زارۆک د ناڤ 110 رۆژێن بۆری دە بوونە قوربانیێن سەرەکە یێن تەپەسەرکرنا خوەپێشاندانێن ئیرانێ، د ڤان خوەپێشاندانان دە ژ زارۆکێن 2 سالی هەتا جوانێن 17 سالی هاتنە کوشتن و ب دەهان زارۆک ژی هاتنە گرتن، لێ بەلێ ل سەر هەژمارا زارۆکێن کو ژ ئالیێ حکوومەتێ ڤە هاتنە کوشتن ئان ژی هاتنە بنچاڤکرن، ت ئامارێن فەرمی نینن.
ئەنجوومەنا پشتەڤانیا مافێن زارۆکان د نامەیەکێ دە ژ سەرۆکێ دەزگەها دادوەرییا ئیرانێ گولاموحسێن موحسێن ئیژەیی رە داخواز ژێ کر کو ئامارێن هوور و راست دەربارێ کوشتن و دەستەسەرکرنا زارۆکان ژ رۆژا یەکەما خوەپێشاندانان ڤە بەلاڤ بکە.
د نامەیێ دە هاتیە، گەلەکی گرنگە ئاماران و شەفافیەت دەربارێ دەزگەهێن ئەولەکاری یێن کو ئەڤ زارۆک گرتنە بێنە بەلاڤ کرن و رەوشا زارۆکان بێنە شۆپاندن، ژ بۆ ئالیکاریا یاسایی ژ وان رە بێ پێشکێشکرن.
ئەنجوومەنا پشتگریا مافێن زارۆکان، رەخنە ل بێپارکرنا ڤان زارۆکان ژ ئازادیا دانینا پارێزەران ژ خوە گرت و گۆت، گەلەک پارێزەرێن دلسۆز ئامادەنە بێ پەرە بەرەڤانیێ ل مافێن ڤان زارۆکان بکن.
ل گۆری راپۆرا هەری داوی یا کۆمەلەیا چالاکڤانێن مافێ مرۆڤان یا ئیرانێ، د خوەپێشاندانێن 110 رۆژانێن ل باژارێن ئیرانێ دە، هەری کێم 70 زارۆک هاتنە کوشتن، لێ ڤێ رێخستنێ هەژمارا زارۆکێن ل ئیرانێ هاتنە بنچاڤکرن ئاشکەرە نەکر، رێخستنا مافێ مرۆڤان یا هانگاو ژی راگهاند، د وێ هەیامێ دە 14 زارۆک ل رۆژهلاتێ کوردستانێ هاتنە کوشتن و 162 زارۆک ژی هاتنە گرتن.
