل بەرژەوەندیێن داگیرکەرێن کورد بکە؟
ل به‌ندا مه بن
