ترکیا ژ بۆ ڤەکشینا ژ ئۆپەراسیۆنا بەژایی ل رۆژئاڤایێ کوردستانێ مەرجێ داتینە کو دڤێت ھەسەدە ژ منبج، تل رەفعەت و کۆبانێ ڤەکشە و سازیێن حکوومەتا سووریێ ژی ڤەگەرن وان دەڤەران.
کەنالا “ئەل جەزیرە” ژ سەر زارێ ژێدەرەکی فەرمی یێ ترکیێ راگھاند، ترکیێ داخوازا ڤەکشینا ھێزێن سووریەیا دەمۆکراتیک (ھەسەدێ) ژ منبج، کۆبانێ و تل رەفعەت و ڤەگەرینا سازیێن حکوومەتا سووریێ بۆ وان دەڤەران کریە.
وی ژێدەری دیار کر ژی، ترکیە ژ بۆ شەرت و مەرجێن وێ بهێن پێکانین، دەمەک وەک مۆلەت دایە، ئەگەر مەرجێ وێ نەهێت جێبەجێکرن، دێ ئالتەرناتیف ئۆپەراسیۆنەکا لەشکەری ل وان دەڤەرێن ناڤبۆری بە.
رووسیا ل سەر خەتا کریزێ یە
ل گۆری وی ژێدەری، ئالیێ رووسیا ھەول ددە داخوازێن ترکیێ ل رۆژئاڤایێ کوردستانێ و باکورێ سووریێ ب جھ بینە، کو ھەول ددە رێکەفتنەکێ د ناڤبەرا رێژیما سووریێ و ھەسەدێ دە پێک بینە کو ھەرێمێن ھەسەدێ رادەستی ھێزێن رێژیمێ بکە، دا کو رێ ل بەر ئۆپەراسیۆنەکا بەژایی یا ئارتێشا ترکیێ بگرە.
رۆژنامەیا ئەل-وەتەن یا گرێدایی رەژیما سووریێ د ھەژمارا خوە یا دوھی دوشەمبێ دە راگھاند، رۆژا یەکشەمبا بۆری فەرماندارێ ھێزێن رووسیایێ ل سووریەیێ ئەلکساندەر چاکۆ و فەرماندارێ گشتی یێ ھەسەدێ مەزلووم عەبدی ل باژارێ حەسەکێ جڤیان، تا کو رێ ل بەر ئەگەرا ئۆپەراسیۆنەکا بەژاھی یا ترکیێ بگرن.
ل گۆری وێ رۆژنامەیێ، چاکۆ پێشنیارەک پێشکێشی مەزلووم عەبدی کر کو ھێزێن ھەسەدێ ٣٠ کیلۆمەترۆیان ژ سینۆر ب دوور بکەڤن، لێ ئەڤ پێشنیار ژ ئالیێ ھەسەدێ ڤە نەھات قەبوولکرن.
ھەسەدە ل بەندا ھەولێن ئامەریکا یە
ل گۆری ھندەک شۆپینەران ژی، ھەسەدە ل بەندا ئەنجامێن ھەولدانێن واشنگتۆنێ یە کو ھەول ددە ئەنقەرەیێ رازی بکە کو ئۆپەراسیۆنا لەشکەری یا بەرفرەھ بەتال بکە و نەخشەرێیا کۆنترۆلا ھێزێن کو ل رۆژئاڤایێ کوردستانێ و باکورێ رۆژھلاتێ سووریێ ھەیە، وەک خوە بمینە.
شۆپینەر دبێژن، رۆلا ئامەریکا د دەربارێ رۆژئاڤایێ کوردستانێ و باکور رۆژھلاتێ سووریێ دە دیارکەرە، ژ بەر کو ھێزێن ئامەریکی و بارەگەھێن وێ یێن لەشکەری ل رۆژھلاتێ چەمێ فراتێ ھەنە، ژ بەر وێ ژی بریارا یەکەم و داوی ل وێ ھەرێمێ، ژ بۆ ئامەریکا یە.
ھەر د ڤێ دەربارێ دە سەرپەرشتێ پەیوەندیێن ستراتەژیک یێن ئەنجوومەنا ئاسایشا نەتەوی یا کۆشکا سپی جۆن کێربی گۆتبوو، مافێ ترکیێ یە کو خوە و وەلاتیێن خوە ژ ھەر ئێرشەکێ بپارێزن، لێ د ھەمان دەمێ دە ئەو دخوازن ئالۆزی ل ھەرێمێ کێم ببن.
کێربی گۆت کو ئامەریکا دلگرانە کو ئۆپەراسیۆنەکا لەشکەری یا ژ ئالیێ ترکیێ ڤە، دکارە زرارێ بدە ئەولەکاریا سڤیلان و ھەڤکاریا ئامەریکا و ھێزێن کوردی د شەرێ ل دژی رێخستنا تەرۆریست یا داعشێ دە.
ئێریشێن ترکیێ بەردەوامن
ئەڤ یەک د دەمەکێ دە یە، ئارتێشا ترکیێ ب تۆپ، مووشەک و درۆنان ئێریشێن خوە ل سەر بارەگەھێن ھەسەدێ و ھێزێن رێژیما سووریێ ل رۆژئاڤایێ کوردستانێ و باکورێ سووریێ بەردەوام دکە.
رەوانگەھا سووری یا مافێن مرۆڤان (سۆھر) راگھاند، ئارتێشا ترکیێ چەند گوندێن کۆبانێ، دەردۆرا تل رەفعەت و دەردۆرا وێ، گوندێ گرێ سپی و رێیا M4 ل تل تەمرێ تۆپباران و بۆمبەباران کرن.
ژ ئالیەکی دن ڤە ژی، ئاژانسا نووچەیان یا “رویتەرس” ژی دوھی ل سەر زارێ بەرپرسەکی ترکیێ راگھاندبوو، “تەنێ پێویستیا ئارتێشێ ب چەند رۆژان ھەیە کو ژ بۆ ئێرشا بەژایی ل باکورێ سووریێ ئامادە بە.”
بەرپرسەکی دن یێ ترک ژ ھەمان ئاژانسێ رە گۆت کو، ھەموو ئامادەکاری تەمام بوونە، ئەو نھا تەنێ ل بەندا بریارا سیاسی نە.
