رۆژەڤا عەڤدلا ئۆجەلان ب بابەتێن جوربەجور تێ رۆژەڤێ. بێگومان ئەڤ خستنا رۆژەڤێ خوەدی حەسابێن جودایە. د داویا مەھا چلەیا بێ و دەستپێکا مەھا شوباتێ دە دێ ئەڤ مژار زەلالتر ببن. لێ ئەم دکارن رەوشا نها پیچەک شیرۆڤە بکن.

بەریا ھەر تشتی، پەکەکە ھەما ھەما کارەکی پرۆپاگاندا و مانیپولاسیۆنێ دکە، د داویا ھەموو ھاڤینان دا ئۆجالان وەک مژارەکێ بکار تینە دا کو رۆژەڤێ ل سەر خوە بھێلە. واتە ھەر سال “ئازادی ژ بۆ رێبەرتی، تەجرید” و ھتد. ب رێکخستنا کامپانیایێن د بن سەرناڤان جودا دە دخوازە جەماوەرێ خوە بخە ناڤا بزاڤێ دا. ب ڤی ئاوایی رۆژەڤا جەماوەرێ خوە د دەستێ خوە دە دگرە.

گەلۆ CPT ئۆجالان دیت یان نە؟

کۆمیتەیا پێشیگرتنا ل ئیشکەنجەیێ CPTێ راگھاند کو د ئیلۆنا 2022یێ دا چوویە ئیمرالیێ. ھەر وھا CPT گۆت کو ئەو دێ ئەنجامێن ھەڤدیتنێن خوە ئاشکەرا بکن. پەکەکەیا کو بھارا بۆری پلانا کامپانیایێ ژ بۆ ئۆجالان کربوو، ژ بەر سەردانا CPT عاجز بوو. ژ بەر کو ب ڤی ئاوایی پەکەکێ نەدکاری چیرۆکا تەجریدێ ڤەھینە. ژ بۆ ڤێ ژی ڤێ جارێ ئیدیعایا “ئۆجالان لگەل CPT ھەڤدیتن پێک نەئانیە” ھاتە کرن. چ بنگەھێ ڤێ ئیدیعایێ نینە. کەجەکێ ژ بۆ کو بکاربە کامپانیایێ بمەشینە، ژ ئالیێ سەندیکایا یاسایێ یا پارێزەرێن ئۆجالان لێ نە، داخویانی دا. واتە ب خوە نووچەیێن سەختە بەلاڤ دکە و ل سەر ڤان نووچەیان سیاسەتێ دکە، بانگاوازییا چالاکیێ ژ گەل دکە.

ئۆجالان چما دۆز ل دژی یوونانیستانێ ڤەکر؟

د دەما کو ئەڤ سەختەکاری و دەرەوێن دەربارێ ئۆجالان دا دھاتن بەلاڤکرن، نووچەیەک نوو ھات چاپەمەنیێ: ئۆجالان ل دژی یوونانیستانێ دۆز ڤەکر و دۆزا وی ھات ئەرێکرن. واتە ئۆجالان دەربارێ یوونانیستانێ دا شکایەتا خوە بر گەل دادگەها مافێن مرۆڤان یا ئەورۆپایێ. پر بالکێش خویا دکە کو ئۆجالان دەما کو د ناڤبەرا ترکیا و یوونانیستانێ دا ئالۆزی و پەڤچوون دەرکەت، بلەز دۆز ڤەکر.

ھەر چەند ئاگاھیێن بەرفرەھ دەربارێ دۆزێ دا تونە بن ژی، ئۆجالان هاریکاریا ترکیێ کر. ئۆجالان د سالا 1999ێ دە ژی ئەڤ یەک کر و دەما ئانین ترکیایێ نە ل دژی ترکیایێ بەلکو ل دژی یوونانیستانێ دۆز ڤەکر و ئەو کرن ئارمانچ. ئۆجالان د مەھا خزیرانا 2000ێ دە د ھەڤدیتنەکا خوە دا گۆتبوو، “یێن ل ڤر (دەولەت) دخوازن کو ئەم زەختێ ل یوونانیستانێ بکن” خویایە کو ئۆجالان ئەو خەتا دەولەتێ بەردەوام کریە.

ژ بەر ڤێ یەکێ دەما مرۆڤ ل ھەر تشتی دنێرە، ل سەر ئۆجالان تەجرید تونەیە، لێ دەولەت و پەکەکە ژی پێدڤیا وان ب کامپانیا ئۆجالان ھەیە. پێویستی ب وێ پێڤاژۆیا ل ھەرچار پارچەیێن کوردستان تێدا ھەیە.

راپەرینا گەل یا رۆژھلات پەکەکێ دخە ناڤا تەنگاسیان

پەکەکە دخوازە راپەرینا گەل ل رۆژھلاتێ کوردستانێ و ئیرانێ زوو سار ببە. ژ بەر کو ھەموو ئاستێن ئیداری د ھاویردۆرێن ئیرانێ دا دژین، ژیانا وان د بن گارانتیا ئیرانێ دایە. سەرھلدانەکا درێژا کوردان ل ئیرانێ، حەسابێن پەکەکێ خەراب دکە. ژ بەر ڤێ سەدەمێ یەک ستوونا رۆژەڤا ئۆجالان ئەوە کو مرۆڤ شۆرەشا رۆژھلاتێ کوردستانێ یا ل دژی رەژیما فاشیستا ئیرانێ ژ بیر بکە. دخوازە بەرێ کوردان ل سەر ئیرانێ بقوولبینە جھەک دن.

خالەکە دن ژی تێکچوونا ھەپەگێ یا ل ھەمبەری ئۆپەراسیۆنا ئارتێشا ترکیایە د ناڤا سینۆرێن ھەرێما کوردستانێ دا، داکو ئامارێن راستەقینە یێن ئۆپەراسیۆنێ ژ گەلێ کورد ڤەشێرە. ئەڤ مژارا بەرئالیکرنا رۆژەڤێ ژی مژارەکا گرینگە.

لێ یا کو رێ ل بەر ڤان ھەر دو مژاران دگرە رۆژئاڤایە. کا ئەم چەند مژارێن سەرەکە ڤەکۆلین.

د پلانا داگیرکەریا ترکیایێ یا ل سەر رۆژئاڤا دا رێبازێن نوو

پێڤاژۆیا ئۆپەراسیۆنا کو دەولەتا ترک پلان دکر ل رۆژئاڤا پێک بینە، وەکە ل عەفرینێ و سەرێ کانیێ بێدەنگ نەبوون. جڤاکا ناڤنەتەوەیی نەرازیبوون نیشان دا. دەولەتا ترک دبینە کو ئۆپەراسیۆنا لەشکەری شەرت و مەرجان ئالۆز دکە، د چارچۆڤەیا پلانا خوەیا داگیرکرنا رۆژئاڤا دا چ رۆلی بدە ئۆجالان و پەکەکێ نیقاش دکە. واتە، دەولەتا ترک پلان دکە کو رۆژئاڤا نە عەسکەری بە ژی کا وێ چاوا د ھوندر دا، د ئالیێ سیاسی دا، ب دەست بخە.

د ڤر دا خالا کو دڤێت ب زەلالی بهێت گۆتن ئەڤەیە: تەڤی داخویانیێن پەکەکێ و رایەدارێن دەولەتێ ژی، بێگومان د ناڤبەرا ھەر دو ئالیان دا گووفتوگۆ ھەیە. ئەڤ ترافیکا ھەڤدیتنان قەت نەسەکنیە.

رۆلا ئۆجالان ل عەفرینێ:

ئۆجالان ل عەفرینێ رۆلەک گرنگ گرت سەر خوە. مراد قارایلان بخوە ژی گۆت، “رووسیا و ترکیێ ژ بۆ شکاندنا بەرخوەدانا مەیا ل عەفرینێ لجنە شاندن ئیمرالیێ. ئەم دێ د دەمەک نێزیک دا داخویانیەکا بەرفرەھ بدن.” لێ ئەو داخویانی قەت نەھات دایین و عەفرین د شەڤەکێ دا ھاتە ڤالاکرن.

چما ھێزێن یەپەگێ ژ نشکا ڤە ژ عەفرینێ دەرکەتن؟ قارایلان ژی دزانی کو شاندەک شاندنە ئیمرالیێ؟ ئۆجالان چ گۆت وێ شاندێ؟ ئەڤە چ جاران نەھاتن ئەشکەرەکرن. لێ نێرینا ھەڤپارا کەسێن کو سیاسەتا ئۆبژەکتیف دکن، د بەردانا عەفرینێ دا بالێ دکێشن سەر رۆلا ئۆجالان.

لێ شەرت و مەرج نە وەک بەرێ نە. زەحمەتە کو داخوازێن نوو یێن ترکیێ وەک عەفرینێ ب لەز و بەز بهێن جێبەجێ کرن. دەڤەرەکا پر ناکۆکە. ژ بۆ ڤێ ژی ترکیا سیاسەتا رۆژانە دیار دکە. دبێژە کا ئۆجالان و پەکەکە دکارن چ رۆل بلیزن.

گەلۆ ئۆجالان ھێزا خوەیا  دەستھلاتداریێ وندا کرییە؟

بەریا ھەر تشتی راپرسینێن گەل ل باکوور نشان ددن کو ئۆجەلان ل ھەمبەر سەلاحەدین دەمیرتاش ھێزا خوە ژ دەست دایە. ئۆجالان خوەست ئاکەپە دەنگێ خوە بدە ھلبژارتنێن ستەنبۆلێ، لێ گرسەیا کورد بەرۆڤاژی ڤێ یەکێ کر. ھەلبەت دەولەت ڤێ رەوشێ دبینە.

ھەر وھا دەولەتا ترک رەوشا ئەندامێن پەکەکێ یێن دەرڤە ژی دبینە. ھایا ترکان ژ پەیوەندیێن جەمیل بایک ب ئیرانێ ڤە ھەیە. ئەو ژی دبینە کو رێڤەبەریا دەرڤەیا پەکەکێ ب راستی دخوازە ھێزا ئۆجالان سینۆردار ببە .

ب راستی ژی ئۆجالان نە تەنێ ژ بۆ ئاکەپێ ، د ھەمان دەمێ دا ژ بۆ دەولەتێ ژی مریشکا ھێک زەرە. دەولەت نها ناخوازە ئۆجەلان لەواز بکە. دەولەت پێدڤی ب زراڤ و کوور حەرەکەت کرنێ ھەیە. حکوومەت ل رێبازەکا جودا دگەرە.

بەراوردکرنا دەمیرتاش ل گەل ئۆجالان، ھەلوەستێن ھەدەپێ، سەرەدانا وەکیلێن ھەدەپێ و ھندەک کەسایەتێن سییاسی ژ بۆ سلێمانیێ… ژ بەر ڤێ یەکێ نە.

ھەر وھا دڤێت بهێت دیتن کو ھەر چەندی ئاکەپە گەلەک سازیێن دەولەتا ترک کۆنترۆل دکە ژی، ئاکەپە ب تەنێ نەبوویە دەولەت. چاوا کو د ناڤا ئاکەپێ دا گەلەک باسک ھەنە، ل دەرڤەیی ئاکەپێ ژی ھێزێن دەولەتا ترک یێن جوودا ھەنە. پەکەکە ب ڤان ھەموویان ڤە گرێدایی یە. پرۆژەیا داگیرکرنا رۆژئاڤا نەیا ئاکەپێ تەنێ یە، پرۆژەیا ھەڤپارا ھەموو سازی و پارتیێن دەولەتا ترکە. ژ بۆ ڤێ ژی ھەموو باسک، چ ئاکەپە و چ یێن دن، دێ ل رێ و رێبازان بگەرن کو ئەو ب کێمترین زیان، رۆژئاڤا داگیر بکن. ژ بۆ ڤێ ژی دڤێت چاڤێ مە نە تەنێ ل ئاکەپێ بە، بەلکو دڤێت ئەم پێشی و پاشییا پلانێ ببینن.

کەنگی پەکەکێ گۆت بیت “ژیانا سەرۆک ئاپۆ د مەترسیێ دایە” بزانن کو تشتەک دن د بن ڤێ گۆتنێ دا ھەیە.

ئەم ژ بیر نەکن، دەما کو ساکینا جانسز ھاتیە کوشتن ژی د ناڤبەرا پەکەکێ و ئیستیخباراتا دەولەتا ترک میتێ دا ھەڤدیتن ھەبوون. نھا ژی ھەڤدیتن ھەنە. ھەڤدیتنێن د ناڤبەرا پەکەکێ، ئیمرالیێ و دەولەتێ دا بێ ناڤبەر بەردەوام دکن.

ئۆجالان ساخە و دژیت. ھەری داوی دەما کو پەکەکێ دقیری و دگۆت “مە بھیست کو سەرۆک ئاپۆ کریزا دلی دەرباس کریە” د وێ دەمێ دا کەرکووک ھات داگیرکرن. کەرکووک دھات داگیرکرن، گرسەیا پەکەکێ ب ناڤێ “بژی سەرۆک ئاپۆ” ئێریشی سازیێن ئەورۆپایێ دکر. ب ڤی ئاوایی نەدخواست کورد داگیرکرنا کەرکووکێ ببینن.

  یانی ھەر کو پەکەکە زێدە سلۆگانا “بژی سەرۆک ئاپۆ” بقیرە، بزانن کو وێ دەمێ فەن و فتنە ل کوردان تێ کرن. نھا گەلێ رۆژئاڤا ژ بۆ شکاندنا تەجریدا ل ئیمرالیێ ب وێنەیێن ئۆجالان قادان خوەپێشاندانان دکن. خەلکێ شەنگالێ د ژیانەکا مەترسیدار دا دژین، ئاخا وان د بن داگیرکەریێ دایە، لێ ب درووشما “ئازادی ژ بۆ ئۆجالان” مەشان داردخن. ئەڤ یەک بێی سەبەب نایێ کرن. دڤێت ئەم نە خاپین. رۆژەڤا کوردان نە ئۆجالانە، رۆژەڤا گەلێ کورد دڤێت داخوازکرنا ستاتوویا سییاسی و ژ ھۆلێ راکرنا داگیرکەری بیت.