وەزیرێ به‌رگریێ یێ ئه‌مەریکایێ لوید ئاوستن ل گەل وەزیرێ به‌رگریێ یێ ترکیێ هولۆسی ئاکار ب رێیا تەلەفۆنێ ئاخڤی و ژێ رە راگهاند کو ئه‌مه‌ریكا ب ئاوایەکی توند ل دژی ئۆپەراسیۆنەکە نوو یا ل سەر رۆژئاڤایێ کوردستانێ یە.
ل گۆر داخویانیا وەزارەتا به‌رگریێ یا ترکیێ، د پێوەندییا تەلەفۆنی دە وەزیرێ به‌رگریێ یێ ئه‌مه‌ریكایێ لوید ئاوستن و وەزیرێ به‌رگریێ یێ ترکیێ هولۆسی ئاکار ل سەر مژارێن بەرەڤانی و ئەولەهیێ یا ناڤچەیێ ئاخڤینە.
هولۆسی ئاکار د پێوەندیێ دە ئانیە زمان کو ترکیە و ئه‌مه‌ریكا دو هەڤبەشێن گرینگن و “ئۆپەراسیۆنێن ل دژی تەرۆرێ، د چارچۆڤەیا مافێن بەرەڤانیا رەوا یێن مادەیا 51 یا پەیمانا نەتەوەیێن یەکگرتی دە تێنە کرن”.
ئاکار گۆتیە کو “د ئۆپەراسیۆنێن تێکۆشینا دژی تەرۆرێ دە ئارمانجا یەکانە تەرۆریستن و هێزێن هەڤپەیمانیێ ئان ژی سڤیل دێ زیانێ نەبینن”.
پەنتاگۆن: ئەم ب ئاوایەکی توند ل دژی ئۆپەراسیۆنێ نە
پشتی پێوەندیێ، ژ ئالیێ وەزارەتا بەرەڤانیێ یا ئه‌مه‌ریكایێ (پەنتاگۆن) داخویانیەکە نڤیسکی هات راگهاندن.
د داخویانیێ دە هاتیە دیارکرن کو وەزیرێ به‌رگریێ یێ ئه‌مه‌ریكایێ لوید ئاوستن ژ بەر ئێریشێن ل جادەیا ئیستقلالێ، کلیس و دیلۆکێ، سەرساخی ل هولۆسی ئاکار کریە.
لوید ئاوستن داخواز کریە کو راگه‌شییا ل سووریێ وەرە کێمکرن و ئەشکەرە کریە کو ئه‌مه‌ریكا ب ئاوایەکی توند ل دژی ئۆپەراسیۆنەکە نوو یا ل سەر رۆژئاڤایێ کوردستانێ یە.
ئاوستن دیار کریە، ئۆپەراسیۆنێن ئاسمانی یێن کو ژیانا لەشکەران دخە مەترسیێ، دڤێ وەرن راوەستاندن.
