شاندەیەکا پارتیا دەمۆکراتیکا گەلان (ھەدەپێ) د چارچۆڤەیا خەباتێن ھلبژارتنێن 2023یێ دا سەردانا پارتیا دەمۆکراتا کوردستانێ-ترکیا (پەدەکە-ت) کر و ھەردوو ئالیان ئاماژە کرن کو دڤێت کورد د ھلبژارتنان دا ھەڤگرتی بن و بۆ کوردان خزمەتێ بکن.
شاندەیا پارتیا دەمۆکراتیکا گەلان (ھەدەپێ) کو ژ ھەڤسەرۆکێ کەجەدێ و پارلەمەنتەرێ ئاگریێ بەردان ئۆزتورک، پارلەمەنتەرێ ھەدەپێ یێ دیاربەکر ئیمام تاشچەر و ھەڤسەرۆکا پارتیا ھەرێمێن دەمۆکراتیک دەبەپێ سالیحا ئایدەنیز پێک تێ سەردانا پارتیا دەمۆکراتا کوردستانا ترکیا کر.
شاندە ژ ئالیێ سەرۆکێ گشتی یێ پەدەکە-ت مەحمەد ئەمین کارداش ڤە ھات پێشوازیکرن. د ھەڤدیتنێ دا بەحسا خەباتێن ھلبژارتنێ یێن 2023یێ ھات کرن و ھەردو ئالیان خوەستن کو تفاقا کوردستانی یا د ناڤبەرا ئالیان دا ھاتبوو ئاڤاکرن بەردەوام بە.
ھەڤسەرۆکا پارتیا ھەرێمێن دەمۆکراتیک دەبەپێ سالیحا ئایدەنیز ئاماژە کر کو تفاقێن جومھوری و مللەت نەکارینە ژ بۆی پرسگرێکێن جڤاکی ببن بەرسڤ و ھەر وھا ئانی زمان کو ھەردو تفاق ژی ژ بۆ چارەسەریا پرسا کورد ھەولێ نادن و ژ بەر ڤێ یەکێ بال کشاند سەر گرنگیا یەکیتیا کوردان.
د ھەڤدیتنێ دا ھەردو ئالیان ئۆپەراسیۆنا سەر رۆژئاڤایێ کوردستانێ شەرمەزار کرن و ھات ئاماژەکرن کو ئارمانج دەستکەفتیێن کوردانن.
د ناڤبەرا پارتیێن وەک پارتیا دەمۆکراتیکا گەلان ھەدەپێ، پارتیا ھەرێمێن دەمۆکراتیک دەبەپێ، پارتیا کۆمونیستا کوردستانێ، پارتیا ئینسان و ئازادی، کۆمەلەیا شۆرەشگەر و دەمۆکراتێن کورد دەدەکەدە، پەدەکە باکور، پارتیا دەمۆکراتا کوردستانا ترکیە، پارتیا ئازادی دا د ھلبژارتنێن 2018ێ دا تفاقا کوردی ھاتبوو ئاڤاکرن و نھا ھەدەپە دخوازە ھەمان تفاقێ بۆ ھلبژارتنێن 2023یێ ژی بدۆمینە.
ھەدەپێ د 25ێ تەباخێ دا ل گەل پارتیێن چەپگر و سۆسیالست یێن ترکیایێ تفاقەک ب ناڤێ “تفاقا کەد و ئازادیێ” راگھاندبوو و نھا ژی دخوازە تفاقا کوردی بدۆمینە و ھەردو تفاقان بکە یەک.
