رەژیما سووریێ ھێزەکا نوو ل منبجێ بجیھ کر

رەژیما سووریێ ھێزەکا نوو ل منبجێ بجیھ کر

چاڤدێرییا سووری یا مافێن مرۆڤان (SOHR) دا خویاکرن کو ھێزا رەژیما سووریێ هنارتیە منبجێ ژ 300 لەشکەران و چەکێن گران پێک دهێت.

شیرۆڤەکارێ سیاسی «جەمیل رەشید» ژ بۆ دەنگێ ئامەریکا گۆت ھێزا کو رەژیمێ شاندیە منبجێ، نە ب رێکەتنەکا نوو یان فەرمی لگەل ھێزێن سوورییا دەمۆکراتیکە شاندیە. لێ، شام و مۆسکۆیێ ژ بۆ خوە دەلیڤە دیتنە کو سوودێ ژ فشار و گەفێن ترکان بگرن و ھەبوونا خوە زێدە بکن”.

ھێژایی گۆتنێ یە کو نە رێڤەبرییا سڤیل یا منبجێ و نە ژی مەجلیسا لەشکەری یا منبجێ چ داخویانی یان ھەلوەست دەربارێ شاندنا ھێزێن رەژیمێ نیشان نەدانە.

دیسا، رەوشا ل ھندورێ باژارێ منبجێ و گوندەوارێن دەردۆرێ وەک بەرێیە و چ گوھەرتن ل سەر ئاستا ئەولەکاری و رێڤەبرییێ دا چێنەبوونە.

رەشید دەربارێ گرینگییا منبجێ دا گۆت کو ئەو باژار ژ ئالییێ جیۆپۆلۆتیک ڤە گەلەک ستراتەژیکە. لەوما، ھەر ئالی دخوازیت دەستێ خوە دانیتە سەر وی باژاری، لێ گاڤا نێزیکاتییا رەژیما سووریێ و رووسیا ووسا بیت، دێ دەرگەهی ل بەر تەڤلیھەڤی و ناکۆکییان ڤەکەت”.

ھێژایی گۆتنێیە کو لیوایا 25ێ د ئارتێشا سووریا دا کو ھاتیە منبجێ، ب سەر رووسیا ڤەیە ژبەر کو مووچە، لۆجستیک و فەرمانێن خوە ژ بنگەھا حەمێمی یا رووسیا وەردگریت.

د ڤێ دەربارێ دا مەدیایا سەر ب رەژیما سووریا ڤە ل سەر تۆرێن جڤاکی چەندین وێنە و دیمەن بەلاڤ کرن کو تانک، ترومبێلێن زرخی و تۆپاڤێژێن کو چوونە منبجێ دیار دبن.

ھەروھا، دەنگێ فەرماندارێ لیوایا 25ێ ھاتیە بەلاڤ کرن کو دبێژیت ئەو ل ئەنییێن باکورێ منبجێ ژ بەراڤا فراتێ ھەتا باژارۆکێ ئاریمێ ب جیھ بوونە. ئەو فەرماندار ژ لەشکەرێن خوە دخوازە کو بەرسڤا ئێریشێن ترکییێ بدن.

ل سەر پرسا کو ئەڤ ھێزە چەند دکاریت ل ھەمبەر ئێریشا ترکی راوەستیت، رەشید دبێژیت کو ئەو ھێز نکارن ئێریشەکا دژی باکور و رۆژھلاتا سووریێ و ب تایبەتی منبجێ راوەستینن.

“ھێزێن رەژیمێ ژخوە ل منبج و ل ھن دەڤەرێن دن یێن وەک تل تەمر و عەین عیسا ھەنە، لێ رۆژانە ئارتێشا ترک ب بالافر، درۆن و تۆپبارانێ ئێریش دکە. قوربانی ژی چێدبن، لێ رووس و رەژیم بێدەنگن.”

رەشید ھەلوەستا رووسیا رەخنە دکە کو دخوازیت ترکییێ ل سەر حەسابا رێڤەبرییا خوەسەر بدە قاییل کرن و پێشنییار دکە کو مۆسکۆ ناڤبەینکاری د ناڤبەرا حکوومەتا شامێ و رێڤەبرییا خوەسەر دا بکەت.

پوستێن ھەمان بەش