رەوانگەها سووری یا مافێن مرۆڤان راگهاند، 2 چەکدارێن ژ کۆمێن ئالیگرێن تەهران و حزبوللاها لبنانی د مووشەکبارانا ئیسرائیلی ل سەر ل دەردۆرا شامێ دە هاتنە کوشتن.
ئاژانسا «سانا» یا سووریێ ژ زارێ ژێدەرەکی لەشکەری راگهاند، ئسرائیلێ ب مووشەکان ئێریشەکە ئاسمانی پێک ئانی کو د ئەنجاما ئێرشان دە 2 لەشکەر بریندار بوون و هن زیانێن مادی دەرکەتنە.
وی ژێدەری گۆت ژی: «سیستەما مە یا بەرەڤانیا ئاسمانی رووبروویی مووشەکان بوو و هەژمارەک ژ وان خستن خوارێ».
ل گۆری رەوانگەها سووری یا مافێن مرۆڤان، مووشەکبارانێ دەپۆیەکە چەکان یا حزبوللاها لبنانی، کو د ناڤبەرا فرۆکەخانەیا ناڤدەولەتی یا شامێ و دەڤەرا سەیده زەینەب ل باشوورێ شامێ دە یە، کرە ئارمانج.
رەوانگەهێ دا زانین ژی، 2 کەس د ئەنجاما مووشەکبارانێ دە هاتنە کوشتن، بێی کو ناسنامە و رەگەزا کەسەکی ژ وان دیار بکە.
ئەڤ بۆمبەباران پشتی نێزیکی حەفتەیەکێ ژ ئێریشا ئیسرائیلێ ل فرۆکەخانەیا لەشکەری یا شوعەیرات ل ناڤەندا سووریێ تێ کو د ئەنجامێ دە 2 لەشکەر هاتن کوشتن و 3 لەشکەر ژی بریندار بووبوون.
